Kasi Muli Ŵakugomezgeka mu Vinthu Vyose?
Kasi Muli Ŵakugomezgeka mu Vinthu Vyose?
“Uyo ngwakugomezgeka mu kacoko waka, ndiyo ngwakugomezgekaso mu vikuru.”—LUKA 16:10.
1. Kasi Yehova ngwakugomezgeka mu nthowa wuli?
KASI muli kuwona ico cikucitikira mufwiri wa khuni para zuŵa likukwera? Usani na utali wake vikusintha ndipo ukung’anamuka! Kanandi vyakulata na malayizgo gha ŵanthu vikuŵa vyambura kugomezgeka nga ni mufwiri. Kweni Yehova Ciuta wakusintha yayi nanga pangajumpha nyengo yitali. Yakobe wakati Iyo ni “Wiske wa kungweruka,” ndipo “wangaŵa wakuzgokazgoka cara, panji nesi kuŵa na mufwiri wakung’anamuka.” (Yakobe 1:17) Yehova wakusintha yayi, ndipo ngwakugomezgeka nanga mungaŵa mu tunthu tucoko nkhanira. Iyo ni ‘Ciuta wa unenesko’—Duteronome 32:4.
2. (a) Cifukwa wuli tikwenera kujipima na kuwona usange tili ŵakugomezgeka? (b) Kasi tidumbiskanenge mafumbo wuli pa nkhani ya kugomezgeka?
2 Kasi Ciuta wakuŵawona wuli ŵakugomezgeka? Wakuŵawona umo wakaŵawoneranga Davide. Iyo wakati: ‘Maso ghane gha ucizi ghaŵenge pa ŵakugomezgeka mu caru, kuti ŵakhale nane; mweneuyo wakwenda mu nthowa yiwemi yakufikapo, ndiye wanditeŵeterenge.’ (Salmo 101:6) Yehova wakukondwa kuwona kuti ŵateŵeti ŵake mbakugomezgeka. Lekani mpositole Paulosi wakalemba kuti: “kukukhumbikwa mu ŵalindi ŵalara, kuti munthu wasangike wa magomezgeko.” (1 Ŵakorinte 4:2) Kasi kugomezgeka cikung’anamuraci? Kasi tikwenera kugomezgeka pa vinthu wuli mu umoyo withu? Kasi uwemi wa ‘kwenda mu nthowa yiwemi’ ngwakuti wuli?
Ng’anamuro la Kugomezgeka
3. Kasi nchivici cikulongora usange tili ŵakugomezgeka?
3 Lemba la Ŵahebere 3:5 likuti: ‘Mozesi wakaŵa wakugomezgeka . . . nga ndi mteŵeti.’ Kasi mprofeti Mozesi wakaŵa wakugomezgeka pa vici? Pakusona na kwimika cihema, ‘Mozesi wakacita ntheura; kwakulingana na vyose [ivyo] Yehova wakamuwuzga, ndimo wakacitira.’ (Exodus 40:16) Pakuti tikusopa Yehova, tikulongora kuti tili ŵakugomezgeka usange tikupulikira pakumuteŵetera. Ici cikung’anamura kuti tikwenera kugomezgeka kwa Yehova na para tikuyezgeka wuwo. Ndipouli, tikulongora kuti tili ŵakugomezgeka para tikuzizipizga viyezgo vikuru pera yayi. Yesu wakati: “Uyo ngwakugomezgeka mu kacoko waka, ndiyo ngwakugomezgekaso mu vikuru: ndipo uyo ngwakubendera mu kacoko waka, ndiyo ngwakubendera na mu vinandi wuwo.” (Luka 16:10) Tikwenera kugomezgeka nanga mungaŵa mu tunthu tucoko.
4, 5. Kasi tikuvumburaci para tikugomezgeka mu tunthu ‘tucoko’?
4 Nchakuzirwa kuti zuŵa lililose tipulikirenge mu tunthu ‘tucoko’ pa vifukwa viŵiri. Cakwamba, tikulongora umo tikuwonera muwuso wa Yehova. Kumbukani ciyezgo ca kupulikira ico Adamu na muwoli wake Heva ŵakaŵamo. Cikaŵa cakusuzga yayi kuti ŵapulikire. Ŵakazomerezgeka kurya vyakurya vyose mu munda wa Edeni, kupatulako vipambi vya khuni limoza pera, “khuni la kumanyiska uwemi na uheni.” (Genesis 2:16, 17) Ŵanthu ŵaŵiri ŵara ŵapulikirenge dango lipusu lira mphanyi ŵakalongora kuti ŵakakhozgeranga muwuso wa Yehova. Usange tikulondezga ulongozgi wa Yehova zuŵa lililose mu umoyo withu, tikulongora kuti tili ku cigaŵa ca muwuso wa Yehova.
5 Caciŵiri, nkharo yithu mu tunthu ‘tucoko’ yikulongora umo tingacitira “mu vikuru,” panji kuti pa nkhani zikuru mu umoyo withu. Pa fundo iyi, kumbukani ivyo vikacitikira Daniyele na Ŵahebere ŵanyake ŵatatu, Hananiya, Mishayeli na Azariya. Ŵakatolekera ku wuzga ku Babulone mu 617 B.C.E. Apo ŵakaŵa ŵana, panji ŵawukirano, ŵanthu ŵanayi aŵa ŵakatolekera ku nyumba ya Themba Nebukadinezara. Ŵakaŵagaŵira “zuŵa na zuŵa phande la vyakurya vya themba na la vinyo ilo likamwanga themba. Ŵakwenera kulereka vilimika vitatu, ndipo pa kumara kwa nyengo iyo ŵimenge pamaso pa themba.”—Daniel 1:3-5.
6. Kasi Daniyele na Ŵahebere ŵanyake ŵatatu ŵakayezgeka na vici mu nyumba ya uthemba ya Ŵababulone?
6 Kweni cikaŵa cakusuzga kuti Ŵahebere ŵanayi ŵara ŵarye cakurya ico themba la Babulone likapeleka. Vyakurya vinyake vya themba vikakanizgikanga mu Dango la Mozesi. (Duteronome 14:3-20) Panji ŵakathiskanga ndopa yayi pakukoma nyama zira, ntheura ŵaryenge mphanyi ŵakajumpha Dango la Ciuta. (Duteronome 12:23-25) Kweniso panji cakurya cira cikaŵa cakupelekeka ku vikozgo, pakuti ndivyo Ŵababulone ŵakacitanga pambere ŵandayambe kulyera pamoza.
7. Kasi Daniyele na ŵanyake ŵatatu ŵakalongora vici cifukwa ca kupulikira?
7 Nkhani ya kuziŵizga vyakurya yikwenera kuti yikaŵa yakuzirwa viŵi yayi mu nyumba ya themba la Babulone. Kweni Daniyele na ŵabwezi ŵake ŵakasimikizga mu mitima yawo kuti ŵaleke kujifipiska na cakurya ico cikaŵa cakukanizgika mu Dango ilo Ciuta wakaphalira Ŵaisrayeli. Iyi yikaŵa nkhani yakukhwaskana na kugomezgeka kwa Ciuta. Ntheura ŵakalomba kuti ŵaŵape mphangwe na maji, ndipo ndivyo ŵakapika. (Daniel 1:9-14) Ŵanyake lero ŵangawona ngati ivyo ŵawukirano ŵanayi ŵara ŵakacita vikaŵa vicoko. Kweni cifukwa cakuti ŵakapulikira Ciuta, ŵakalongora uyo ŵakimiranga pa nkhani ya muwuso wa Yehova.
8. (a) Kasi nchiyezgo wuli ca kugomezgeka ico cikawira Ŵahebere ŵatatu? (b) Kasi vikamara wuli ndipo tikusambirapo vici?
8 Ivyo Daniyele na ŵanyake ŵatatu ŵakacita vingawoneka vicoko, kweni ici cikaŵawovwira kuti ŵatonde ciyezgo cikuru. Jurani Baibolo linu pa Daniel cipaturo 3 na kuŵazga umo Ŵahebere ŵatatu ŵakaŵapira cilango ca nyifwa cifukwa cakuti ŵakakana kusopa cikozgo ca golide ico Themba Nebukadinezara likimika. Apo ŵakaŵatolera panthazi pa themba, iwo ŵakayowoya mwacikanga kuti: ‘Kuŵe ntheura, Ciuta withu uyo tikumuteŵetera wali na mazaza kutithaska ku ng’anjo ya moto wakunyeka; ndipo watithaske ise kutifumya ku woko lako, iwe wa themba. Kweni [para] kuŵenge ntheura cara, kumanyikwe kwa iwe themba kuti titeŵeterenge ŵaciuta ŵako cara, nesi kulambira cikozgo ca golide ico wimika.’ (Daniel 3:17, 18) Kasi Yehova wakaŵathaska? Ŵalinda awo ŵakataya ŵawukirano ŵara mu ng’anjo ŵakafwa, kweni Ŵahebere ŵatatu ŵakugomezgeka ŵara ŵakafumamo ŵamoyo, kwambura kuŵawuka na cithukivu ca ng’anjo! Cifukwa cakuti ŵanthu aŵa ŵakaŵa ŵakugomezgeka nyengo zose, ŵakaŵa ŵakunozgeka kugomezgeka pa ciyezgo cikuru cira. Asi uwu mbukaboni wakuti nchakuzirwa kugomezgeka mu tunthu tucoko?
Kugomezgeka na “Usambazi wa Ubendezi”
9. Kasi Yesu wakayowoyanga nkhani wuli apo wakazunura mazgu agho ghali pa Luka 16:10?
9 Pambere Yesu wandayowoye fundo yakuti uyo ngwakugomezgeka mu kacoko waka, ndiyo ngwakugomezgekaso mu vikuru, wakaphalira awo ŵakamupulikanga kuti: “Muparane ubwezi na usambazi wa ubendezi; mwakuti, para wamara, mungapokelereka mu maukhalo gha muyaya.” Kufuma apo wakayowoya za kugomezgeka mu tunthu tucoko. Ndipo wakati: ‘Usange ntheura imwe mwawura kugomezgeka na usambazi wakubendera, ndi njani uyo wamumugomezgani na usambazi weneco? . . . Palive muteŵeti wa mu nyumba wakumanya kuteŵetera ŵene nchito ŵaŵiri: cifukwa panji watinkhenge munyake; panji watemwenge munyake; panji waskepeleranenge na munyake, ndipo wasunjizgenge munyake. Mulive kumanya kuteŵetera Ciuta na usambazi.’—Luka 16:9-13.
10. Kasi tingagomezgeka wuli pakugwiliskira nchito “usambazi wakubendera”?
10 Nkhani iyi yikulongora kuti mazgu gha Yesu pa Luka 16:10 ghakaŵa ghakukhwaskana na kugwiliskira nchito “usambazi wakubendera,” kung’anamura cuma cithu panji ivyo tili navyo. Vinthu ivi vikucemeka vyakubendera cifukwa cakuti awo ŵakwendeska vya cuma, comene ndarama ni ŵanthu ŵakwananga. Nakuti usange munthu wakudokera usambazi, wangacita viheni. Ise tikulongora kuti tili ŵakugomezgeka usange tikucita mwavinjeru na cuma cithu. Tikuŵa ŵazukusi yayi na cuma cithu, kweni tikovwira pa nchito ya Ufumu, na kovwira ŵakusuzgika. Usange tikugomezgeka mu nthowa iyi, tikuŵa ŵabwezi ŵa Yehova Ciuta na Yesu Khristu, awo ŵali na “maukhalo [malo ghakukhalamo] gha muyaya.” Iwo ŵazamutipokelera ku malo agha na kutipa umoyo wamuyirayira kucanya panji mu Paradiso pa caru capasi.
11. Cifukwa wuli tikwenera kuleka yayi kuphalira ŵanthu kuti tikupokera vyakupeleka vya nchito iyo Ŵakaboni ŵa Yehova ŵakucita pa caru cose?
11 Kweniso wonani mwaŵi uwo tikuŵapa awo ŵakupokera Mabaibolo panji mabuku ghakulongosora Baibolo para tikupharazga uthenga wa Ufumu. Tikuŵaphalira kuti tikupokera vyakupeleka vyakwendeskera nchito iyo ŵanthu ŵa Yehova ŵakucita pa caru cose. Asi tikuŵapa mwaŵi kuti ŵacite mwavinjeru na cuma cawo? Nangauli lemba la Luka 16:10 likuyowoya za kugwiliskira nchito cuma, kweni fundo iyo yikuyowoyeka apa yikovwira pa vinthu vinyake.
Nchakuzirwa Kugomezgeka
12, 13. Kasi tingalongora kugomezgeka pa vinthu wuli?
12 Mpositole Paulosi wakalemba kuti: “Tikujigomezga kuti tili na njuŵi ziwemi, ndipo tikukhumba mu vyose kukhala makora” panji kugomezgeka. (Ŵahebere 13:18) Apa vinthu “vyose” ŵakung’anamura kugomezgeka pa vinthu vyose, na vya ndarama wuwo. Tikuwezga ngongoli na kupeleka misonkho mwaluŵiro ndiposo mwakugomezgeka. Cifukwa? Tikucita nthena cifukwa ca njuŵi zithu, kweniso cifukwa cakuti tikutemwa Ciuta na kupulikira ulongozgi wake. (Ŵaroma 13:5, 6) Kasi tikucita wuli para tasora kanthu? Tikupenja mweneko na kumuwezgera. Usange tacita nthena, tikuŵa na mwaŵi wakuti tilongosore ico catituma kuti tiwezge katundu kwa mweneko.
13 Kuŵa ŵakugomezgeka mu vyose cikung’anamura kuti tikwenera kuŵa ŵakugomezgeka uko tikugwira nchito. Usange tikugomezgeka pa nchito, tikulongora umo Ciuta uyo tikwimira waliri. “Tikwiba” nyengo yayi pa nchito cifukwa ca ukata. Kweni tikulimbikira nga tikuteŵetera Yehova. (Ŵaefeso 4:28; Ŵakolose 3:23) Mu caru cinyake ku Europe, ŵakusacizga kuti wanchito yumoza pa ŵatatu awo ŵakupempha kalata kwa dokotala kuti wakapumure wakuteta waka kuti walwara. Awo ŵakuteŵetera Ciuta mwaunenesko ŵakuyowoya utesi yayi mwakuti ŵakhale ku nchito. Nyengo zinyake Ŵakaboni ŵa Yehova ŵakukwezgeka pa nchito cifukwa cakuti awo ŵali kuŵalemba ŵakuwona kuti mbakugomezgeka nakuti mbanthu ŵakulimbikira.—Zintharika 10:4.
Kugomezgeka mu Uteŵeti Wacikhristu
14, 15. Kasi ni nthowa wuli zinyake izo tingalongolera kuti tili ŵakugomezgeka mu uteŵeti?
14 Kasi tikulongora wuli kuti tili ŵakugomezgeka pakucita uteŵeti uwo tili kupika? Baibolo likuti: “Tipelekenge sembe ya malumbo kwa Ciuta lutaluta, uko ndiko kuti cipambi ca milomo iyo yikuzomera zina lake.” (Ŵahebere 13:15) Nthowa yakwamba yakulongolera kuti tili ŵakugomezgeka mu uteŵeti wa m’munda njakuti tipharazgenge nyengo zose. Kasi pali cifukwa cakuti mwezi ujumphepo waka kwambura kupharazga za Yehova na khumbo lake? Usange tikucita nchito ya kupharazga nyengo zose cikutovwira kusazgirako maluso ghithu.
15 Nthowa yinyake yakulongolera kugomezgeka mu uteŵeti ŵa m’munda nkhulondezga masacizgo agho ghakuŵa mu Gongwe la Mulinda na Uteŵeti Withu wa Ufumu. Para tikunozgekera na kulondezga masacizgo agha panji ghanyake agho ghangaŵa ghakovwira, asi tikuwona kuti uteŵeti withu ukutipindulira? Para takumana na munthu uyo wakukhumba kupulika uthenga wa Ufumu, kasi tikuwelerako luŵiro? Wuli usange tayamba kusambira Baibolo na ŵanthu? Kasi tikusambira nawo mwakugomezgeka? Para tikugomezgeka mu uteŵeti, tingathaska umoyo withu kweniso wa awo ŵakutipulika.—1 Timote 4:15, 16.
Kujipatura ku Caru
16, 17. Kasi ni nthowa wuli izo tingalongolera kuti tikujipatura ku caru?
16 Apo Yesu wakalombanga kwa Ciuta, wakayowoya za ŵasambiri ŵake kuti: “Ine ndaŵapa mazgu ghinu; ndipo caru cikaŵatinkha, pakuti mba caru cara. Kuti nkhulomba cara kuti muŵafumyemo mu caru, kweni kuti muŵasungilire ku muheni. Kuti mba caru cara, nga ndi umo Ine kuti ndiliri wa caru cara.” (Yohane 17:14-16) Tingaŵikapo mtima kuti tijipature ku caru pa nkhani zikuru nga nkhuleka kunjilirapo pa ndyali, kukana maholide gha visopo na maluso ghake, na uzaghali. Kweni tikucita wuli pa tunthu tucoko? Kasi tikutolera nthowa za caru kwambura kumanya makora? Usange tikuleka kucenjera, nchipusu kwamba kuvwara mwambura nchindi ndiposo mwambura kwenelera. Usange tili ŵakugomezgeka, tikwenera kuvwara na kujitozga ‘mwakwenelera pamoza na soni na kuziza.’ (1 Timote 2:9,10) Inya, tikuŵa “cikhuŵazgo mu kanthu na kamo kose cara, mwakuti uteŵeti withu uleke kususkika; kweni mu kanthu kose tikujilumba tekha, nga mbateŵeti ŵa Ciuta.”—2 Ŵakorinte 6:3, 4.
17 Pakuti tikukhumba kucindika Yehova, tikuvwara mwanchindi pakuya ku maungano gha mpingo. Ndimo tikucitiraso usange tikuya ku maungano ghakuru gha dera ndiposo gha cigaŵa. Tikuvwara mwakwenelera ndiposo mwanchindi. Uwu mbukaboni kwa awo ŵakutiwona. Na ŵangelo wuwo ŵakuwona ivyo tikucita, umo ŵakawoneranga Paulosi na ŵabwezi ŵake. (1 Ŵakorinte 4:9) Nakuti tikwenera kuvwara mwakwenelera nyengo zose. Ŵanyake ŵangawona ngati nchakuzirwa viŵi yayi kugomezgeka pa kavwaliro, kweni Ciuta wakuwona kuti nchakuzirwa.
Njombe za Kugomezgeka
18, 19. Kasi kugomezgeka kuli na njombe wuli?
18 Ŵakhristu ŵaunenesko ŵakucemeka ‘ŵalinda ŵalara ŵawemi ŵa ucizi wa mitundu mitundu wa Ciuta.’ Ntheura ŵakugomezga ‘nkhongono izo Ciuta wakuŵapa.’ (1 Petros 4:10, 11) Ndiposo pakuŵa ŵalinda, wali kutiŵikizga vinthu ivyo ni vithu cara. Uteŵeti uwo tapika nawo nchilongolero ca ucizi wa Ciuta. Kuti tiŵe ŵalinda ŵawemi, tikugomezga nkhongono izo Ciuta wakupeleka, “nkhongono [“zakuluska za kawiro,” NW].” (2 Ŵakorinte 4:7) Apa tikusambizgika makora kuti tizakamanye kuzizipizga viyezgo ivyo vingatiwira munthazi!
19 Wamasalmo wakati: ‘Imwe mose ŵakupatulikira iye, temwani Yehova! Yehova wakusungilira ŵakugomezgeka.’ (Salmo 31:23) Ipo tiyeni tigomezgeke, uku tikumanya kuti Yehova ni “Mponoski wa ŵanthu wose, kweni comene wa awo ŵakupulikana” panji ŵakugomezgeka.—1 Timote 4:10.
Kasi Mukukumbuka?
• Cifukwa wuli tikwenera kugomezgeka mu tunthu ‘tucoko’?
• Kasi ni nthowa wuli izo tingalongolera kugomezgeka
kwambura upusikizgi?
mu uteŵeti?
pa kujipatura ku caru?
[Mafumbo]
[Vithuzithuzi pa peji 13]
Kugomezgeka mu tucoko waka na mu vikuru wuwo
[Cithuzithuzi pa peji 16]
Muŵe ŵakugomezgeka mu vyose
[Cithuzithuzi pa peji 16]
Nthowa yiwemi yakulongolera kugomezgeka nkhunozgekera makora uteŵeti wa m’munda
[Cithuzithuzi pa peji 17]
Vwarani na kujitozga mwakwenelera