Mwaŵi Wakuti Mupulikiske Baibolo Ulipo

MU Baibolo muli unenesko wakuzirwa kufuma kwa Ciuta. Likutiphalira cilato ca umoyo, umo masuzgo gha ŵanthu ghakambira, na ivyo vili munthazi. Likutisambizga umo tingasangira cimwemwe, umo tingakolerana ubwezi na ŵanyithu, na umo tingamazgira masuzgo. Cakuzirwa comene, tikusambiramo za Mlengi, Ŵadada ŵithu ŵakucanya, Yehova. Para tamanya ivi tikuŵa ŵacimwemwe ndiposo tikumanya ico umoyo withu ukukhumba.

Baibolo likuyelezgera kusambira za Ciuta na kurya. Yesu wakati: “Munthu kuti wakhalenge wamoyo na cingwa pera cara, kweni na mazgu ghose agho ghakufuma mu mulomo wa Ciuta.” (Mateyu 4:4; Ŵahebere 5:12-14) Nga umo kurya cakurya ciwemi zuŵa lililose nkhwakukhumbikwa kuti tiŵe na umoyo, kuŵazga Baibolo zuŵa lililose nako nkhwakukhumbikwa kuti tizakasange umoyo wamuyirayira uwo Ciuta walayizga.

Kurya nkhwakukondweska cifukwa ndimo tili kulengekera, kweniso kukukhorweska ivyo umoyo ukukhumba. Ndipouli, kuti tiŵe ŵacimwemwe tikwenera kucita vinthu vinyake ivyo umoyo ukukhumba. Yesu wakati: “Mba mwaŵi ŵakavu mu mzimu.” (Mateyu 5:3) Para taghapulikiska Mazgu gha Ciuta, ukavu wauzimu umalenge ndipo tiŵenge ŵacimwemwe.

Mbunenesko, ŵanji ŵakuwona Baibolo kuti ndakusuzga kulipulikiska. Mwaciyelezgero, panji mungakhumba wovwiri kuti mupulikiske malemba agho ghakuzunura vinthu ivyo mukuvimanya yayi panji ghakuyowoya mwantharika. Ndiposo pali maucimi agho ghali kulembeka mwakuyelezgera vinthu vinyake. Maucimi agha mungaghapulikiska pekha para mwawonaso malemba agho  ghakuyowoya nkhani yakuyana waka. (Daniel 7:1-7; Civumbuzi 13:1, 2) Nangauli vili nthena, kweni mungalipulikiska Baibolo. Kasi mungasimikizga wuli kuti mungalipulikiska?

Mwaŵi Ulipo kwa Waliyose

Baibolo ni Mazgu gha Ciuta. Ndilo wakuyowoyeramo ivyo wakukhumba kwa ise. Kasi Ciuta wangapeleka buku lakusuzga kulipulikiska, panji lakupulikikwa ku ŵanthu ŵakusambira pera? Yayi, Yehova wangaŵa wambura lusungu cara. Khristu Yesu wakati: ‘Ndi nju wa imwe uyo ndi wiske, para mwana wake wakulomba cingwa, wakumupa libwe? panji somba, ndipo kuti wakumupa somba cara kweni njoka ndiyo? Panji wakulomba sumbi, kasi wakumupa kalizga? Ntheura usange imwe, mwa ŵaheni, mukumanya kuŵapa ŵana ŵinu vyawanangwa viwemi, asi comene kwakuluska Ŵawiskemwe ŵa kucanya ŵati ŵaŵapenge mzimu utuŵa awo ŵakuŵalomba?’ (Luka 11:11-13) Ndico cifukwa cake namwe mungaŵa ŵakusimikizga kuti mungalipulikiska Baibolo, ndipo usange mukulomba Ciuta na mtima winu wose, wamovwiraninge kuti mupulikiske Mazgu ghake. Nanga mbana ŵangapulikiska visambizgo vyakwambilira vya Baibolo.—2 Timote 3:15.

Nangauli pakukhumbikwira citatata kuti tilipulikiske Baibolo, kweni para tacita nthena tingakhozgeka comene. Yesu wakati wawuka, wakawonekera ŵasambiri ŵake ŵaŵiri na kuyowoya nawo za maucimi gha mu Baibolo. Nkhani ya Luka yikuti: “Ndipo kwamba kwa Mozesi na ku Ŵaprofeti wose, wakaŵatanthaulira mu Malembo ghose ivyo vikalembeka [vyakukhwaskana] na iyo Mwene.” Kasi cikacitika nchivici? Namise apo ŵakaghanaghananga ivyo ŵakapulika, ŵasambiri ŵakati: “Asi mitima yithu yaphyanga, apo wayowoyanga nase mu nthowa, na apo watanduliranga Malembo?” (Luka 24:13-32) Ŵasambiri ŵara ŵakaŵa na cimwemwe pakuti ŵakapulikiska Mazgu gha Ciuta, ndipo ici cikakhozga cipulikano cawo mu vilayizgo vya Ciuta na kuŵapa cilindizga ciwemi ca munthazi.

Mazgu gha Ciuta ngakusuzga yayi kughapulikiska, kweni ngacandulo ndipo ngakukondweska, nga umo tikukondwera na cakurya cakunowa. Kasi mukwenera kucitaci kuti mughapulikiske? Nkhani yakulondezgapo yikulongora umo mungaŵira na “mahara ghakumanyira Ciuta.”—Zintharika 2:1-5.

[Cithuzithuzi pa peji 4]

Nga ni dada wakutemwa, Yehova wakutovwira na mzimu utuŵa kuti tipulikiske Baibolo