Mafumbo Ghakufumira ku Ŵaŵazgi

Pakuti Yehova wakukanizga kusopa vikozgo, cifukwa wuli wakamulanga yayi Aroni apo wakapanga katholi kagolide?

Apo Aroni wakapanga katholi kagolide, wakaswa dango lakukanizga kusopa vikozgo ilo lili mu cipaturo 32 ca Exodus. (Ex. 20:3-5) Ntheura, “Yehova wakakaripa comene na Aroni [ndipo wakakhumbanga] kumuparanya.” Kweni Mozesi ‘wakamulombera’ Aroni. (Dute. 9:19, 20) Kasi kuŵeya kwa Mozesi kukaŵa na “nkhongono comene”? (Yak. 5:16) Enya. Vikuwoneka kuti cifukwa ca kuŵeya uku ndiposo vifukwa vinyake viŵiri, Yehova wakamulanga yayi Aroni.

Cifukwa cakwamba cikaŵa cakuti Aroni wakaŵa na lumbiri lwa kugomezgeka. Apo Mozesi wakaphalirika kuti walute kwa Faro na kufumya Ŵaisrayeli mu Eguputo, Yehova wakasora Aroni kuti ndiyo walute nayo. (Ex. 4:10-16) Cifukwa ca kupulikira, Aroni na Mozesi ŵakaluta kanandi waka kwa Faro themba la Eguputo, ndipo ŵakazizipizga viheni vyose ivyo Faro wakaŵacitira. Ntheura, wacali wandafumemo mu Eguputo, Aroni wakalongora kuti ngwakugomezgeka kwa Yehova.—Ex. 4:21.

Ghanaghaniraniso ico cikacitiska Aroni kupanga katholi kagolide. Mozesi wakaŵa mu lupiri lwa Sinayi kwa mazuŵa 40. ‘Ŵanthu ŵakati ŵawona kuti Mozesi waziwulika kwikha mu lupiri,’ ŵakacicizga Aroni kuti waŵapangire cikozgo. Aroni wakazomera, ndipo wakaŵapangira. (Ex. 32:1-6) Kweni ivyo Aroni wakacita pamasinda vikalongora kuti wakakolerana navyo yayi vya kusopa katholi kagolide. Wakwenera kuti wakacita kucicizgika waka. Apo Mozesi wakayowoya kuti ŵawoche katholi kagolide aka, Ŵalevi wose pamoza na Aroni ŵakakolerana nayo fundo iyi. Ŵanthu 3,000 awo ŵakambiska kuti ŵapange ndiposo kusopa katholi, ŵakakomeka.—Ex. 32:25-29.

Pamasinda, Mozesi wakaphalira ŵanthu kuti: “Mwananga kwananga kukuru.” (Ex. 32:30) Ntheura, ni Aroni pera yayi uyo wakananga. Padera pakugowokera Aroni Yehova wakagowokeraso ŵanthu ŵanyake.

Ivi vyati vyajumphapo, Yehova wakalangura kuti Aroni wimikike kuŵa musofi mukuru. Ciuta wakaphalira Mozesi kuti: ‘Vwalika Aroni vivwaro vyakupatulika, na kumuphakazga na kumupatura, mwakuti wanditeŵetere mu uteŵeti wa upristi.’ (Ex. 40:12, 13) Nchakuwonekerathu kuti Yehova wakamugowokera Aroni. Aroni wakaŵa wakugomezgeka ndipo wakakhozgeranga kusopa kwaunenesko, kuti kusopa vikozgo yayi.