Gomezgani Yehova “Ciuta wa Cisangulusko Cose”
Gomezgani Yehova “Ciuta wa Cisangulusko Cose”
“Watumbikike Ciuta na Wiske wa Fumu yithu Yesu Khristu, Dada wa mtima wacisungusungu na Ciuta wa cisangulusko cose.”—2 KOR. 1:3.
1. Kasi munthu waliyose wakukhumbikwira vici?
KUFUMA waka pa zuŵa lakubabikira, munthu waliyose wakukhumbikwira cisangulusko. Para bonda wakukhumba cisangulusko wakucita kulira. Wangaŵa kuti wakukhumba kuti ŵamupakate panji wali na njara. Nanga tingaŵa taŵalara, nase kanandi tikukhumba kusanguluskika, comenecomene para takumana na masuzgo.
2. Kasi Yehova wakuŵasimikizgira vici awo ŵakumugomezga?
2 Kanandi ŵamumbumba yithu panji ŵabwezi ndiwo ŵakuyezga kutisanguluska. Nyengo zinyake suzgo lingaŵa likuru mwakuti munthu wangacitapo kanthu yayi kuti watisanguluske. Ciuta yekha ndiyo wangatisanguluska kwali suzgo liŵe likuru wuli. Mazgu ghake ghakutisimikizgira kuti: “Yehova wali pafupi na wose awo ŵakumucema . . . ndipo wakupulika nkhuto yawo.” (Sal. 145:18, 19) “Maso gha Yehova ghakulaŵiska ŵarunji, makutu ghake ghakupulika nkhuto yawo.” (Sal. 34:15) Kweni kuti Ciuta watikhozge na kutisanguluska, tikwenera kumugomezga. Davide wakalongora fundo iyi apo wakimba kuti: “Yehova tiwaŵenge nga nchigongwe ca ŵakuyuzgika, cigongwe mu nyengo za suzgo. Awo ŵakumanya zina linu ŵakumugomezgani, cifukwa, A Yehova, mulive kuŵajowora awo ŵakumupenjani.”—Sal. 9:9, 10.
3. Kasi Yesu wakalongora wuli kuti Yehova wakutemwa ŵanthu ŵake?
3 Yehova wakuzirwiska comene awo ŵakumusopa. Yesu wakakhozgera fundo iyi apo wakati: “Asi mpheta zinkhondi zikuguliskika tumanjawala tuŵiri twakuzirwa pacoko? Ndipouli, palije yimoza ya izo iyo yikuluwika panthazi pa Ciuta. Kweni nanga ni masisi gha mitu yinu ghose ghali kupendeka. Kopa cara; imwe muli ŵakuzirwa comene kuluska mpheta zinandi.” (Luka 12:6, 7) Kwizira mwa nchimi Yeremiya, Yehova wakaphalira ŵanthu ŵake kuti: “Ndakutemwa iwe na kutemwa kwa muyirayira; ntheura ndalutilira na cisungusungu kwa iwe.”—Yer. 31:3.
4. Cifukwa wuli tikwenera kugomezga malayizgo gha Yehova?
4 Tingapembuzgika comene mu nyengo za suzgo usange tikugomezga Yehova kweniso kuti ivyo walayizga vifiskikenge. Ntheura, tikwenera kugomezga Ciuta nga umo Joshua wakacitira, uyo wakati: “Palive kutondeka kanthu pa viwemi vyose ivyo Yehova Ciuta winu wakayowoya namwe; vyose vyafiskika kwa imwe, palive cinthu cimoza ca ivyo catondeka.” (Josh. 23:14) Nakuti tingagomezga kuti nanga tingayuzgika kwa nyengo yicoko waka na masuzgo, “Ciuta ngwakugomezgeka” ndipo wazamuŵajoworapo yayi ŵateŵeti ŵake ŵakugomezgeka.—Ŵazgani 1 Ŵakorinte 10:13.
5. Kasi tingasanguluska wuli ŵanji?
5 Mpositole Paulosi wakati Yehova ni “Ciuta wa cisangulusko cose.” Lizgu lakuti “kusanguluska” likung’anamura kupembuzga munthu uyo wali na suzgo panji citima. Para munthu wapembuzgika citima cake cikucepako ndipo wakuŵa wakukondwa. Yehova ndiyo musanguluski mukuru. (Ŵazgani 2 Ŵakorinte 1:3, 4.) Palije ico cingatondeska Adada ŵithu ŵa kucanya kupembuzga awo ŵakuŵatemwa, cifukwa iwo ndiwo ŵali na mazaza pa vyose. Nase tikwenera kusanguluska Ŵakhristu ŵanyithu “awo ŵali mu suzgo ya mtundu uliwose.” Tingacita nthena “kwizira mu cisangulusko ico ise taŵene tikusanguluskika naco na Ciuta.” Mazgu agha ghakulongora kuti palije uyo wangatisanguluska makora kuluska Yehova.
Ivyo Vikwambiska Masuzgo
6. Yowoyani vinthu ivyo vikwambiska masuzgo.
6 Tikukhumbikwira kupembuzgika mu vinandi. Cinthu cikuru ico cikutipa citima comene ni nyifwa ya munthu uyo tikumutemwa, comenecomene ya munyithu wa mu nthengwa panji mwana. Munthu wangakhumbikwiraso cisangulusko para ŵanji ŵakumutinkha. Ŵanji ŵakukhumbikwira cisangulusko cifukwa ca ulwari, ucekuru, ukavu, masuzgo gha mu nthengwa, panji cifukwa ca ivyo vikucitika mu caru.
7. (a) Kasi tikukhumbikwira vici para takumana na suzgo? (b) Kasi Yehova wangacita wuli kuti wacizge mtima “wakuphyoka” na wakuvikitika?
7 Masuzgo ghakukhwaska mtima withu, maghanoghano ghithu, umo tikujiwonera, ndiposo umoyo withu wakuthupi na wauzimu. Mwaciyelezgero, wonani ivyo mazgu gha Ciuta ghakuyowoya vyakukhwaskana na mtima. Baibolo likuti mtima withu ‘ungaphyoka’ na kuvikitika. (Sal. 51:17) Yehova wangamazga suzgo ili, pakuti iyo “wakucizga ŵakusweka mu mtima, na kukaka makora mabamba ghawo.” (Sal. 147:3) Nanga suzgo yingaŵa yikuru wuli, Ciuta wangacizga mtima withu para wasweka cikuru tikumulomba na cipulikano cose uku tikulondezga malango ghake.—Ŵazgani 1 Yohane 3:19-22; 5:14, 15.
8. Kasi Yehova wangatovwira wuli para tili na suzgo la maghanoghano?
8 Maghanoghano ghithu ghakukhumbikwira cisangulusko cifukwa pali viyezgo vinandi ivyo vingatikwenyerezga. Viyezgo ivi tingalimbana navyo yayi patekha. Wamasalimo wakimba kuti: “Para kukweŵeka kwa mtima wane kukaŵa kukuru, visangulusko vinu vikakondwereska mzimu wane.” (Sal. 94:19) Kweniso, Paulosi wakalemba kuti: “Mungenjerwanga cara na kanthu kalikose, kweni mu vinthu vyose, mu lurombo na ŵeyelero pamoza na kuwonga, madando ghinu ghamanyikwe kwa Ciuta, ndipo mtende wa Ciuta uwo ukuluska ghanoghano lililose, usungilirenge mitima yinu na maghanoghano ghinu kwizira mwa Khristu Yesu.” (Fil. 4:6, 7) Kuŵazga Baibolo na kughanaghanirapo kungatovwira comene kuti timazge suzgo la maghanoghano.—2 Tim. 3:15-17.
9. Kasi nchivici cingatovwira kuti tileke kujiwona mwambura kwenelera?
9 Nyengo zinyake tingagongoweskeka comene mwakuti tingamba kujiwona mwambura kwenelera. Nyengo zinyake tingajiwona kuti ndise ŵambura kwenelera kucita uteŵeti unyake uwo Ciuta wakukhumba kuti ticite. Apa napo Yehova wangatovwira na kutisanguluska. Mwaciyelezgero, apo Joshua wakapika mulimo wa kulongozga Ŵaisrayeli pakulimbana na mitundu yankhongono comene, Mozesi wakaphalira Ŵaisrayeli kuti: “Muŵe ŵankhongono na kukhwima mtima, mungopanga panji kofiwa nawo, pakuti Yehova Ciuta winu ndiye wakwenda namwe, Iye ntha tiwamulekelereni, panji kumusidani.” (Dute. 31:6) Yehova wakawovwira Joshua kulongozga Ŵaisrayeli apo ŵakanjiranga mu Caru ca Layizgano na kuthereska ŵalwani ŵawo. Pambere ivi vindacitike, Yehova wakawovwiraso Mozesi pa Nyanja Yiswesi.—Ex. 14:13, 14, 29-31.
10. Kasi tingawovwirika wuli para tikwenjerwa na umoyo withu wakuthupi?
10 Masuzgo ghakukhwaskaso comene umoyo withu wakuthupi. Mbunenesko kuti kurya makora, kupumura mwakukwana, kucita maseŵera ghakukhozga thupi, na kujipwelelera vingatovwira kuti tiŵe na umoyo uwemi, kweni cakurya cauzimu ndico cingatovwira comene. Ntheura, para tikukumana na masuzgo tingacita makora kukumbuka ivyo vikacitikira Paulosi kweniso mazgu ghake ghakukhozga, ghakuti: “Tikugundizgika na visuzgo vinandinandi, kweni kuti tikufinyirizgika cara, nyengo zinyake tikuzizikika, kweni tikuwa nkhumbi cara. Tikuzikizgika, kweni kuti tikusidika cara, nanga tikutitimizgikira pasi kweni kuti tikusakazika cara.”—2 Kor. 4:8, 9; Phangano Liphya.
11. Kasi tingacita wuli para talwara mwauzimu?
11 Viyezgo vinyake vingananga comene umoyo withu wauzimu. Pa nyengo iyi napo Yehova wangatisanguluska. Baibolo likutisimikizgira kuti: “Yehova wakufighilira wose awo ŵakukhuŵara, na kuwuska awo ŵasindama.” (Sal. 145:14) Tingasanga wovwiri ku ŵalara mu mpingo para tili na suzgo lauzimu. (Yak. 5:14, 15) Kweniso nyengo zose tingakhozga cipulikano cithu para tikukumbuka umoyo wamuyirayira uwo talayizgika.—Yoh. 17:3.
Awo Ciuta Wakaŵasanguluskapo
12. Longosorani umo Yehova wakasanguluskira Abrahamu.
12 Wamasalimo wakati kwa Yehova: “Kumbukani mazgu ghinu ku muteŵeti winu, mwenemumo mwandigomezeska. Ici nchisangulusko cane mu suzgo yane kuti mazgu ghinu gha phangano linu ghanipa umoyo.” (Sal. 119:49, 50) Baibolo likutiphalira za ŵanthu ŵanandi awo Yehova wakaŵasanguluskapo. Mwaciyelezgero, Abrahamu wakwenera kuti wakasuzgika comene maghanoghano wakati wapulika kuti Yehova waparanyenge Sodomu na Gomora. Muteŵeti wakugomezgeka uyu, wakafumba Ciuta kuti: “Kasi mutimuparanye ŵakunyoloka pamoza na ŵaheni?” Yehova wakapembuzga Abrahamu mwa kumusimikizgira kuti nanga ŵarunji ŵangaŵapo 50 pera, waparanyenge yayi msumba wa Sodomu. Ndipouli, Abrahamu wakafumbaso Yehova kankhondi, kuti wuli usange mungasangika ŵanthu ŵarunji 45, 40, 30, 20, 10, kasi napo muparanyenge? Maulendo ghose agha, Yehova wakamuzgoranga mwakuzika na mwalusungu na kumusimikizgira kuti waparanyenge yayi msumba wa Sodomu. Nangauli mu misumba iyi ŵanthu ŵarunji ŵakakwananga yayi 10, kweni Yehova wakathaska Loti pamoza na ŵana ŵake ŵasungwana.—Gen. 18:22-32; 19:15, 16, 26.
13. Kasi Hana wakalongora wuli kuti wakagomezganga Yehova?
13 Hana muwoli wa Elikana, wakadokeranga comene kuŵa na mwana. Kweni wakaŵa cumba, ndipo wakakweŵekanga comene. Wakalomba kwa Yehova, ndipo Eli Musofi Mukuru wakamuphalira kuti: “Ciuta wa Israyeli wakupe ico walomba kwa Iyo.” Mazgu agha ghakamusanguluska Hana, “ndipo cisko cake ntha cikaŵaso ca citima.” (1 Sam. 1:8, 17, 18) Hana wakagomezga Yehova, ndipo vyose wakavileka mu mawoko ghake. Nangauli Hana wakamanya yayi umo Yehova wamovwilirenge, kweni wakaŵa na mtende wa mu mtima. Pamasinda Yehova wakazgora lurombo lwake. Hana wakaŵa na nthumbo, ndipo wakababa mwana mwanalume na kumuthya zina lakuti Samuyeli.—1 Sam. 1:20.
14. Cifukwa wuli Davide wakakhumbikwiranga cisangulusko, ndipo ni nkhu uko wakapenja wovwiri?
14 Munthu munyake uyo wakasanguluskikapo na Ciuta ni Davide, themba la Israyeli. Pakuti Yehova “wakulaŵiska mu mtima,” apo wakasoranga Davide kuti wazakaŵe themba la Israyeli, wakamanya kuti wakajipelekanga na mtima wose pakusopa kwaunenesko. (1 Sam. 16:7; 2 Sam. 5:10) Ndipouli, pamasinda Davide wakacita uleŵi na Batisheba, ndipo wakayezga kubisa kwananga uku mwa kukomeska mfumu wake. Davide wakati wamanya kuti kwananga kwake nkhukuru, wakalomba Yehova kuti: “Kwakuyana na cifundu cinu cakukhwima; umo uliri ukuru wa ciwuravi cinu sisitani majuvyo ghane. Mundisavye nkhanira ku ubendezi wane, munditozge ku kwananga kwane! Cifukwa nkhuzomera majuvyo ghane, kwananga kwane kuli pamaso pane nyengo yose.” (Sal. 51:1-3) Davide wakapera nadi, ndipo Yehova wakamugowokera. Ndipouli, Davide wakasangana na masuzgo cifukwa ca kwananga uko wakacita. (2 Sam. 12:9-12) Kweni muteŵeti wakujiyuyura uyu wakasanguluskika cifukwa ca lusungu lukuru ulo Yehova wakamulongora.
15. Kasi ni wovwiri wuli uwo Yehova wakapeleka kwa Yesu pambere wandafwe?
15 Apo Yesu wakaŵa pa caru capasi, wakakumana na viyezgo vinandi. Ciuta wakazomerezga kuti Yesu wayezgeke, ndipo Yesu wakalutilira kugomezgeka, nyengo zose wakakhozgeranga muwuso wa Yehova. Apo wakaŵa pafupi kupelekeka na kukomeka, Yesu wakalomba Yehova kuti: “Khumbo linu licitike, lane cara.” Pamasinda, mungelo wakawonekera kwa Yesu na kumukhozga. (Luka 22:42, 43) Ciuta wakamusanguluska Yesu, kumukhozga, na kumupa wovwiri.
16. Kasi Ciuta wangatisanguluska wuli usange ŵanji ŵakukhumba kutikoma cifukwa ca cigomezgo cithu?
16 Nanga ni para ŵanji ŵakukhumba kutikoma cifukwa cakuti ndise Ŵakhristu, Yehova watovwirenge kuti tilutilire kugomezgeka kwa iyo. Kweniso tikusanguluskika na cigomezgo ca ciwuka. Tikulindiliraso mwakunweka zuŵa ilo mulwani withu waumaliro nyifwa, “yizamumalizgika.” (1 Kor. 15:26) Yehova wazamuwuska ŵateŵeti ŵake wose ŵakugomezgeka awo ŵali kufwa kusazgaposo na ŵanthu ŵanyake. (Yoh. 5:28, 29; Mil. 24:15) Cigomezgo cakuti Yehova wazamuwuska ŵakufwa cikutisanguluska para tikutambuzgika.
17. Kasi Yehova wangatisanguluska wuli para wakutemweka withu wafwa?
17 Nchakupembuzga comene kumanya kuti ŵakutemweka ŵithu awo ŵali mu malaro ŵazamuwuskika mu caru ciphya umo muzamuŵavya masuzgo agho tikukumana nagho sono. Nakuti ŵa “mzinda ukuru” ŵali na cigomezgo ca kuzakapona apo caru ciheni ici cizamuparanyika, ndipo ŵazamuŵa na mwaŵi wakupokelera na kusambizga awo ŵazamuwuka ku ŵakufwa.—Uvu. 7:9, 10.
Kusi Kuli Mawoko Ghamuyirayira gha Ciuta
18, 19. Kasi ŵateŵeti ŵa Ciuta ŵakusanguluskika wuli para ŵakutambuzgika?
18 Mozesi wakata sumu yakukondweska, ndipo wakasimikizgira Ŵaisrayeli kuti: “Ciuta wamuyirayira ndiye ciphokwero cinu, ndipo kusi kuli mawoko ghamuyirayira.” (Dute. 33:27) Pamasinda, Samuyeli wakaphalira Ŵaisrayeli kuti: “Lekani kupatukana ku kulondezga Yehova, mumuteŵetere na mtima winu wose . . . Yehova ntha tiwasidenge ŵanthu ŵake, cifukwa zina lake ndikuru.” (1 Sam. 12:20-22) Yehova watisidengepo yayi, cikuru tikukhalilira mu kusopa kwaunenesko. Nyengo zose watovwirenge.
19 Mu nyengo zinonono izi, Yehova wakulutilira kovwira na kusanguluska ŵateŵeti ŵake. Kwa vilimika vinandi, Ŵakhristu ŵanyithu ŵanandi ŵatambuzgika na kujalirika mu majele cifukwa ca kuteŵetera Yehova. Nkhani za Ŵakhristu aŵa zikulongora kuti Yehova wakusanguluska nadi ŵateŵeti ŵake. Mwaciyelezgero, mu nyengo ya muwuso wa Soviet Union, mbali withu munyake wakajalirika mu jele kwa vilimika 23 cifukwa ca cigomezgo cake. Nangauli vikaŵa nthena, kweni pakasangika nthowa yakusangira cakurya cauzimu mwakuti wakhozgeke na kusanguluskika. Iyo wakati: “Pa vilimika vyose ivi, nasambira kugomezga Yehova na kupokera nkhongono kufuma kwa iyo.”—Ŵazgani 1 Petrosi 5:6, 7.
20. Cifukwa wuli tikugomezga kuti Yehova watisidenge yayi?
20 Kwali tisangane na suzgo wuli, nyengo zose tikwenera kukumbuka mazgu ghakusanguluska agho wamasalimo wakayowoya kuti: “Yehova ntha tiwataye ŵanthu ŵake.” (Sal. 94:14) Nangauli nase tikukhumbikwira cisangulusko, kweni tikweneraso kusanguluska ŵanji. Nga umo tizamuwonera mu nkhani yakulondezgapo, nase tingacitako mulimo wa kusanguluska awo ŵakutengera mu caru ca masuzgo ici.
Kasi Mungazgora Wuli?
• Kasi ni vinthu wuli vinyake ivyo vikwambiska masuzgo?
• Kasi Yehova wakuŵasanguluska wuli ŵateŵeti ŵake?
• Kasi nchivici cingatipembuzga para wakutemweka withu wafwa?
[Mafumbo]
[Bokosi/Vithuzithuzi pa peji 25]
UMO TINGACITIRA NA VINTHU IVYO VIKUKHWASKA . . .
▪ mtima withu Sal. 147:3; 1 Yoh. 3:19-22; 5:14, 15
▪ maghanoghano ghithu Sal. 94:19; Fil. 4:6, 7
▪ umo tikujiwonera Ex. 14:13, 14; Dute. 31:6
▪ umoyo withu wakuthupi 2 Kor. 4:8, 9
▪ umoyo withu wauzimu Sal. 145:14; Yak. 5:14, 15
