Kasi Mukupeleka Wuli Ulongozgi?

Kasi muli kupemphekapo kuti mukapeleke ulongozgi ku ŵanji? Mwaciyelezgero, kasi muli kufumbikapo mafumbo nga ni agha: ‘Kasi nicite vici? Kasi nilute ku ciphikiro ici? Kasi ninjire nchito iyi? Kasi niŵe pa cibwezi na munthu uyu na cilato cakuti tizakatorane?’

Ŵanthu ŵanyake ŵangamupemphani kuti muŵawovwire kusankha vyakucita ivyo vingakhwaska ubwezi wa pakati pa iwo na ŵanyawo, mbumba zawo, panji Yehova. Kasi ivyo muzgorenge vifumenge nkhu? Kasi mukucita wuli para mukupeleka ulongozgi ku ŵanji? Kwali ico mwafumbika nchicoko kwali nchikuru, kweni lemba la Zintharika 15:28 likuti: ‘Mtima wa murunji ukughanaghana makora mazgolero.’ Wonani umo fundo zinkhondi zakulondezgapo izi za mu Baibolo zingamovwilirani para mukupeleka ulongozgi.

1 Yimanyani Makora Nkhani.

“Uyo wazgora mazgu apo wacali wandapulikiske, mbundere na soni kwa iye.”—ZINTH. 18:13.

Kuti tipeleke ulongozgi uwemi, tikwenera kuyimanya makora nkhani ndiposo kumanya umo uyo wakupempha ulongozgi wakuyiwonera nkhani iyo. Mwaciyelezgero: Usange munthu munyake wamufumbani kuti mumulongore nthowa yiwemi iyo wangafikira ku nyumba yinu, kasi mukwenera kumanya dankha vici kuti mumovwire? Kasi mungamuphalira nthowa yiwemi iyo wakwenera kwenda pambere mundamanye apo wali? Yayi. Mwakuyana waka, kuti mupeleke ulongozgi uwemi mukwenera kumanya ‘apo munthu uyo wakupempha ulongozgi wali.’ Kasi vingaŵapo vinthu vinyake ivyo vingatitondeska kuzgora makora? Kwambura kuyimanya makora nkhani, tingapeleka ulongozgi uwo ungapangiska munthu kuti watimbanizgikirethu.—Luka 6:39.

Manyani Unandi wa Fundo Izo Wapenjerezgapo. Cingaŵaso camahara kumufumba munthu uyo wakupempha ulongozgi mafumbo agha: “Kasi ukughanaghana kuti ni fundo wuli za mu Baibolo izo ungalondezga pa nkhani iyi?” “Kasi pali uwemi wuli ndiposo uheni wuli para ucitenge panji ulekenge kucita vinthu ivi?” “Ni fundo wuli izo wapenjerezgapo kale?” “Kasi ŵanji nga ni ŵalara ŵa mpingo, ŵapapi ŵako, panji awo ukusambira nawo Baibolo, ŵakovwirapo wuli pa nkhani iyi?”

Ivyo wazgorenge vingatovwira kumanya ivyo munthu uyo wakupempha ulongozgi wacitapo kale kuti wasange zgoro. Kweniso, pakumupa ulongozgi tiwonengeso ulongozgi uwo ŵanji ŵamupapo kale. Tingamanyaso usange munthu uyo wakupenja ulongozgi wakukhumba waka mulongozgi uyo ‘wakondweskenge makutu ghake’ mwa kumuphalira vinthu ivyo wakukhumba kupulika nakale.—2 Tim. 4:3.

  2 Lekani Kucimbilira Kuzgora.

“Munthu waliyose wapulikenge luŵiro, wazikirenge pakuyowoya.”—YAK. 1:19.

Cifukwa ca kuŵa na maghanoghano ghawemi, tingawona kuti nchiwemi kumuzgora mwaluŵiro. Kweni kasi cingaŵa camahara kucita nthena, comenecomene para tikuzgora nkhani iyo tindayisande makora? Lemba la Zintharika 29:20 likuti: “Kasi ukumuwona munthu uyo wakuyowoya luŵiro mazgu? Ungamugomezga cindere kwakuluska iye.”

Ghanaghaniranipo dankha kuti muwoneseske kuti ivyo muyowoyenge ni vyakukolerana na vinjeru vyakufuma kwa Ciuta. Jifumbani kuti, ‘Kasi maghanoghano na “mzimu wa caru” uwo uli palipose mu caru, vyakhwaska ulongozgi wane?’ (1 Kor. 2:12, 13) Kumbukani kuti kuŵa waka na maghanoghano ghawemi nkhwakukwana yayi. Mpositole Petrosi wakati wamanya masuzgo agho Yesu wakumanenge nagho, wakaphalira Yesu kuti: “Mujilengere lusungu Fumu; ici cimucitikiraninge cara.” Kasi tingasambirapo vici pa ivyo Petrosi wakacita? Tikusambirapo kuti nanga munthu wangaŵa muwemi wangayowoya “maghanoghano gha Ciuta cara, kweni gha ŵanthu.” (Mat. 16:21-23) Ipo nchakuzirwa comene kuti tighanaghanenge dankha pambere tindayowoye. Nakuti, asi vinjeru vithu ni vicoko para tikuyaniska na vinjeru vya Ciuta?—Job 38:1-4; Zinth. 11:2.

3 Mwakujiyuyura Yowoyani Mazgu gha Ciuta.

“Nkhucita kanthu mwa namwene cara; kweni umo Ŵadada ŵali kunisambizgira ndimo nkhuyowoyera vinthu ivi.”—YOH. 8:28.

Kasi muyowoyenge kuti, “Niŵenge ine mphanyi . . . ”? Nanga ni para zgoro lingamanyikwirathu, kweni mungacita makora kuŵa ŵakujiyuyura nga umo Yesu wakaŵira. Wakaŵa na vinjeru vinandi ndiposo wakamanyanga makora vinthu kuluska munthu waliyose, kweni wakayowoya kuti: “Nayowoya vya namwene cara, kweni Ŵadada iwoŵene . . . ŵanipa dango pa ico nkhwenera kuphara na kuyowoya.” (Yoh. 12:49, 50) Nyengo zose ivyo Yesu wakasambizganga ndiposo ulongozgi uwo wakapelekanga ukakolerananga na khumbo la Ŵawiske.

Mwaciyelezgero, pa Luka 22:49 tikuŵazga kuti apo Yesu wakaŵa pafupi kukakika ŵasambiri ŵake ŵakamufumba usange ŵangatimbana nawo ŵanthu awo ŵakakhumbanga kukora Yesu. Msambiri yumoza wakaheta munthu na lupanga. Wonani umo nkhani yakuyana waka iyi yili kulembekera pa Mateyu 26:52-54. Nangauli pakaŵa pa nyengo yakusuzga comene, Yesu wakasanga nyengo yakudumbiskirana na msambiri wake za khumbo la Yehova. Pakuti wakamanyanga makora fundo izo zili pa Genesis 9:6 ndiposo maucimi gha pa Salmo 22 na Yesaya 53, Yesu wakapeleka ulongozgi wavinjeru uwo ukaponoska umoyo wa ŵanthu ndiposo ukakondweska Yehova.

  4 Gwiliskirani Nchito Layibulare ya Mabuku Ghithu.

“Ipo ni njani pera muzga wakugomezgeka na wakucenjera uyo fumu yake yamwimika pa ŵateŵeti ŵake ŵa pa nyumba, kuŵapa cakurya cawo pa nyengo yakwenelera?” —MAT. 24:45.

Yesu wali kusora muzga wakugomezgeka uyo wakupeleka cakurya cakuzirwa cauzimu. Para mukupeleka ulongozgi pa nkhani zakuzirwa, kasi mukupenjerezga mu mabuku ghakulongosora Baibolo?

Mu Watch Tower Publications Index na Watchtower Library a tingasanga ulongozgi unandi ndiposo wakupulikikwa makora. Mungabudiska comene para mungasurako ulongozgi wakuzirwa uwo ukusangika mu vinthu ivi. Muli nkhani zinandi izo zingawovwira munthu uyo wakupenja ulongozgi. Kasi ni luso wuli ilo muli nalo pakovwira ŵanji kupenjerezga fundo za mu Baibolo na kulondezga Mazgu gha Ciuta mu umoyo wawo? Nga umo mapu ghangawovwilira munthu kuti wamanye apo wali na kumulongozga uko wakuluta, mabuku nagho ghangawovwira munthu kuti wamanye nthowa iyo walimo ndiposo umo wangacitira kuti wakhalilire mu nthowa yakuya ku umoyo.

Ŵalara ŵanandi ŵasambizga ŵapharazgi umo ŵangasangira nkhani mwakugwiliskira nchito Index (Cilongolero ca Nkhani) panji Watchtower Library, ntheura ŵakovwira ŵabali na ŵadumbu kuti ŵagwiliskirenge nchito Malemba mu umoyo wawo. Para ŵakucita nthena ŵakovwira ŵapharazgi kuti ŵamazgenge masuzgo ghawo kweniso kuti ŵaŵe na kaluso ka kupenjerezga fundo ndiposo kuti ŵathembenge vinthu vyauzimu ivyo Yehova wakupeleka. Ntheura ‘ŵakuzgoŵezga nkhongono zawo zakamanyiro kupambaniska pakati pa cakwenelera na cakubudika.’—Heb. 5:14.

5 Lekani Kudumulira Ŵanji Vyakucita.

“Cifukwa waliyose wayeghenge katundu wake.”—GAL. 6:5.

Paumaliro munthu waliyose wakwenera kusankha yekha ulongozgi uwo wangalondezga. Tose Yehova wali kutipa wanangwa wa kusankha kulongozgeka na ulongozgi wake panji yayi. (Dute. 30:19, 20) Nkhani zinyake zikukhumbikwira fundo zinandi za mu Baibolo, ndipo munthu uyo wakupenja ulongozgi wakwenera kusankha yekha cakucita. Mwakuyana na nkhani panji msinkhu wa munthu uyo wakupempha ulongozgi, tingakhumbikwiraso kujifumba kuti, ‘Kasi nili wakwenelera kuzgora fumbo ili?’ Nkhani zinyake cingaŵa ciwemi kuzipeleka ku ŵalara ŵa mpingo panji, usange uyo wakufumba ni mwana mucoko, nkhani iyo yikwenera kuluta ku ŵapapi ŵake.

[Mazgu ghamusi]

[Bokosi/Cithuzithuzi pa peji 8]

Ivyo Mungacita pa Nyengo Yakusopera ya Mbumba

Pa Nyengo Yakusopera ya Mbumba, mwalekeraci kuti mupenjerezge mazgoro gha mafumbo agho ŵanji ŵamufumbani mwasonosono? Kasi ni nkhani wuli ndiposo fundo wuli za mu Baibolo izo mungawovwilira munthu uyo wamufumbani mafumbo ghanthena agha? Tiyelezgere kuti mubali panji mudumbu wamufumbani vyakukhwaskana na munthu uyo wakukhumba kuŵa nayo pa cibwezi kuti ŵazakatorane. Para mukugwiliskira nchito Index (Cilongolero ca Nkhani) panji Watchtower Library, cakwamba wonani nkhani izo zikukolerana comene na nkhani iyo mukukhumba. Mwaciyelezgero, mu Index (Cilongolero ca Nkhani) mungawona mazgu ghakuti “Dating” (Cibwezi) panji “Marriage” (Nthengwa). Pamanyuma wonani mwakudumura tumitu tucokotucoko twa nkhani izo. Para mukuwona mutu ukuru, wonaniso usange ŵalembapo kuti “Wonaniso” mitu iyi. Mitu iyi yingamulongorani nkhani iyo mukupenja.

[Bokosi pa peji 9]

Tikuwonga comene vyawanangwa ivyo Yehova watipa kwizira mu gulu lake cifukwa tingapeleka ndiposo kupokera ulongozgi uwemi. Lemba la Mupharazgi 12:11, likuti: “Mazgu gha ŵavinjeru ghali nga ndi vyakuconthera, ndiposo nga ndi mizumali yakukhomeka ghali mazgu ghakuwunjiskika ghakufumira ku Muliska yumoza.” Nga ni “vyakuconthera,” uto nthumakuni twakusongoka uto ŵakugwiliskira nchito pakulongozga vyakuŵeta ivyo vili mu joko, ulongozgi uwemi ungaŵovwira ŵanji kuti ŵende mu nthowa yakwenelera. “Mizumali yakukhomeka” yikovwira kuti cinthu ciŵe cakukhora. Mwakuyana waka, ŵanji ŵangasanga candulo para mungaŵapa ulongozgi uwemi. Awo mbavinjeru ŵakukondwa kughanaghanira “mazgu ghakuwunjiskika” agho ghakulongora vinjeru vya ‘Muliska wawo yumoza,’ Yehova.

Londezgani Muliska uyu para mukupeleka ulongozgi. Ni mwaŵi wapadera nadi kutegherezga na kupeleka ulongozgi wakovwira ku ŵanji. Para ulongozgi withu ukufuma mu Baibolo, uŵenge wacandulo ndiposo uwovwirenge awo tikuŵapa ulongozgi uwu.