Nkhani Yakulongosora Umoyo wa Munthu

Nakora Salu ya Muyuda kwa Vilimika 70

Nga umo Yikayowoyekera na Leonard Smith

Apo nkhaŵa muwukirano, nkhani ziŵiri za mu Baibolo zikanikondweska comene. Nangauli sono pajumpha vilimika vyakujumpha 70, kweni nicali kukumbuka nyengo iyo nkhapulikiskira makora ng’anamuro la lemba la Zekariya 8:23, ilo likuyowoya za “ŵanthu khumi” awo ŵakukora “salu ya uyo ndi Muyuda.” Ŵanthu aŵa ŵakuphalira Muyuda kuti: “Mutizomerezge tilute tose, cifukwa tapulika kuti Ciuta wali namwe.”

MUYUDA wakwimira Ŵakhristu ŵakuphakazgika, ndipo “ŵanthu khumi” ŵakwimira ŵa “mberere zinyake,” panji “ŵa gulu la Yonadabu,” nga umo ŵa mberere zinyake ŵakamanyikwiranga kumanyuma. a (Yoh. 10:16) Nati napulikiska unenesko uwu, nkhamanya kuti nkhwenera kovwira gulu la ŵakuphakazgika kuti cigomezgo cane ca umoyo wamuyirayira pa caru capasi cizakafiskike.

Ntharika ya Yesu ya “mberere” na “mbuzi,” iyo yili pa Mateyu 25:31-46, nayo yikanikondweska comene. “Mberere” zikwimira awo ŵakupokera vitumbiko mu nyengo yaumaliro cifukwa ŵakucitira viwemi ŵabali ŵakuphakazgika ŵa Khristu awo ŵacali pano pa caru capasi. Nga ni Yonadabu, apo nkhaŵa mwanici nkhayowoya mu mtima wane kuti, ‘Len, usange ukukhumba kuti Khristu wakumanyenge nga ndiwe mberere, ukwenera kukhozgera ŵabali ŵake ŵakuphakazgika, kuzomera ulongozgi wawo cifukwa Ciuta wali nawo.’ Kupulikiska fundo iyi kwanovwira kwa vilimika vyakujumpha 70.

‘KASI MALO GHANE NI NGANI’

Amama ŵakabapatizika mu 1925 mu holo yapafupi na Beteli. Holo iyi yikamanyikwanga kuti Cihema Cakuwunganamo ca mu London, ndipo ŵabali ŵa mu cigaŵa ca holo iyi ndiwo ŵakawunganangamo. Nkhababika pa Okutobala 15, 1926. Mu Malici 1940, nkhabapatizika pa ungano wa ku Dover ku England. Nkhawutemwa comene unenesko. Pakuti Amama ŵakaŵa Mkhristu wakuphakazgika, ‘salu yakwamba ya Muyuda’ iyo nkhakora yikaŵa ya amama. Panyengo iyi, adada na mulongosi wane mulara ŵakaŵa Ŵakaboni ŵa Yehova yayi. Tikawungananga na Mpingo wa Gillingham, uwo ukaŵa ca kumafumiro gha dazi kwa caru ca England, weneuwo ukaŵa na Ŵakhristu ŵanandi ŵakuphakazgika. Amama ŵakaŵa cakuwonerapo ciwemi pa nkhani ya kupharazga.

Pa ungano wa cigaŵa uwo ukacitikira mu msumba wa Leicester, mu Seputembala 1941, pakayowoyeka nkhani ya mutu wakuti “Integrity” (Kugomezgeka), iyo yikalongosora vya muwuso wa cilengiwa cose. Nkhani iyi yikaniwovwira kupulikiska kwa nyengo yakwamba kuti nase tikukhwaskika na nkhani ya muwuso ya pakati pa Yehova na Satana. Ntheura tikwenera kuŵa ku cigaŵa ca Yehova na kuŵa ŵakugomezgeka kwa iyo pakuŵa Muwusi wa Cilengiwa Cose.

Pa ungano uwu uteŵeti wa upayiniya ukadidimizgika comene, ndipo ŵawukirano ŵakaciskika kuti ŵacite uteŵeti uwu. Nkhani ya mutu wakuti “Pioneer’s Place  in the Organization” (Malo gha Ŵapayiniya mu Gulu) yikanipangiska kujifumba fumbo lakuti: ‘Kasi malo ghane ni ngani?’ Ungano uwu ukanovwira kumanya kuti nili na mulimo wakuyana na wa Yonadabu wa kovwira gulu la ŵakuphakazgika mwa kupharazga makani ghawemi na mtima wane wose. Nili kwenekura ku Leicester, nkhalemberathu fomu ya upayiniya.

UTEŴETI WA UPAYINIYA PA NYENGO YA NKHONDO

Pa Disembala 1, 1941, apo nkhaŵa na vilimika 15, nkhimikika kuŵa mupayiniya wapadera. Amama ndiwo ŵakaŵa munthu wakwamba kucita nayo upayiniya, kweni pakati pajumpha cilimika cimoza, ŵakaleka upayiniya cifukwa ca kulwaralwara. Vikati vyaŵa nthena, ofesi ya munthavi ya London yikanitumira Ron Parkin kuti titeŵeterenge lumoza. Pasono, mubali uyu wakuteŵetera mu Komiti ya Munthavi ya Puerto Rico.

Ŵakatituma mu misumba ya mumphepete mwa nyanja, wa Broadstairs na Ramsgate iyo yikaŵa mu cigaŵa ca Kent, uko tikakhalanga mu cipinda ca lenti. Ndalama yakuti ŵapayiniya ŵapadera ŵagulirenge vyakukhumbikwa pa umoyo yikaŵa mashiling’i 40 (panyengo iyo pafupifupi $8, U.S.). Para tapeleka ndalama ya lenti, tikakhalanga na ndalama zicoko comene ndipo tikamanyanga yayi uko cakurya cinyake cifumenge. Kweni Yehova wakatiwovwiranga nyengo zose.

Tikendanga pa njinga mtunda utali, kulimbana na mphepo yakufuma ku North Sea. Tikenerangaso kuzizipizga wofi wakuti ndege za nkhondo zingatiponyera mabomba, kweniso tikopanga mabomba gha German V-1 agho ghakendanga musi comene mu Kent kuti ghakaphulike mu London. Zuŵa linyake apo bomba likajumphanga pafupi na mutu wane, nkhaduka pa njinga na kuwa mu mugelo, ndipo likaphunthira pafupi comene na apo ine nkhaŵa. Nangauli vikaŵa nthena, uteŵeti withu mu Kent ukaŵa wakukondweska.

NKHAŴA “MUNYAMATA WA PA BETELI”

Amama ŵakatemwanga comene kuyowoya za uteŵeti wa pa Beteli. Iwo ŵakatemwanga kuyowoya kuti: “Nkhukhumba kuti uzakaŵe munyamata wa pa Beteli.” Aghanaghanirani waka cimwemwe ico nkhaŵa naco mu Janyuwale 1946, nati nacemeka kuti nilute ku Beteli ya ku London kuti nkhawovwire pa milimo yinyake kwa masabata ghatatu. Paumaliro wa masabata agha, Mubali Pryce Hughes, uyo wakaŵa mulaŵiliri wa munthavi wakanipempha kuti nikhalirethu pa Beteli. Masambiro agho nkhasambira pa Beteli ghanovwira umoyo wane wose.

Pakaŵa ŵabali na ŵadumbu 30 pa Beteli ya London, kweni ŵanandi ŵakaŵa ŵacinyamata. Pakaŵaso ŵabali ŵanyake ŵakuphakazgika nga ni Pryce Hughes, Edgar Clay, na John Jack Barr, uyo wakazakaŵa mu Wupu Wakulongozga. Ukaŵa mwaŵi ukuru comene kuwovwira ŵabali ŵa Khristu, kuteŵetera pakuŵa muwukirano mwakulongozgeka na “mizati” yauzimu iyi.—Gal. 2:9.

Zuŵa linyake ku Beteli, mubali munyake wakaniphalira kuti kwiza mudumbu uyo wakukhumba kuniwona. Nkhazizwa comene kuwona kuti mbamama ŵayegha cawanangwa ku woko. Ŵakati ŵanjirenge yayi mwakuti ŵaleke kunitimbanizga, kweni ŵakanipa waka cawanangwa ico ŵakaniyeghera na kuluta. Cikaŵa cakuvwara ca mphepo. Ivyo ŵakacita vikanikumbuska ivyo Hana wakacita pakuyeghera mwana wake Samuyeli munjilira apo wakateŵeteranga pa cihema.—1 Sam. 2:18, 19.

SUKULU YA GILIYADI YIKANIKONDWESKA COMENE

Mu 1947, taŵanthu ŵankhondi ise tikateŵeteranga pa Beteli, tikacemeka kuti tilute ku Sukulu ya Giliyadi ku United States, ndipo cilimika cakulondezgapo tikasambira mu kilasi la nambara 11. Ku New York,  uko kukaŵa sukulu, kukazizimanga comene pa nyengo iyo tikafikiranga. Nkhakondwa comene kuŵa na ca mphepo ico amama ŵakanipa.

Myezi yinkhondi na umoza iyo nkhaŵa ku Giliyadi njambura kuluwika. Kucezga na ŵanyane ŵakufuma mu vyaru 16 kukaniwovwira kuti niwonenge vinthu mwakwenelera. Padera pa cakurya cauzimu ico nkhasanga ku sukulu, nkhasangaso vyandulo vinandi cifukwa ca kucezga na Ŵakhristu ŵakukhwima mwauzimu. Yumoza mwa awo tikasambilira lumoza Lloyd Barry; yumoza wa ŵasambizgi ŵithu Albert Schroeder; na John Booth, uyo wakalaŵiliranga Kingdom Farm (munda uwo kukaŵa Sukulu ya Giliyadi), pamasinda ŵakazakaŵa mu Wupu Wakulongozga. Nkhuzirwiska comene ulongozgi uwemi uwo ŵabali aŵa ŵakanipa ndiposo ciyelezgero cawo ciwemi ca kugomezgeka kwa Yehova na gulu lake.

KUCITA MULIMO WA KWENDAKWENDA NA KUWELERASO KU BETELI

Nati nawerako ku Giliyadi, nkhatumika kukacita uteŵeti wa kwendakwenda ku Ohio, U.S.A. Nangauli nkhaŵa na vilimika 21, kweni ŵabali ŵakakondwanga comene na mwamphu uwo nkhalongoranga pakuŵa muwukirano. Mu dera ili, nkhasambira vinandi kufuma ku ŵabali awo ŵakamanyanga vinandi.

Pakati pajumpha myezi yicoko waka, nkhacemeka kuti nilute ku Beteli ya ku Brooklyn kuti nkhasambire masambiro ghakusazgikira. Panyengo iyi nkhaŵa na mwaŵi wa kumanya mizati nga ni Milton Henschel, Karl Klein, Nathan Knorr, T. J. (Bud) Sullivan, na Lyman Swingle. Wose aŵa pamasinda ŵakazakateŵeterapo mu Wupu Wakulongozga. Nkhakhozgeka comene kuwona ŵabali aŵa ŵakuteŵetera ndiposo kuwona umo ŵakakhaliranga pakuŵa Ŵakhristu. Cigomezgo cane mu gulu la Yehova cikakura comene. Kufuma apo, ŵakanitumaso ku Europe kuti nkhalutizge uteŵeti wane.

Amama ŵakafwa mu Febuluwale 1950. Tikati tasunga, nkhadumbiskana na adada na mudumbu wane Dora, mwambura kuŵabisa. Nkhaŵafumba ivyo ŵakaghanaghananga kucita pa nkhani ya kusambira unenesko pakuti Amama ŵakaŵa kuti ŵafwa ndipo ine nkhaŵa kuti nawukapo pa nyumba. Ŵakamumanyanga mubali wakuphakazgika, Harry Browning, ndiposo ŵakamucindikanga ndipo ŵakazomera kusambira unenesko na mubali uyu. Cilimika cikamara yayi, Adada na Dora ŵakabapatizika. Pamasinda Adada ŵakimikika kuŵa muteŵeti wa Mpingo wa Gillingham. Adada ŵati ŵafwa, Dora wakatengwa kwa mubali munyake mulara, zina lake Roy Moreton, ndipo wakateŵetera Yehova mwakugomezgeka mpaka mu 2010, cilimika ico wakafwira.

KOVWIRA MU FRANCE

Ku sukulu nkhasambira Cifurenci, Cijeremani, na Cilatini, ndipo pa viyowoyero ivi, Cifurenci ndico cikanisuzganga comene. Ntheura apo ŵakanipemphanga kuti nkhawovwire ku Beteli ya ku Paris, France, nkhakondwa kweniso nkhafipanga mtima. Ku France, nkhaŵa na mwaŵi wa kuteŵetera na Henri Geiger, mubali mucekuru wakuphakazgika uyo wakaŵa mulaŵiliri wa munthavi. Ni nyengo zose yayi apo uteŵeti wa ku France ukaŵanga upusu, nkhabudiskanga vinthu vinandi, kweni nkhasambira vinandi pa umo ŵanthu ŵakukhalira.

Kweniso, nkhaŵa yumoza wa awo ŵakanozga ungano wa mitundu yose wakwamba pamanyuma pa nkhondo mu Paris, uwo ukacitika mu 1951. Mulaŵiliri wakwendakwenda waciwukirano, Léopold Jontès, wakiza ku Beteli kuzakanovwira. Pamanyuma, Léopold wakasoleka kuŵa mulaŵiliri wa munthavi. Ungano uwu ukacitikira ku Palais des sports pafupi na Eiffel Tower. Ŵanthu awo ŵakiza ŵakafuma mu vyaru 28. Pa zuŵa laumaliro Ŵakaboni 6,000 ŵa ku France ŵakakondwa comene kuwona ŵanthu 10,456 awo ŵakiza pa ungano.

 Apo nkhafikiranga ku France, Cifurenci cikaŵa kuti cicali kunisuzga comene. Ico nkhananganga nchakuti nkhayowoyanga pekha para nasimikizga kuti ivyo niyowoyenge ni vyaunenesko nadi. Kweni para wamunthu ukuleka kubudiska, ŵanyako ŵangakusambizgako yayi ndipo ukumanya vinandi yayi.

Kuti nimarane na suzgo ili nkhawona kuti nchiwemi kuti ninjire sukulu yakusambizga ŵalendo Cifurenci. Nkhalutanga ku sukulu namise para kulije maungano. Nkhamba kucitemwa comene Cifurenci, ndipo sono nicali kucitemwa. Ici cawovwira comene cifukwa nkhuwovwira munthavi wa France pa mulimo wa kung’anamura mabuku. Nyengo yikati yajumphapo, nkhaŵa mung’anamuri wakukwana ndipo nkhang’anamuranga kufuma ku Cingelezi kuya mu Cifurenci. Ukaŵa mwaŵi wapadera comene kuwovwira ŵabali awo ŵakayowoyanga Cifurenci pa caru cose capasi kuti ŵapokere cakurya cauzimu cakufuma kwa muzga.—Mat. 24:45-47.

KUTORA NDIPOSO MAUTEŴETI GHANYAKE

Mu 1956, nkhatora Esther, mupayiniya wakufuma ku Switzerland uyo tikakumana vilimika vicoko waka kumanyuma. Ukwati withu ukacitikira mu Nyumba ya Ufumu yapafupi na Beteli ya London (Cihema Cakuwunganamo ca mu London, ico amama ŵakabapatizikiramo). Mubali Hughes ndiyo wakayowoya nkhani ya ukwati withu. Amama ŵa Esther ŵakaŵapo pa ukwati ndipo nawo ŵakaŵa ŵakuphakazgika. Nkhasanga munyane wakutemweka ndiposo wakugomezgeka, kweniso nkhaŵa na nyengo yinandi yakucezgera na amamavyara awo ŵakatemwanga comene vinthu vyauzimu mpaka pa nyengo iyo ŵakamalizgira uteŵeti wawo wa pa caru capasi mu cilimika ca 2000.

Pamasinda pa ukwati withu, ine na Esther tikakhalanga kuwaro kwa Beteli. Ine nkhalutilira kucita uteŵeti wa kung’anamura mabuku pa Beteli, Esther wakacitanga upayiniya wapadera mu makomboni gha mu Paris. Wakawovwira ŵanthu ŵanandi kuŵa ŵateŵeti ŵa Yehova. Mu 1964 tikacemeka kuti tikakhalenge pa Beteli. Kufuma apo, mu 1976, apo Makomiti gha Munthavi ghakambira kupangika, nane nkhasankhika kuŵa mu Komiti ya Munthavi. Kufuma waka apo tikatolerana, Esther wanovwira comene.

“MUŴENGE NANE NYENGO ZOSE CARA”

Nyengo na nyengo nkhaŵanga na mwaŵi wa kuluta ku ofesi yikuru ya Ŵakaboni ŵa Yehova ku New York. Pa maulendo agha nkhapokeranga ulongozgi uwemi wakufuma ku ŵabali ŵa mu Wupu Wakulongozga. Mwaciyelezgero, zuŵa linyake nkhafipanga mtima kuti nicedwenge kumalizga mulimo unyake. Mubali Knorr wakamwemwetera na kuyowoya kuti: “Kufipa mtima yayi. Iwe gwira waka nchito.” Kufuma waka apa, para mulimo ngunandi, m’malo mwa kufipa mtima, nkhugwira waka nchito mpaka yimare, ndipo kanandi yikumara pa nyengo yakwenelera.

Pambere wandafwe, Yesu wakaphalira ŵasambiri ŵake kuti: “Muŵenge nane nyengo zose cara.” (Mat. 26:11) Ise taŵamberere zinyake tikumanya kuti ŵabali ŵa Khristu ŵakuphakazgika tiŵenge nawo nyengo zose yayi pano pa caru capasi. Ntheura, nkhuwona kuti ni mwaŵi ukuru comene kuti nateŵetera na ŵakuphakazgika ŵanandi kwa vilimika 70. Nadi, na mtima wakuwonga nakora salu ya Muyuda.

[Mazgu ghamusi]

[Mazgu Ghakukhozgera pa peji 21]

Mubali Knorr wakamwemwetera na kuyowoya kuti: “Kufipa mtima yayi. Iwe gwira waka nchito”

[Vithuzithuzi pa peji 19]

(Kumazere) Amama na adada

(Kumalyero) Ku Sukulu ya Giliyadi mu 1948, navwara ca mphepo ico Amama ŵakanipa

[Cithuzithuzi pa peji 20]

Kung’anamulira nkhani ya Mubali Lloyd Barry pakupatulira ofesi ya munthavi ya ku France, mu 1997

[Vithuzithuzi pa peji 21]

(Kumazere) Ine na Esther pa ukwati withu

(Kumalyero) Lumoza mu mulimo wa kupharazga