Mafumbo Ghakufumira ku Ŵaŵazgi

Kasi mazgu ghakuti “mu maso gha Yehova nyifwa ya ŵatuŵa ŵake njakuzirwa,” ghakung’anamuraci?

▪ Wamasalimo wakimba kuti: “Mu maso gha Yehova nyifwa ya ŵatuŵa ŵake njakuzirwa.” (Sal. 116:15) Yehova wakuzirwiska comene umoyo wa muteŵeti wake waliyose wakugomezgeka. Ndipouli, mazgu agha, agho ghali kulembeka mu Salmo 116 ghakuyowoya za nyifwa ya munthu yumoza yayi.

Pakuyowoya nkhani ya nyifwa ya Mkhristu, nchakwenelera yayi kuyowoya kuti lemba la Salmo 116:15 likuyowoya za munthu uyo wafwa, nanga vingaŵa kuti wakaŵa muteŵeti wakugomezgeka wa Yehova. Cifukwa wuli? Cifukwa mazgu gha wamasalimo agha ghakung’anamura vinandi. Ghakung’anamura kuti Ciuta wazomerezgenge yayi kuti ŵanthu ŵake wose ŵakugomezgeka ŵafwe.—Wonani Salmo 72:14; 116:8.

Lemba la Salmo 116:15 likutisimikizgira kuti Yehova wazomerezgenge yayi kuti ŵateŵeti ŵake ŵakugomezgeka wose ŵafwe pa caru capasi. Nakuti mdauko withu ukulongora kuti tazizipizga kale masuzgo ghakuru na nthambuzgo, ndipo ivi mbukaboni wakuti Ciuta wazomerezgenge yayi kuti tose tikomeke.

Yehova wazomerezgenge yayi kuti tose tiparanyike cifukwa cakuti wali na nkhongono zambura cigoti ndiposo cifukwa cakuti khumbo lake likutondeka cara. Usange Ciuta wangazomerezga ici, vingalongora nga kuti ŵalwani ŵake mbankhongono comene kuluska iyo. Kweni ici nchambura macitiko. Khumbo la Yehova lakuti caru cose capasi cizure na ŵanthu ŵakugomezgeka lifiskikenge nadi. (Yes. 45:18; 55:10, 11) Uteŵeti wakupatulika kwa Yehova ungamara mu mabwalo gha pa caru capasi gha tempile lake likuru lauzimu usange ŵanthu ŵake wose ŵangakomeka. Kweniso mphanyi panguŵavya ŵanthu ŵakuti ŵapange “caru ciphya,” awo mbanthu ŵakugomezgeka, ŵeneawo ŵazamukhala pa caru capasi na kuwusika na “kucanya kuphya.” (Uvu. 21:1) Cinyake nchakuti, Muwuso wa Khristu wa Vilimika Cikwi ungafiskika yayi para pa caru capasi pangaŵavya ŵanthu.—Uvu. 20:4, 5.

Ŵanthu ŵangakayikira kuti Ciuta waliko usange wangazomerezga kuti ŵalwani ŵake ŵakome ŵanthu ŵake wose pa caru capasi. Para wangazomerezga kuti ŵalwani ŵake ŵakome gulu lake pa caru capasi, mbwenu ŵanthu ŵakayikirenge kuti Yehova ni Muwusi wa Cilengiwa cose. Kweniso, cifukwa ca zina lake lituŵa, Yehova wazomerezgenge yayi kuti ŵanthu ŵake wose ŵakugomezgeka ŵakomeke. Wonaniso fundo iyi: Pakuti Ciuta ‘ngwambura kwananga,’ watondekenge yayi kusungilira gulu la ŵanthu ŵake ilo likumuteŵetera mwakugomezgeka. (Dute. 32:4; Gen. 18:25) Kweniso, usange Ciuta wangazomerezga kuti ŵateŵeti ŵake wose ŵakomeke vingapambana comene na Mazgu ghake, agho ghakuti: “Yehova ntha tiwasidenge ŵanthu ŵake, cifukwa zina lake ndikuru.” (1 Sam. 12:22) Nadi, “Yehova ntha tiwataye ŵanthu ŵake; nesi kucisida ciharo cake.”—Sal. 94:14.

Nchakupembuzga nadi kumanya kuti ŵanthu ŵa Yehova ŵamalenge yayi pa caru capasi. Ntheura, mulimose umo vingaŵira, tiyeni nyengo zose tiŵe ŵakugomezgeka kwa Ciuta, na kugomezga layizgo lake lakuti: “Palije homwa ilo lafulikira iwe tilisakate, ndipo lulimi lose ilo tiluwukire iwe mu kweruzga tiwulususkenge. Ici nchiharo ca ŵateŵeti ŵa Yehova na urunji wawo ukufuma kwa ine.”​—Yes. 54:17.

[Mazgu Ghakukhozgera pa peji 22]

Ciuta wazomerezgenge yayi kuti ŵanthu ŵake wose ŵakomeke