Lutilirani Kuŵa Ŵenekaya ŵa Ufumu
Lutilirani Kuŵa Ŵenekaya ŵa Ufumu
“Mukhalenge mwakwenelera makani ghawemi.”—FIL. 1:27.
KASI MUNGAZGORA WULI?
Kasi mbanjani awo ŵangaŵa ŵenekaya ŵa Ufumu?
Kasi tikukhumbikwira kucita vici pa nkhani ya ciyowoyero, mdauko, na malango gha Ufumu?
Kasi ŵenekaya ŵa Ufumu ŵakulongora wuli kuti ŵakutemwa malango gha Ciuta?
1, 2. Cifukwa wuli ulongozgi wa Paulosi ku mpingo wa ku Filipi uli na ng’anamuro lapadera?
MPOSITOLE Paulosi wakaciska mpingo wa ku Filipi kuti ‘ukhalenge mwakwenelera makani ghawemi.’ (Ŵazgani Ŵafilipi 1:27.) Lizgu la Cigiriki ilo Paulosi wakalemba apa, ilo lili kung’anamulika kuti “mukhalenge,” lingang’anamulikaso kuti “lutilirani kuŵa ŵenekaya.” Mazgu agha ghakaŵa na ng’anamuro lapadera ku mpingo wa ku Filipi. Cifukwa wuli? Cifukwa vikuwoneka kuti Filipi ukaŵa umoza mwa misumba iyo yikasoleka, yeneiyo ŵanthu awo ŵakakhalangamo ŵakapikanga wenekaya wa Romu. Ŵenekaya ŵa Romu mu Filipi na mu Ufumu wa Romu wose ŵakanothanga cifukwa ca wenekaya uwu ndipo ŵakavikilirikanga mwapadera na dango la Romu.
2 Ŵanthu ŵa mu mpingo wa ku Filipi ŵakaŵa na cifukwa cikuru cakunothera. Paulosi wakaŵakumbuska kuti pakuŵa Ŵakhristu ŵakuphakazgika wenekaya wawo “uli kucanya.” (Fil. 3:20) Ŵakaŵa ŵenekaya ŵa ufumu wa ŵanthu yayi, kweni ŵa Ufumu wa Ciuta. Pa cifukwa ici, ŵakaŵa ŵakuvikilirika comene ndiposo ŵakasanganga vyandulo vinandi kuluska vyose ivyo vikaŵako.—Efe. 2:19-22.
3. (a) Kasi mbanjani awo ŵali na mwaŵi wa kuŵa ŵenekaya ŵa Ufumu? (b) Kasi mu nkhani iyi tidumbiskanenge vici?
3 Ulongozgi wa Paulosi wakuti “lutilirani kuŵa ŵenekaya” comene ngwa awo ŵamuwusa na Khristu kucanya. (Fil. 3:20) Kweni ukugwiraso nchito ku awo ŵazamukhala pa caru capasi ŵeneawo ŵazamuwusika na Ufumu wa Ciuta. Cifukwa wuli? Cifukwa cakuti Ŵakhristu wose ŵakujipatulira ŵakuteŵetera Themba limoza, Yehova, ndipo ŵakwenera kulondezga malango ghamoza. (Efe. 4:4-6) Mazuŵa ghano, ŵanthu ŵakufwilirapo kuti ŵaŵe ŵakwenelera kuŵa ŵenekaya ŵa caru cisambazi. Ipo ise tikwenera kuzirwiska comene mwaŵi wa kuŵa ŵenekaya ŵa Ufumu. Kuti tilutilire kuzirwiska mwaŵi uwu, tiyeni tiwone kuyana uko kulipo pakati pa ivyo vikukhumbikwa kuti munthu waŵe mwenekaya wa boma la ŵanthu na ivyo vikukhumbikwa kuti waŵe mwenekaya wa Ufumu wa Ciuta. Pamanyuma tisandenge vinthu vitatu ivyo tikwenera kucita usange tikukhumba kulutilira kuŵa ŵenekaya ŵa Ufumu.
IVYO VIKUKHUMBIKWA KUTI MUNTHU WAŴE MWENEKAYA
4. Kasi ciyowoyero cituŵa ni vici, ndipo tikuciyowoya wuli?
4 Sambirani ciyowoyero. Maboma ghanyake gha ŵanthu ghakukhumba kuti ŵanthu awo ŵakukhumba kuŵa ŵenekaya ŵawo ŵayowoyenge ciyowoyero ca mu caru ico. Nanga ŵangapika wenekaya, ŵanthu ŵanyake ŵakufwilirapo kwa vyaka vinandi kuti ŵamanyisiske ciyowoyero ciphya. Ŵangasambira luŵiro malango gha ciyowoyero kweni pangatora nyengo kuti ŵamanye kuzunura makora mazgu. Mwakuyana waka, awo ŵakukhumba kuŵa ŵenekaya ŵa Ufumu wa Ciuta ŵakwenera kusambira ico Baibolo likucicema kuti ‘ciyowoyero cituŵa.’ (Ŵazgani Zefaniya 3:9.) Kasi ciyowoyero ici ni vici? Ni unenesko wakuyowoya za Ciuta na khumbo lake uwo uli mu Baibolo. ‘Tikuyowoya’ ciyowoyero cituŵa para nkharo yithu yikukolerana na malango gha Ciuta na fundo zake. Ŵenekaya ŵa Ufumu wa Ciuta ŵangasambira luŵiro visambizgo vyakwambilira vya mu Baibolo na kubapatizika. Ndipouli, nanga pangaŵa pamanyuma pakuti ŵabapatizika ŵakwenera kufwilirapo kuti ‘ŵayowoyenge’ ciyowoyero cituŵa mwakupulikikwa makora. Mu nthowa wuli? Waliyose wa ise wakukhumbikwira kufwilirapo kulondezga ivyo wakusambira mu Baibolo pa umoyo wake.
5. Cifukwa wuli tikwenera kusambira vyose ivyo tingafiska vyakukhwaskana na mdauko wa gulu la Yehova?
5 Sambirani mdauko. Munthu uyo wakukhumba kuŵa mwenekaya wa boma la ŵanthu wakwenera kusambira vinthu vinyake vyakukhwaskana na mdauko wa boma ilo. Mwakuyana waka, awo ŵakukhumba kuŵa ŵenekaya ŵa Ufumu ŵakwenera kusambira vyose ivyo ŵangafiska vyakukhwaskana na Ufumu wa Ciuta. Wonani ivyo ŵakacita ŵana ŵa Kora, ŵateŵeti ŵa mu nyengo ya Ŵaisrayeli. Ŵakawutemwanga comene msumba wa Yerusalemu na malo ghake ghakusoperapo ndipo ŵakatemwanga kuyowoya mdauko wa msumba uwu. Ivyo vikaŵakondweskanga comene ghakaŵa malibwe na dongo yayi kweni ni ivyo msumba na malo ghakusoperapo agha vikimiranga. Yerusalemu ukaŵa “msumba wa Themba likuru,” Yehova, cifukwa ukaŵa cinyina ca kusopa kwaunenesko. Ku malo agha ndiko ŵanthu ŵakasambizgikanga Dango la Yehova. Yehova wakalongoranga lusungu lwake ku ŵanthu awo ŵakawusikanga na Themba la Yerusalemu. (Ŵazgani Salmo 48:1, 2, 9, 12, 13.) Nga ni ŵana ŵa Kora, kasi namwe muli na khumbo la kusambira na kuyowoya mdauko wa cigaŵa ca pa caru capasi ca gulu la Yehova? Para mukusambira vinandi vyakukhwaskana na gulu la Ciuta ndiposo umo Yehova wakovwilira ŵanthu ŵake, ndipo Ufumu wa Ciuta ukuŵa wanadi comene kwa imwe. Khumbo linu la kupharazga makani ghawemi gha Ufumu likurenge comene.—Yer. 9:24; Luka 4:43.
6. Cifukwa wuli nchakwenelera kuti Yehova wakukhumba kuti tisambire na kupulikira malango na fundo za Ufumu?
6 Manyani malango. Maboma gha ŵanthu ghakukhumba kuti ŵanthu ŵawo ŵamanyenge na kupulikira malango gha caru cawo. Ipo nchakwenelera kuti Yehova wakulindizga kuti ise timanye na kupulikira malango ndiposo fundo izo zikulongozga ŵenekaya wose ŵa Ufumu. (Yes. 2:3; Yoh. 15:10; 1 Yoh. 5:3) Kanandi malango gha ŵanthu ghakuŵa ghakubudika ndiposo ghambura urunji. Kweni “dango la Yehova ndiwemi lakufikapo.” (Sal. 19:7) Kasi tikughatemwa malango gha Ciuta na kuŵazga Mazgu ghake zuŵa lililose? (Sal. 1:1, 2) Nthowa yimoza pera iyo tingamanyira malango gha Ciuta nkhughasambira tekha. Palije uyo wangaticitira ici.
ŴENEKAYA ŴA UFUMU ŴAKUTEMWA MALANGO GHA CIUTA
7. Kasi ŵenekaya ŵa Ufumu ŵakucita wuli pa nkhani ya malango?
7 Kuti tilutilire kuŵa ŵenekaya ŵa Ufumu, tikwenera kumanya malango gha Ciuta kweniso kughatemwa. Ŵenekaya ŵanandi ŵa maboma gha ŵanthu ŵakuyowoya kuti ŵakukolerana na malango ndiposo fundo za mu caru ico ŵakukhala. Kweni, para ŵawona kuti dango linyake ndakusuzga ndipo palije uyo wakuŵawona, ŵakuswa dango ilo. Kanandi ŵanthu aŵa “mbakukondweska ŵanthu.” (Kol. 3:22) Ŵenekaya ŵa Ufumu ŵakupulikira malango. Tikuŵa ŵakukondwa kulondezga malango gha Ciuta, nanga ni para ŵanthu ŵanyake ŵakuleka kutiwona. Cifukwa wuli? Cifukwa tikumutemwa uyo wali kupeleka malango.—Yes. 33:22; ŵazgani Luka 10:27.
8, 9. Kasi mungamanya wuli usange mukutemwa nadi malango gha Ciuta?
8 Kasi mungamanya wuli usange mukutemwa nadi malango gha Ciuta? Jisandani pa umo mukucitira para mwapokera ulongozgi pa nkhani iyo mukuwona kuti yikuŵakhwaska yayi ŵanji. Mwaciyelezgero, pa nkhani ya kavwaliro na kujitozga. Pambere mundaŵe mwenekaya wa Ufumu, nyengo zinyake mukatemwanga kuvwara mwambura kwenelera panji mwakukhuŵazga ŵanji. Apo mukamba kumutemwa comene Ciuta, mukasambira kuvwara mu nthowa iyo yikumucindika. (1 Tim. 2:9, 10; 1 Pet. 3:3, 4) Mungawona kuti sono mukuvwara mwanchindi. Kweni wuli usange mulara wangamuphalirani kuti kavwaliro kinu kakukhuŵazga ŵapharazgi ŵanandi mu mpingo? Kasi mungacita wuli? Kasi mujikhalirenge khonde, mukwiyenge, panji kuŵa ŵamudundwe? Limoza mwa malango ghakuzirwa comene agho ŵenekaya ŵa Ufumu wa Ciuta ŵakwenera kupulikira nda kulondezga Khristu. (1 Pet. 2:21) Pakuyowoya za ciyelezgero ca Yesu, mpositole Paulosi wakalemba kuti: “Waliyose wa ise wakondweske mzengezgani wake mu ico nchiwemi kuti wamuzenge. Cifukwa nanga ni Khristu wakajikondweska iyomwene cara.” (Rom. 15:2, 3) Pakuti wakukhumba kuti mu mpingo mulutilire kuŵa mtende, Mkhristu wakukhwima wakukhuŵazga yayi njuŵi za ŵanji.—Rom. 14:19-21.
9 Wonani nkhani zakuzirwa izo tikwenera kughanaghanirapo: umo tikuwonera kugonana na umo tikuwonera nthengwa. Awo pasono mbenekaya ŵa Ufumu wa Ciuta yayi ŵangawona kuti nchiwemi waka kuti ŵanalume na ŵanakazi ŵekhaŵekha ŵatoranenge, ŵangawona kuti nchiwemi waka kuwonelera vithuzithuzi vyamuziro, ndiposo ŵangaghanaghana kuti munthu wakwenera kusankha yekha kucita uleŵi na kupata munyake wa mu nthengwa panji yayi. Ŵenekaya ŵa Ufumu ŵazileka nkharo izi, zeneizo zikulongora kuti munthu wakujighanaghanira yekha. Nangauli ŵanandi ŵakatemwanga kucita uzaghali pambere ŵandaŵe Ŵakhristu, kweni sono ŵakuwona kuti kugonana ndiposo nthengwa ni vyawanangwa vyakufuma kwa Ciuta. Ŵakuzirwiska malango ghapacanya gha Yehova ndipo na mtima wose ŵakuzomera kuti awo ŵakulutilira kugonana mwambura kwenelera mbambura kwenelera kuŵa ŵenekaya ŵa Ufumu. (1 Kor. 6:9-11) Kweniso, ŵakumanya kuti mtima ngwakupusika. (Yer. 17:9) Ntheura ŵakuzirwiska macenjezgo agho ŵakupokera kuti ghaŵawovwire kulutilira kuŵa na mikhaliro yapacanya.
ŴENEKAYA ŴA UFUMU ŴAKUPULIKIRA MACENJEZGO
10, 11. Kasi ni macenjezgo wuli gha panyengo yake agho Ufumu wa Ciuta ukupeleka, ndipo mukughawona wuli?
10 Maboma gha ŵanthu nyengo zinyake ghangapeleka macenjezgo pa nkhani ya vyakurya na minkhwala. Mbunenesko kuti ni vyakurya vyose yayi nesi minkhwala iyo njiheni. Kweni usange cakurya cinyake nchiwemi yayi, boma lingapeleka macenjezgo kuti livikilire ŵenekaya ŵake. Usange boma lingaleka kucenjezga, lingaŵa na mulandu wa kulekelera vinthu. Mwakuyana waka, Ufumu wa Ciuta ukupeleka macenjezgo ghapanyengo yake ghakukhwaskana na vinthu ivyo vingananga umoyo withu wauzimu. Mwaciyelezgero, Intaneti njakovwira comene pa kuyowoyeskana, masambiro, na vyakusanguluska. Gulu la Yehova likugwiliskira nchito Intaneti ndipo likufiska vinthu vinandi viwemi. Ndipouli, mawebusayiti ghanandi pa Intaneti ngawemi yayi ndipo ghangananga mikhaliro yiwemi na umoyo wauzimu. Mawebusayiti agho ghakulongora vithuzithuzi vyamuziro ghangananga umoyo wauzimu wa ŵenekaya ŵa Ufumu. Kwa vyaka vinandi, gulu la muzga wakugomezgeka likuticenjezga vya mawebusayiti agha. Tikuwonga comene cifukwa ca kutipa macenjezgo agha.
11 Mu vyaka vyasonosono, paŵa mawebusayiti ghanyake agho ghazara comene. Ngakovwira usange munthu waghagwiliskira nchito mwamahara. Kweni mawebusayiti agha, gheneagho ghakumanyikwa kuti malo ghakucezgerapo gha pa Intaneti, ghaliso na uheni wake. Ghangapangiska munthu kuti wambe kucezga na ŵanthu ŵaheni. (1 Kor. 15:33) Lekani gulu la Ciuta likuticenjezgerathu vya mawebusayiti agha. Kasi muli kuŵazga nkhani zasonosono zakulembeka na muzga wakugomezgeka zakukhwaskana na kugwiliskira nchito malo ghakucezgerapo gha pa Intaneti? Cingaŵa cambura mahara kugwiliskira nchito mawebusayiti agha kwambura kuŵazga dankha nkhani izi. a Vingayana waka na kumwa munkhwala wankhongono kwambura kuŵazga cenjezgo ilo ŵalemba pa botolo.
12. Cifukwa wuli mbucindere kusulako macenjezgo?
12 Awo ŵakusulako macenjezgo agho muzga wakugomezgeka wakupeleka ŵakujipweteka ŵekha na ŵakutemweka ŵawo. Ŵanyake ŵali na cizgoŵi ca kuwonelera vithuzithuzi vyamuziro panji ŵacita uzaghali ndipo ŵakughanaghana kuti Yehova wangaviwona yayi ivyo ŵakucita. Mbucindere comene kughanaghana kuti tingabisa nkharo yithu kwa Yehova. (Zinth. 15:3; ŵazgani Ŵahebere 4:13.) Ciuta wakukhumba kovwira ŵanthu ŵa nthena aŵa ndipo wakuciska awo ŵakumwimira pa caru capasi kuti ŵaŵawovwire. (Gal. 6:1) Ndipouli, nga umo maboma gha ŵanthu ghangapokera wenekaya kwa munthu uyo waswa malango, Yehova nayo wapokenge wenekaya ku awo ŵakuswa malango ghake kwambura kupera. b (1 Kor. 5:11-13) Kweni iyo ngwalusungu. Awo ŵapera na kusintha nkharo zawo ŵangaŵaso paubwezi na Yehova na kulutilira kuŵa ŵenekaya ŵa Ufumu. (2 Kor. 2:5-8) Ni mwaŵi wapadera comene kuteŵetera Themba lacitemwa ili.
ŴENEKAYA ŴA UFUMU ŴAKUZIRWISKA MASAMBIRO
13. Kasi ŵenekaya ŵa Ufumu ŵakulongora wuli kuti ŵakuzirwiska masambiro?
13 Maboma ghanandi gha ŵanthu ghakufwilirapo kusambizga ŵenekaya ŵawo. Ghakuzenga masukulu kuti ghasambizgenge ŵanthu kuŵazga na kulemba ndiposo kuŵasambizga nchito. Ŵenekaya ŵa Ufumu ŵakuzirwiska sukulu izi ndipo ŵakufwilirapo kusambira kuŵazga, kulemba, na kusanga ŵekha ndalama zakujiwovwilira. Ŵakuzirwiska comene masambiro agho ŵakupokera pakuŵa ŵenekaya ŵa Ufumu wa Ciuta. Kwizira mu mpingo waunenesko, Yehova wakovwira ŵanthu kusambira kuŵazga na kulemba. Ŵapapi ŵakuciskika kuti ŵaŵazgirenge ŵana ŵawo mabuku. Mwezi uliwose, muzga wakugomezgeka wakulemba mapeji ghanandi gha nkhani zakulongosora Baibolo izo zikuŵa mu Gongwe la Mulinda na Galamukani! Para mukuŵazga mapeji ghacoko waka zuŵa lililose, musambirenge masambiro ghakuzirwa gha Ufumu.
14. (a) Kasi ni masambiro wuli agho tili nagho? (b) Kasi ni masacizgo wuli gha Nyengo Yakusopera ya Mbumba agho muli kulondezgapo?
14 Sabata yiliyose, ŵenekaya ŵa Ufumu ŵakusambizgika pa maungano gha mpingo. Mwaciyelezgero, Sukulu ya Uteŵeti wa Ciuta yawovwira ŵasambiri kwa vyaka vyakujumpha 60 kuti ŵasambizgenge makora Mazgu gha Ciuta. Kasi imwe muli kulembeska zina linu mu sukulu iyi? Mu vyaka vyasonosono muzga wakugomezgeka waticiska comene kuti tiŵenge na Nyengo Yakusopera ya Mbumba. Ndondomeko iyi yikukhozga comene mbumba. Kasi muli kuyezgapo kulondezga masacizgo agho ghali mu mabuku ghithu? c
15. Kasi ni mwaŵi wuli ukuru comene uwo tili nawo?
15 Ŵenekaya ŵanandi ŵa maboma gha ŵanthu ŵakukopa ŵanji kuti ŵakhozgere cipani cawo ca ndyali. Nyengo zinyake ŵanji ŵakwenda nyumba na nyumba kuti ŵakope ŵanthu. Pa caru cose capasi, ŵenekaya ŵa Ufumu ŵakukhozgera comene Ufumu wa Ciuta mwa kupharazga mu misewu ndiposo ku nyumba na nyumba. Kweniso, nga umo nkhani yakusambira iyo yajumpha yikuyowoyera, Gongwe la Mulinda, leneilo likupharazga Ufumu wa Yehova, pasono ni magazini iyo yikugaŵirika ku ŵanthu ŵanandi comene kuluska yiliyose pa caru capasi. Mwaŵi unyake ukuru comene uwo tili nawo ngwa kuphalirako ŵanji vyakukhwaskana na Ufumu wa Ciuta. Kasi imwe mukucita mwamwamphu mulimo wa kupharazga?—Mat. 28:19, 20.
16. Kasi mungalongora wuli kuti muli mwenekaya muwemi wa Ufumu wa Ciuta?
16 Sonosono apa Ufumu wa Ciuta ndiwo uwusenge caru capasi. Uzamutipwelelera pa umoyo withu wa zuŵa na zuŵa, wauzimu ndiposo wakuthupi. Kasi muzamuŵa mwenekaya muwemi wa Ufumu wa Ciuta pa nyengo iyo? Sono ndiyo nyengo yakulongolera kuti tizamuŵa ŵenekaya ŵawemi. Pa cilicose ico mukucita zuŵa lililose, citani vinthu vyose kuti Yehova wapike ucindami ndipo longorani kuti mukulutilira kuŵa mwenekaya muwemi wa Ufumu wa Ciuta.—1 Kor. 10:31.
[Mazgu ghamusi]
a Mwaciyelezgero, wonani Galamukani! ya Julayi 2011, peji 24-27; Ogasiti 2011, peji 10-13; na Febuluwale 2012, peji 3-9.
b Wonani Gongwe la Mulinda la Malici 15, 2012, peji 30-31.
c Wonani Gongwe la Mulinda, la Ogasiti 15, 2011, peji 6-7 na Uteŵeti Withu wa Ufumu, wa Janyuwale 2011, peji 3-6.
[Mafumbo]
[Mazgu Ghakukhozgera pa peji 14]
Kasi mukupulikira macenjezgo gha mu Baibolo ghakukhwaskana na Intaneti?
[Cithuzithuzi pa peji 12]
Nga mbana ŵa Kora, kasi mukusangwa na kusopa kwaunenesko ndiposo mdauko wake?
[Cithuzithuzi pa peji 15]
Nyengo Yakusopera ya Mbumba yingawovwira kuti imwe na ŵakutemweka ŵinu muŵe ŵenekaya ŵawemi ŵa Ufumu
