VYAKA vicoko waka ivyo vyajumpha, Roald na Elsebeth, mbumba iyo pa nyengo iyi yikaŵa na vyaka pafupifupi 50, yikakhalanga makora ku Bergen, msumba waciŵiri pa misumba yikuru comene ya mu Norway. Pamoza na mwana wawo msungwana, Isabel, na mwana wawo munyamata, Fabian, ŵakateŵeteranga mwakugomezgeka mu mpingo. Roald wakaŵa mulara ndipo Elsebeth wakaŵa mupayiniya, apo Isabel na Fabian ŵakaŵa ŵapharazgi ŵamwamphu.

Ndipouli, mu Seputembala 2009, mbumba iyi yikaghanaghana kucita cinthu cinyake capadera, ico nkhupharazga kwa sabata yimoza ku cigaŵa cakutali. Ntheura Roald na Elsebeth pamoza na Fabian, uyo pa nyengo iyi wakaŵa na vyaka 18, ŵakaluta ku Nordkyn, malo agho ghali ku caru ca Finnmark, kumpoto kwa Arctic Circle. Apo ŵakaŵa ku malo agha, mu muzi wa Kjøllefjord, ŵakapharazganga pamoza na ŵabali na ŵadumbu awo nawo ŵakiza ku cigaŵa ici kuti ŵacite mulimo wa kupharazga. Roald wakukumbuka kuti: “Pakwambilira pa sabata iyi, nkhakhorwa kuti nkhacita makora kuti niciteko mulimo wapadera uwu kwa sabata yose.” Kweni pamasinda mu sabata yeneyiyi iyi, Roald wakamba kuwona kuti mphanyi wakiza luŵiro ku malo agha. Kasi nchivici ico cikacitika?

Roald wakati: “Mwamabuci, Mario, mupayiniya uyo wakuteŵetera ku Finnmark, wakatifumba usange tingatemwa kusamira ku tawuni yakucemeka Lakselv kuti tikawovwire mpingo uwo uli na ŵapharazgi 23.” Roald wakazizwa comene na fumbo lamabuci ili. Wakalongosora kuti: “Elsebeth na ine tikaghanaghanirapo vya kukateŵetera uko ŵapharazgi mbacoko, kweni tikatenge panji tizamusama para ŵana ŵithu ŵakura.” Ndipouli, nanga mpha mazuŵa ghacoko waka agho ŵakapharazganga mu cigaŵa cakutali ici, Roald wakawona kuti ŵanthu ŵakakhumbanga kusambira vya Yehova. Ŵakakhumbanga wovwiri pa nyengo iyi kuti pa nyengo yinyake yayi. Iyo wakukumbuka kuti: “Nkhani iyi yikasuzga comene njuŵi yane ndipo nkhatondeka kugona kwa mausiku ghanandi.” Pamanyuma Mario wakapelekezga Roald na mbumba yake pa galimoto ku Lakselv, mtunda wa makilomita pafupifupi 240 kumwera kwa Kjøllefjord. Mario wakakhumbanga kuti ŵalendo ŵakawone mpingo ucoko uwo ukaŵa ku malo agha.

Ku Lakselv, Andreas, yumoza wa ŵalara ŵaŵiri ŵa mpingo uwu, wakalongora ŵalendo cigaŵa ca mpingo uwu na Nyumba ya Ufumu. Mpingo uwu ukaŵapokelera makora ndipo ukaphalira Roald na Elsebeth kuti ungatemwa usange mbumba yawo yingasamira ku malo agha kuti yiwovwire pa mulimo wa Ufumu. Uku wakumwemwetera, Andreas wakayowoya kuti Roald na Fabian waŵasangira kale nchito. Kasi ŵalendo aŵa ŵakacita wuli?

Mu mtima, pakwamba Fabian wakati: “Nkhukhumba yayi kusamira kuno.” Fundo yakuti waleke ŵabwezi ŵake awo wakura nawo mu mpingo wakwake ndiposo kukhala mu katawuni kacoko yikamukondweska yayi. Kweniso wakaŵa kuti wandamalizge masambiro ghake gha vya magesi. Ndipouli, Isabel (uyo pa nyengo iyi wakaŵa na vyaka 21) wakati ŵafumbika ivyo wakaghanaghananga pa nkhani ya kusama, wakalongosora kuti: “Ici ndico nkhukhumba.” Kweni kufuma apo, Isabel wakati: “Nkhati naghanaghanirapo comene, nkhajifumba kuti, ‘Kasi iyi ni fundo yiwemi nadi? Kasi niŵasoŵenge yayi ŵabwezi ŵane? Kasi nikhale waka mu mpingo wakwithu umo vinthu vikwenda kale makora?’” Kasi Elsebeth wakacita wuli na pempho ili? Iyo wakati: “Nkhawona kuti Yehova wapeleka mulimo ku mbumba yithu, kweni nkhaghanaghanangaso vya nyumba yithu iyo tikaŵa kuti tayinozga waka, na katundu wa mu nyumba uyo tikamusanga mu vyaka 25.”

Sabata yapadera iyi yikati yamara, Roald na mbumba yake ŵakawelera ku Bergen, kweni ŵakaleka yayi kughanaghana vya ŵabali na ŵadumbu ŵa mu msumba wa Lakselv, uwo ukaŵa pa mtunda wa makilomita 2,100. Elsebeth wakati: “Nkhalomba kanandi kwa Yehova, ndipo nkhalutilira kwimbirana foni na ŵabwezi ŵane ŵa ku malo agha, ndipo tikatumizgirananga vithuzithuzi na vyakucitika vya mu uteŵeti.” Roald wakati: “Nkhakhumbanga kuti nighanaghanirepo dankha pambere nindasamire ku cigaŵa ici. Kweniso, nkhakhumbikwiranga kughanaghanirapo usange tamufiska kujipwelelera tekha. Nkhajifumba kuti: Kasi tamujipwelelera wuli tekha? Nkhalomba comene kwa Yehova ndipo nkhadumbiskana na mbumba yane ndiposo ŵabali ŵakukhwima mwauzimu.” Fabian wakukumbuka kuti: “Apo nkhaghanaghanirangapo comene pa nkhani iyi, nkhamanya kuti nilije nadi vifukwa vyakupulikikwa vyakukanira kusama. Kanandi nkhalombanga kwa Yehova, ndipo khumbo la kusama likamba kukura comene.” Isabel ke? Kuti wanozgekere kusamira ku cigaŵa cinyake, wakamba kucita upayiniya mu tawuni yakwake. Wakati wacita upayiniya kwa myezi yinkhondi na umoza, wakawona kuti ngwakunozgeka kusama. Pa nyengo iyo wakacitanga upayiniya, nyengo yinandi wakamalirangaso pa sambiro la Baibolo la iyomwene.

Apo khumbo la kuteŵetera uko kuli ŵapharazgi ŵacoko likakura, mbumba iyi yikacitapo kanthu kuti yifiske cilato cake. Roald wakagwiranga nchito ya malipiro ghanandi iyo wakasangwanga nayo comene, kweni wakapempha holide ya caka cimoza. Ndipouli, bwana wake wakamuphalira kuti wagwirenge nchito kwa maora ghacoko, ico cikung’anamura kuti para wagwira nchito masabata ghaŵiri, wapumulenge masabata ghankhondi na yimoza. Roald wakati: “Nangauli malipiro ghane ghakakhira comene, kweni vinthu vikenda makora.”

Elsebeth wakati: “Mfumu wane wakaniphalira kuti tikayezge kupenja nyumba ku Lakselv ndipo nyumba yithu ya ku Bergen tiŵikemo ŵa renti. Pakakhumbikwiranga nyengo na citatata, kweni vinthu vikatiyendera makora.” Wakasazgirapo kuti: “Nyengo yicoko waka yikati yajumphapo, ŵana ŵane ŵakamba kugwira nchito ya maora ghacoko, ndipo ŵakatovwiranga kulipira vinthu nga nchakurya na thiransipoti.”

Isabel wakati: “Pakuti tawuni iyo tikasamirako yikaŵa yicoko, suzgo lane likuru likaŵa la kusanga nchito yakuti  yinovwirenge kusanga ndalama mwakuti nicite makora upayiniya. Nyengo zinyake, nkhawonanga nga palije ico nicitengepo.” Ndipouli, cifukwa cakuti wakagwiranga nchito za maora ghacoko, zinkhondi na zinayi mu caka cakwamba, Isabel wakafiskanga kusanga vyakukhumbikwa pa umoyo. Kasi Fabian vinthu vikamwendera wuli? “Kuti nimalizge masambiro ghane gha vya magesi, nkhakhumbikwiranga kuti nigwirenge nchito iyi na cilato cakuti nisambire. Ivi ndivyo nkhacitanga ku Lakselv. Kufuma apo, nkhakwera mayeso ndipo nkhamba kugwira nchito ya maora ghacoko ya vya magesi.”

Marelius na muwoli wake, Kesia, nawoso ŵakakhumbanga kuteŵetera uko ŵapharazgi ŵakaŵa ŵacoko. Marelius, uyo pasono wali na vyaka 29, wakati: “Nkhani za pa ungano wa cigaŵa ndiposo mafumbo, vyakukhwaskana na ŵapayiniya vikaniciska kuti nighanaghanirepo vya kusazgirako uteŵeti wane.” Ndipouli, Kesia, uyo pasono wali na vyaka 26, wakakhumbanga yayi kusamira kutali na mbumba yakwake. Iyo wakati: “Nkhakhumbanga yayi kuŵa kutali na ŵanthu awo nkhuŵatemwa.” Kweniso, Marelius wakagwiranga nchito kwa maora ghanandi kuti walipire ngongoli ya nyumba yawo. Iyo wakati: “Na wovwiri wa Yehova ndiposo malurombo ghanandi agho tikalomba kwa iyo kuti watovwire kuti tisinthe vinthu vinyake, tikasama.” Cakwamba, nyengo yinandi ŵakamaliranga pa sambiro la Baibolo. Nyengo yikati yajumphapo, mbumba iyi yikaguliska nyumba yawo, yikaleka nchito zawo, ndipo mu Ogasiti 2011 yikasamira mu msumba wa Alta, kumpoto kwa Norway. Apo ŵakaŵa ku malo agha, kuti ŵajiwovwire pakuŵa ŵapayiniya, Marelius wakagwiranga nchito ya kupendesera ndalama panji kuti ya uakauntanti ndipo Kesia wakagwiranga nchito mu malo ghakusungamo katundu.

Knut na Lisbeth, mbumba iyo pasono yili na vyaka vya m’ma 30, yikacontheka na nkhani za mu Yearbook zakukhwaskana na ŵanthu awo ŵakateŵeteranga uko kuli ŵapharazgi ŵacoko ŵa Ufumu. Lisbeth wakati: “Nkhani izi zikatovwira kuti tighanaghanirepo vya kukateŵetera ku caru cinyake, kweni nkhadondanga cifukwa cakuti nkhajikayikiranga kuti nili wakwenelera kukateŵetera ku caru cinyake.” Ndipouli, ŵakacitapo kanthu kuti ŵafiske cilato cawo. Knut wakati: “Kuti tileke kunanga ndalama zinandi, tikaguliska nyumba yithu ndipo tikamba kukhala na amama. Kufuma apo, kuti tijiyezge usange tingakateŵetera ku caru cinyake, kwa caka cimoza tikasamira ku mpingo wa Cingelezi mu Bergen, uko tikakhalanga na amama ŵa Lisbeth.” Pakati pajumpha nyengo yicoko waka, Knut na Lisbeth ŵakawona kuti mbakunozgeka kusama, ndipo ŵakasamira ku Uganda. Myezi yiŵiri pa caka ŵakuluta ku Norway kukagwira nchito. Cifukwa ca kucita nthena, ŵakuŵa na ndalama zakukwana zakusangira vyakukhumbikwa pa umoyo ndipo ŵakupharazga ku Uganda kwa myezi 10 yakukhalako.

Kasi ŵanchito ŵakujipeleka aŵa vinthu vikaŵayendera wuli? Roald wakati: “Apo tikaŵa ku malo agha, nyengo yinandi tikacezgeranga lumoza nga mbumba kuluska umo tikacitiranga ku Bergen. Sono mbumba yithu yikutemwana comene. Ni thumbiko likuru comene kuwona kuti ŵana ŵithu ŵakukura makora mwauzimu.” Wakasazgirapo kuti: “Kweniso sono tikuviwona mwakwenelera  vinthu vyakuthupi. Tikuvizirwiska comene yayi nga umo vikaŵira kumasinda.”

Elsebeth wakawona kuti nchiwemi kuti wasambire ciyowoyero cinyake. Cifukwa wuli? Mu cigaŵa ca Mpingo wa Lakselv mukaŵa muzi wa Karasjok, umo mukakhalanga Ŵasami, ŵa ku vigaŵa vya kumpoto kwa Norway, Sweden, Finland, na Russia. Ntheura kuti ciŵe cipusu kuŵapharazgira ŵanthu aŵa, Elsebeth wakamba kusambira Cisami. Sono wakudumbiskana nawo ŵanthu aŵa mu ciyowoyero ici nangauli wakucimanya comene yayi. Kasi wakukondwa kupharazga mu cigaŵa ciphya ici? Uku wakumwemwetera, wakati: “Nkhucitiska masambiro gha Baibolo ghankhondi na limoza. Nili wakukondwa comene kuteŵetera kuno.”

Fabian, uyo sono ni mupayiniya ndiposo muteŵeti wakovwira, wakayowoya kuti iyo na Isabel ŵakawovwira ŵawukirano ŵatatu mu mpingo wawo uphya, awo ŵakakhumbikwiranga kuŵaciska kuti ŵacite vinandi mu mpingo. Ŵawukirano wose ŵatatu aŵa, sono ŵakupharazga mwamwamphu. Nakuti ŵaŵiri ŵali kubapatizika ndipo ŵakacita upayiniya wakanyengo mu Malici 2012. Yumoza wa ŵawukirano awo ŵakamba kulopwa mu unenesko, wakawonga Fabian na Isabel cifukwa ca kumovwira kuti waŵeso “wakukhora mu unenesko.” Fabian wakati: “Nkhakhozgeka comene wakati wayowoya mazgu agha. Wamunthu ukuŵa wakukondwa comene para wawovwira ŵanji.” Isabel wakati: “Pa mulimo uwu, ine ‘naceta na kuwona kuti Yehova ni muwemi’ nadi.” (Sal. 34:8) Wakasazgirapo kuti: “Kweniso, nchakukondweska comene kuteŵetera kuno.”

Marelius na Kesia sono ŵali na vinthu vinandi yayi vyakuthupi kweni ŵakukhala makora. Mpingo wa mu Alta, uwo ŵakasamirako, sono uli na ŵapharazgi 41. Marelius wakati: “Para nkhulaŵiska kumanyuma, nchakukhozga comene kuwona umo umoyo withu wasinthira. Tikuwonga Yehova kuti tikumuteŵetera kuno pakuŵa ŵapayiniya. Palije mulimo wakukhorweska kuluska uwu.” Kesia wakasazgirapo kuti: “Nkhasambira kuthemba comene Yehova, ndipo watipwelelera nadi. Kweniso nkhawona kuti kukhala kutali na ŵabali ŵane kwanovwira kuti nizirwiskenge comene nyengo iyo tikucezgera lumoza. Nindadandawurepo na ivyo tikasankha.”

Ndipo kasi Knut na Lisbeth vinthu vikuŵayendera wuli ku Uganda? Knut wakati: “Pakatora nyengo kuti tizgoŵere nyengo ya ku malo agha ndiposo mitheto. Nyengo na nyengo tikuŵa na suzgo la maji, magesi ndiposo kulwara mu nthumbo, kweni tikucitiska masambiro gha Baibolo ghanandi comene.” Lisbeth wakati: “Para tenda mtunda wa maminiti 30 kufuma uko tikukhala, kuli vigaŵa vinyake ivyo makani ghawemi ghandafikeko. Ndipouli, para talutako, tikusanga ŵanthu ŵakuŵazga Baibolo, ndipo ŵakutipempha kuti tiŵasambizge. Para tikusambizga ŵanthu ŵakujiyuyura aŵa uthenga wa mu Baibolo, tikuŵa na cimwemwe cikuru comene ico tingaciyaniska na cinthu cinyake cilicose yayi.”

Mulongozgi withu, Khristu Yesu, wakwenera kuti wakukondwa comene para wakuwona kuti mulimo wa kupharazga uwo wakambiska ukucitika mu vigaŵa vyose vya pa caru capasi. Enya, ŵanthu wose ŵa Ciuta ŵakuŵa na cimwemwe cikuru comene para ŵakujipeleka na mtima wose pakucita languro la Yesu la ‘kuzgora ŵanthu ŵa mitundu yose kuŵa ŵasambiri.’—Mat. 28:19, 20.