1. Cifukwa wuli uyo wakwendeska ndege wakulondezga ivyo vili pa ndondomeko pambere wandanyamuke?

 ŴANTHU awo ŵakwendeska ndege ŵakuŵa na ndondomeko ya vinthu vyakujumpha 30, iyo yikuŵawovwira kuti ŵawone usange ndege yili makora pambere yindanyamuke. Usange ŵatondeka kulondezga ivyo vili pa ndondomeko iyi pambere ŵandanyamuke, ngozi yikuru yingacitika nyengo yiliyose. Kasi mukuŵamanya ŵakwendeska ndege awo ŵakuciskika comene kuti ŵalondezge vyose ivyo vili pa ndondomeko iyi? Ni awo ŵakumanya comene kwendeska ndege. Awo ŵakumanya comene kwendeska ndege ŵangamba kujithemba na kutondeka kulondezga cinthu cilicose ico cikuŵa pa ndondomeko iyi.

2. Kasi ni ndondomeko wuli iyo Ŵakhristu ŵakwenera kugwiliskira nchito?

² Nga ni uyo wakwendeska makora ndege, namwe mungagwiliskira nchito ndondomeko yakujisandira kuti muwoneseske kuti cipulikano cinu cikuleka kuputwa pa nyengo ya suzgo. Kwali mwabapatizika sonosono panji mwateŵetera Ciuta kwa vyaka vinandi, nchakukhumbikwa comene kuti nyengo zose musandenge cipulikano na kujipeleka kwinu pakusopa Yehova Ciuta. Para mungatondeka kusanda vinthu ivi nyengo zose ndiposo mwakufwilirapo mungananga umoyo winu wauzimu. Baibolo likuticenjezga kuti: “Uyo wakughanaghana kuti wakwima wacenjere kuti waleke kuwa.”—1 Kor. 10:12.

3. Kasi Ŵakhristu ŵa mu Galatiya ŵakakhumbikwiranga kucita vici?

³ Ŵakhristu mu Galatiya ŵakakhumbikwiranga kusanda ukuru wa cipulikano cawo na kuzirwiska wanangwa wawo wauzimu. Kwizira mu sembe yake, Yesu wakaŵa kuti wajura nthowa ya awo ŵali na cipulikano mwa iyo kuti ŵamumanye mwapadera Ciuta, panji kuti ŵaŵe ŵana ŵa Ciuta. (Gal. 4:9) Kuti ŵakhalilire mu ubwezi uwu, Ŵagalatiya ŵakeneranga kukana visambizgo vya awo ŵakakoseranga pa Dango la Mozesi. Ŵamitundu ŵambura kukotoleka awo ŵakaŵa mu  mpingo ŵakaŵa pasi pa Dango yayi. Ŵayuda na Ŵamitundu wuwo ŵakakhumbikwiranga kuti ŵakure mwauzimu. Kuti ŵakure mwauzimu ŵakakhumbikwirangaso kumanya kuti ŵakeneranga kuŵa ŵarunji kwizira mu Dango la Mozesi yayi.

4, 5. Kasi ni ulongozgi wuli uwo Paulosi wakapeleka ku Ŵagalatiya, ndipo ngwakwenelera wuli kwa ise?

⁴ Ulongozgi wa mpositole Paulosi ku Ŵagalatiya uli na cilato ico ukalembekera. Cilato cake nchakuti uwovwire Ŵakhristu ŵaunenesko wose kuti ŵaleke kuwuleka unenesko wa mu Baibolo na kuwelera ku vinthu vyakumasinda. Yehova wakaphalira mpositole uyu kuti waciske awo ŵakaŵa mu mipingo ya mu Galatiya kweniso ŵateŵeti ŵake wose kuti ŵalutilire kuŵa ŵakukhora mwauzimu.

⁵ Tose tingacita makora kukumbuka umo tikafwatukira ku wuzga wauzimu na kuŵa Ŵakaboni ŵa Yehova. Kuti mucite ici, ghanaghaniranipo pa mafumbo ghaŵiri agha: Kasi mukukumbuka vinthu ivyo mukacita kuti muŵe ŵakwenelera kubapatizika? Kasi mukukumbuka umo mukamanyira Ciuta na kumanyikwa na iyo na kusangwa na wanangwa weneco wauzimu?

6. Kasi ni ndondomeko wuli iyo tidumbiskanenge?

⁶ Tose tikalondezga vinthu vinkhondi na vinayi. Vinthu ivi vili nga ni ndondomeko yauzimu yakujisandira, ndipo vili mu bokosi lakuti  “Ivyo Munthu Wakucita Kuti Wabapatizike na Kulutilira Kukura Mwauzimu.” Para nyengo zose tikujikumbuska vinthu vinkhondi na vinayi ivi tikhozgekenge kuti tigege kuwelera ku vinthu vya caru. Nga umo uyo wendeska ndege kwa nyengo yitali kweniso wakucenjera wakulutililira kwendeska makora ndege para wakuweleramo dankha ivyo vili pa ndondomeko, ntheura pera namwe movwirikenge kuti mulutilire kuteŵetera Ciuta mwakugomezgeka para mukuweleramo ivyo vili pa ndondomeko yauzimu.

7. Kasi tikwenera kulondezga cilongolero wuli, ndipo cifukwa wuli?

⁷ Ndondomeko yikukumbuska uyo wakwendeska ndege vinthu ivyo wakwenera kucita mwakupwelelera pambere wandanyamuke ulendo uliwose. Nase nyengo zose tingajisanda ndiposo tingasanda vinthu ivyo tacitanga kufuma pa ubapatizo withu. Paulosi wakalembera Timote kuti: “Lutilira kukoleska cilongolero ca mazgu ghaunenesko agho ukapulika kwa ine pamoza na cipulikano na citemwa ivyo vili mwa Khristu Yesu.” (2 Tim. 1:13) “Mazgu ghaunenesko” agha ghakusangika mu Mazgu gha Ciuta. (1 Tim. 6:3) Nga umo munthu waluso wangajambulira cithuzithuzi cipusu kuti watilongore umo cithuzithuzi cose ciŵilenge, ‘cilongolero ca unenesko’ cikutovwira kumanya na kulondezga ivyo Yehova wakukhumba kwa ise. Ntheura tiyeni sono tiwone vinthu ivyo tikacita kuti tibapatizike, kuti tiwone umo tikulondezgera cilongolero ca unenesko.

8, 9. (a) Cifukwa wuli tikwenera kulutilira kukura mu cipulikano na kumanya? (b) Yowoyani ciyelezgero cakulongora kuzirwa kwa kukura mwauzimu ndiposo cifukwa ico uwu uliri mulimo wakulutilira.

⁸ Cinthu cakwamba ico cili pa ndondomeko yithu yakujisandira nkhumanya Ciuta. Kufuma apo, tikwenera kuŵa na cipulikano. Kweni tikwenera kulutilira kukura pa kumanya Ciuta ndiposo pa cipulikano. (2 Tes. 1:3) Para cinthu cikukura cikusintha vinthu vinyake. “Kukura” cikung’anamura kusazgikirako. Ntheura, para tabapatizika tikwenera kulutilira kukura mwauzimu mwakuti tileke kuwelera nyuma.

⁹ Tingayaniska kukura kwithu kwauzimu na umo khuni likukulira. Khuni lingakura comene, comenecomene para misisi yake yikunjira comene pasi. Mwaciyelezgero, makuni ghanyake gha milanje gha ku Lebanoni utali wake ungayana na nyumba 12 zakudikana ndipo ghali na misisi yankhongono. Ukuru wa ciŵiriŵiri cake ungakwana mamita 12. (Sumu. 5:15) Pakwamba  khuni ili likukura luŵiroluŵiro comene. Apo misisi yikunjira comene pasi, ciŵiriŵiri cikukura zamumphepete na kutalika. Pamanyuma cikuŵa cakusuzga kuwona kuti khuni likukura. Mkhristu nayo wakukura nthena mwauzimu. Pa nyengo iyo tikwamba kusambira Baibolo, tingakura luŵiro mwauzimu ndipo pamanyuma tingabapatizika. Awo ŵali mu mpingo ŵakuwona umo tikukulira mwauzimu. Tingaŵa ŵakwenelera kucita upayiniya wanyengozose panji kupokera mauteŵeti ghanyake. Mu vyaka vyakulondezgapo, panji ŵanji ŵangawona yayi kuti tikukura mwauzimu. Ndipouli, tikukhumbikwira kukura mu cipulikano na kumanya “kuti tiŵe munthu mulara wakufikapo, kufika pa msinkhu wakuyana na uzali wa Khristu.” (Efe. 4:13) Ntheura tikukura kufuma pakwamba kufika pa kuŵa Ŵakhristu ŵakukhwima mwauzimu, kuŵa khuni lankhongono ndiposo lakukura makora.

10. Cifukwa wuli nchakukhumbikwa kuti Ŵakhristu ŵakukhwima mwauzimu nawo ŵakurenge?

¹⁰ Kweni tikwenera kulekera penepapa yayi kukura. Tikwenera kulutilira kumanya ndiposo kukura mu cipulikano cithu. Ntheura misisi yithu yikunjira comene pasi pa dongo, ilo ni Mazgu gha Ciuta. (Zinth. 12:3) Mu mpingo waunenesko, muli ŵabali na ŵadumbu ŵanandi awo ŵacita nthena. Mwaciyelezgero, mubali munyake uyo waŵa mulara kwa vyaka vyakujumpha 30 wakawona kuti wacali kukura mwauzimu. Iyo wakati: “Sono nkhuzirwiska comene Baibolo. Nkhulutilira kusanga mipata yakulondezgera fundo za mu Baibolo na malango ghake mu nthowa zakupambanapambana. Kweniso nkhulutilira kupharazga mwamwamphu.”

11. Kasi tingacita wuli kuti timumanye makora Yehova apo nyengo yikujumphapo?

¹¹ Kuti tikure mwauzimu tikweneraso kusendelera kwa Yehova pakuŵa Mubwezi na Dada withu. Wakukhumba kuti tijipulikenge kuti tili ŵabwezi ŵake. Wakukhumba kuti timanye kuti wakutitemwa na kutivikilira. Wakukhumba kuti tijipulikenge nga umo mwana wakujipulikira kuti ngwakutemweka na wakuvikilirika para wali mu mawoko gha ŵapapi ŵake panji nga umo tikujipulikira para tikucezga na mubwezi withu wapamtima kweniso wakugomezgeka. Nga umo mukumanyira, ubwezi wanthena uwu na Yehova ukukura zuŵa limoza yayi. Pakwenera kujumpha nyengo kuti timumanye Yehova na kumutemwa. Ntheura kuti mumumanye makora Yehova, ŵikanipo mtima kuti mupaturenge nyengo yakuŵazgira Mazgu ghake zuŵa lililose. Ndiposo ŵazgani Gongwe la Mulinda lililose na Galamukani! yiliyose kweniso mabuku ghanyake ghakulongosora Baibolo.

12. Kasi nchivici ico cikukhumbikwa kuti ise timanyikwe na Yehova?

¹² Ŵabwezi ŵa Ciuta ŵakukura mwauzimu  kwizira mu malurombo ghawo ghakufumira pasi pa mtima ndiposo kucezga na ŵanthu ŵawemi. (Ŵazgani Malaki 3:16.) “Makutu [gha Yehova] ghakupulikizga maŵeyelero ghawo.” (1 Pet. 3:12) Nga ni mupapi wacitemwa, Yehova wakutegherezga para tikulomba wovwiri kwa iyo. Ntheura, tikwenera ‘kukosera mu lurombo.’ (Rom. 12:12) Tingalutilira kuŵa Mkhristu wakukhwima mwauzimu pekha para Ciuta wangatovwira. Masuzgo gha mgonezi uwu ngakuru comene ndipo tekha tingaghatonda yayi. Usange tikuleka kukosera mu lurombo, tikujijandizga tekha kupokera nkhongono izo Ciuta ngwakukhumbisiska kutipa. Kasi mukukhorwa na umo mukulombera panji mukuwona kuti mukukhumbikwira kusintha vinthu vinyake pa umo mukulombera?—Yer. 16:19.

13. Cifukwa wuli kucezga na Ŵakhristu ŵanyithu nkhwakuzirwa kuti tikure mwauzimu?

¹³ Yehova wakukondwa na wose awo “ŵakugomezga mwa Iye”; ntheura, nanga tingaŵa kuti tamumanya Ciuta, tikwenera kulutilira kuwungana nyengo zose na mpingo uwo uli na ŵanji awo ŵakumumanya. (Nah. 1:7) Mu caru ici cakuzura na vyakugongoweska vinandi, tingacita makora kuti tiŵenge pamoza na ŵabali na ŵadumbu ŵithu ŵeneawo mbakukhozga. Kasi tingasanga vyandulo wuli? Mu mpingo musangenge ŵanthu awo ŵamuciskiraninge “ku citemwa na milimo yiwemi.” (Heb. 10:24, 25) Citemwa ico Paulosi wakayowoya ku Ŵahebere cikukhumba ubali, ŵateŵeti awo ŵali na maghanoghano ghamoza, panji kuti mpingo. Kuti tilongore citemwa ici tikweneraso kucezga na Ŵakhristu ŵanyithu. Pa ndondomeko yinu yauzimu, nyengo zose mucongengepo pa umo mukucitira pa nkhani ya maungano na kuzgorapo.

14. Kasi kupera na kuwelera ni vinthu ivyo vikumara yayi pa fundo wuli?

¹⁴ Apo tikazgokanga Ŵakhristu tikadankha kupera na kuwelera, panji kung’anamukako ku zakwananga zithu. Ndipouli kupera kukumara yayi. Pakuŵa ŵanthu ŵambura kufikapo, ticali na zakwananga izo zili nga ni njoka iyo yazingana ndipo njakunozgeka kuluma. (Rom. 3:9, 10; 6:12-14) Tiyeni tilutilire kuŵa maso, tileke kusulako maubudi ghithu. Cakukondweska nchakuti Yehova ngwakuzika na ise apo tikuyezgayezga kulimbana na maubudi ghithu ndiposo kuti tisinthe vinthu vinyake. (Fil. 2:12; 2 Pet. 3:9) Tikwenera kugwiliskira nchito makora nyengo na nkhongono zithu, tileke kujikondweska waka. Mudumbu munyake wakalemba kuti: “Nkhakulira mu unenesko, kweni Yehova nkhamuwonanga mwakupambana na umo ŵanandi ŵakamuwoneranga. Nkhawonanga kuti wakwenera kopeka comene, ndipo nkhawonanga kuti vingacitika yayi kuti ine nimukondweske.” Nyengo yikati yajumphapo mudumbu uyu wakawona kuti ‘wakalopwa mwauzimu’ cifukwa ca vinthu vinandi ivyo vikamuwezgeranga nyuma. Wakalutizga kuti: “Nkhalopwa cifukwa cakuti nkhalekanga kutemwa Yehova yayi, kweni cifukwa cakuti nkhamumanyanga makora yayi. Ndipouli, nkhati nalomba comene kwa Ciuta, nkhamba kung’anamuka.” Wakasazgirapo kuti: “Nkhamanya kuti Yehova wakendanga nane nga ni mwana wake, kunovwira para nakumana na suzgo, ngwalusungu, wakanilongoranga ivyo nkheneranga kucita.”

15. Kasi Yesu na Awiske ŵakuwona vici?

¹⁵ “Lutilirani kuyowoya na ŵanthu” vya makani ghawemi. Mungelo wa Ciuta wakayowoya mazgu agha kwa Petrosi na ŵapositole ŵanji ŵakati ŵafwatulika mwamunthondwe mu jele. (Mil. 5:19-21) Enya, cinthu cinyake ico cili pa ndondomeko yauzimu yakujisandira nkhupharazga. Yesu na Awiske ŵakuwona cipulikano cithu na uteŵeti withu. (Uvu. 2:19) Nga umo mulara uyo takora mazgu ghake mu ndime yakumanyuma wakayowoyera: “Mulimo wa kupharazga ndiwo tikuwuŵika pakwamba.”

16. Cifukwa wuli nchiwemi kughanaghanirapo pa kujipatulira kwithu kwa Yehova?

¹⁶ Ghanaghanirani kujipatulira kwinu. Cinthu cakuzirwa comene ico tili naco mbubwezi withu na Yehova. Wakuŵamanya awo mbake.  (Ŵazgani Yesaya 44:5.) Lombani na kusanda umo ubwezi winu na iyo uliri. Cinthu cinyake cakuzirwa nchakuti mukwenera kukumbuka zuŵa lakuzirwa la ubapatizo winu. Ici naco cimovwiraninge kuti mukumbukenge kuti ubapatizo winu ukwimira cinthu cakuzirwa comene ico muli kucita pa umoyo winu.

17. Cifukwa wuli nchakukhumbikwa kuzizipizga kuti tiskepelere kwa Yehova?

¹⁷ Pakulemba kalata ku Ŵagalatiya, Paulosi wakadidimizgapo kuti nchakukhumbikwa kuzizipizga. (Gal. 6:9) Mazuŵa ghano napo ici nchakuzirwa kwa Mkhristu. Mukumanenge na viyezgo, kweni Yehova wamovwiraninge. Lutilirani kulomba mzimu utuŵa. Para muli na citima wamupaninge cimwemwe, para mwakweŵeka wamupaninge mtende. (Mat. 7:7-11) Ghanaghanirani fundo iyi: Usange Yehova wakupwelelera viyuni, kuli wuli imwe mukumutemwa ndipo mwajipeleka kwa iyo? (Mat. 10:29-31) Nanga vingasuzga wuli, mungaweleranga nyuma cara, kuthera cara. Tatumbikika mu nthowa zapadera comene cifukwa ca kumanyikwa na Yehova.

18. Kasi mukwenera kucita vici sono pakuti “mwamumanya Ciuta”?

¹⁸ Ntheura usange mwamumanya sonosono Ciuta na kubapatizika, kasi sono mukwenera kucita vici? Lutilirani kumumanya makora Yehova, na kukhwima mwauzimu. Ndipo usange pajumpha vyaka vinandi kufuma apo mukabapatizikira, kasi sono mukwenera kucita vici? Namwe mukwenera kulutilira kujima na kusanuzga pa ivyo mukumanya vyakukhwaskana na Yehova. Tiyeni tileke kujithemba paubwezi withu na iyo. M’malo mwake, nyengo na nyengo tose tikwenera kuweleramo ndondomeko yauzimu yakujisandira mwakuti tiwoneseske kuti tikulutilira kukuzga ubwezi withu na Yehova, uyo ni Dada withu, Mubwezi withu ndiposo Ciuta withu wacitemwa.—Ŵazgani 2 Ŵakorinte 13:5, 6.