1, 2. Cifukwa wuli nchakwenelera kuti Yehova wakujiyaniska na muliska?

 YEHOVA wakujiyaniska na muliska. (Ezek. 34:11-14) Ici cikutovwira kuti timumanye makora Yehova. Muliska wacitemwa wakuvikilira na kupwelelera mskambo wa mberere zake. Wakuzilongozgera ku utheka wakubiliŵira na ku maji (Sal. 23:1, 2); wakuzilaŵilira muhanya na usiku (Luka 2:8); wakuzivikilira ku vilwani (1 Sam. 17:34, 35); wakupakata twanamberere (Yes. 40:11); wakupenja izo zazgeŵa, na kupwelelera izo zaphyoka.—Ezek. 34:16.

² Kale, ŵanthu ŵa Yehova ŵanandi ŵakaŵa ŵaliska ndiposo ŵalimi, ntheura cikaŵa cipusu kwa iwo kupulikiska apo Yehova Ciuta wakajiyaniskanga na muliska wacitemwa. Ŵakamanyanga kuti mberere zikukhumbikwira phwelelero lapadera kuti zikure makora. Mwakuyana waka, ŵanthu nawo ŵakukhumbikwira phwelelero lauzimu. (Mrk. 6:34) Para palije phwelelero lauzimu na ulongozgi uwemi, ŵanthu ŵakusuzgika. Ŵakuŵa ŵambura kuvikilirika kweniso ŵakupuluka na kuŵa na nkharo ziheni nga umo “mberere zambura muliska” zikumbininikira. (1 Mathe. 22:17) Ndipouli, Yehova ngwacitemwa ndipo ŵanthu ŵake wakuŵapa ivyo ŵakukhumbikwira.

3. Kasi tidumbiskanenge vici mu nkhani iyi?

³ Mazuŵa ghano napo, tikovwirika kumumanya makora Yehova cifukwa cakuti wakujiyaniska na muliska. Yehova wacali kupwelelera ŵanthu ŵake. Tiyeni tiwone umo wakulongozgera mberere zake na umo wakucitira kuti wazipe vyakukhumbikwa. Tiwonengeso umo mberere zikwenera kucitira na ulongozgi wa citemwa wakufuma kwa Yehova.

4. Kasi Yesu wali na udindo wuli pa nkhani ya kupwelelera mberere za Yehova?

⁴ Yehova wali kusora Yesu kuŵa Mutu wa mpingo waunenesko. (Efe. 1:22, 23) Pakuŵa “muliska muwemi,” Yesu wakuyezga Awiske pa nkhani ya kutemwa na kupwelelera mberere. Ndipo Yesu ‘wakapeleka umoyo wake cifukwa ca mberere.’ (Yoh. 10:11, 15) Sembe yakuwombora ya Khristu ni thumbiko likuru ku ŵanthu wose. (Mat. 20:28) Vili nthena cifukwa cakuti ni khumbo la Yehova kuti “waliyose uyo wakupulikana mwa [Yesu] waleke kuparanyika kweni waŵenge na umoyo wamuyirayira.”—Yoh. 3:16.

5, 6. (a) Kasi Yesu wimika anjani kuti ŵapwelelere mberere zake, ndipo izo zikwenera kucita wuli kuti zisange candulo? (b) Yowoyani cifukwa cikuru ico tikwenera kupulikira ŵalara.

⁵ Kasi mberere zikucita wuli na ulongozgi wa Muliska Muwemi, Yesu Khristu? Yesu wakati: “Mberere zane zikupulika mazgu ghane, ndipo nkhuzimanya, ndiposo zikunilondezga.” (Yoh. 10:27) Kupulika mazgu gha Muliska Muwemi cikung’anamura kulondezga ulongozgi wake pa nkhani yiliyose. Ici cikukhumba kuti tikoleranenge na ŵaliska ŵacokoŵacoko awo iyo wimika. Yesu wakalongora kuti ŵapositole na ŵasambiri ŵake ŵakeneranga kulutizga mulimo uwo wakambiska. Ŵakeneranga ‘kusambizga’ na ‘kulyeska twanamberere twa Yesu.’ (Mat. 28:20; ŵazgani Yohane 21:15-17.) Apo makani ghawemi ghakapharazgikanga ndipo ŵasambiri ŵakasazgikirangako, Yesu wakanozga vyakuti paŵenge Ŵakhristu ŵakukhwima kuti ŵaliskenge mipingo.—Efe. 4:11, 12.

⁶ Apo mpositole Paulosi wakayowoyanga na ŵalaŵiliri ŵa mpingo wa mu Efeso, wakati mzimu utuŵa ndiwo ukaŵimika kuŵa ŵalaŵiliri ‘kuti ŵaliske mpingo wa Ciuta.’ (Mil. 20:28) Mazuŵa ghano napo, ŵalaŵiliri ŵakwimikika na mzimu utuŵa cifukwa ŵakufiska fundo za mu Malemba agho ngakupelekeka mwa mzimu. Ntheura, para tikupulikira ŵalaŵiliri ndikuti tikupeleka nchindi kwa Yehova na Yesu, ŵeneawo Mbaliska ŵalara. (Luka 10:16) Ici ndico cifukwa cikuru ico tikwenera kujilambikira ku ŵalara. Ndipouli, paliso vifukwa vinyake ivyo tikwenera kujilambikira kwa iwo.

7. Kasi ŵalara ŵakumovwirani wuli kuti mulutilire kuŵa paubwezi na Yehova?

⁷ Pakulongozga, ŵalara ŵakukhwimiska Ŵakhristu ŵanyawo na kupeleka ulongozgi wakufuma mu Malemba. Cilato cawo pakupeleka ulongozgi uwu nkhuŵasankhira vyakucita ŵabali yayi. (2 Kor. 1:24) Kweni ŵakupeleka ulongozgi wa mu Malemba uwo ukovwira ŵabali na ŵadumbu kusankha makora vyakucita. Kweniso ŵakovwira kuti mu mpingo muleke kuŵa utimbanizgi ndiposo kuti muŵe mtende. (1 Kor. 14:33, 40) Ŵalara “ŵakulinda umoyo,” mu fundo yakuti ŵakovwira waliyose mu mpingo kuti walutilire kuŵa paubwezi na Yehova. Ntheura para ŵawona kuti mubali panji mudumbu, ‘wakupuluka,’ panji ‘wapuluka’ kale, ŵakumovwira mwaluŵiro. (Gal. 6:1, 2; Yuda 22) Ivi ni vifukwa viwemi vyakuŵira ŵakupulikira “awo ŵakulongozga.”—Ŵazgani Ŵahebere 13:17.

8. Kasi ŵalara ŵakuvikilira wuli mskambo wa Ciuta?

⁸ Mpositole Paulosi, uyo nayo wakaŵa muliska wauzimu, wakalembera ŵabali ŵa mu Kolose kuti: “Cenjerani kuti paŵavye munthu wamukorani nga ni nyama, kwizira mu vinjeru vya caru na upusikizgi wawaka, kwakuyana na maluso gha ŵanthu, kwakuyana na vinthu vyakwambilira vya caru, kuti kwakuyana na Khristu cara.” (Kol. 2:8) Cenjezgo ili likutipa cifukwa cinyake ciwemi ico tikwenera kupulikira ulongozgi wa mu Malemba wakufuma ku ŵalara. Ŵakuvikilira mskambo, mu fundo yakuti ŵakovwira ŵabali ŵawo kuti ŵajivikilire  ku ŵanthu awo ŵangalopweska cipulikano cawo. Mpositole Petrosi wakacenjezga za “nchimi zitesi” na “ŵasambizgi ŵatesi” awo ŵazamuyezga kukopa “ŵanthu ŵambura kukhazikika” kuti ŵacite kwananga. (2 Pet. 2:1, 14) Mazuŵa ghano napo, ŵalara ŵakwenera kucenjezga usange mphakwenelera. Pakuŵa ŵanalume ŵakukhwima mwauzimu, iwo ŵakumanya vinandi. Cinyake nchakuti, pambere ŵandimikike, ŵakaŵa kuti ŵalongora kuti ŵakughamanya makora Malemba kweniso ŵakumanya kusambizga vinthu vyaunenesko. (1 Tim. 3:2; Tito 1:9) Iwo ŵakulongozga makora mskambo cifukwa cakuti mbakukhwima mwauzimu, ŵakucita makora vinthu, ndiposo ŵali na vinjeru vya mu Baibolo.

9. Kasi Yesu wakucita wuli kuti walongozge na kulyeska mpingo waunenesko mazuŵa ghano?

⁹ Kwizira mu gulu lake, Yehova wakupeleka cakurya cauzimu cakukwana ku ŵabali wose mu cipulikano pa caru cose capasi. Ulongozgi unandi wa mu Malemba ukupelekeka kwizira mu mabuku ghithu. Kweniso nyengo zinyake, gulu likupeleka ulongozgi mwakudunjika ku ŵalara kwizira mu makalata, panji mu ŵalaŵiliri ŵakwendakwenda. Mu nthowa izi, mberere zikupokera ulongozgi wakupulikikwa makora.

10. Kasi ŵaliska ŵauzimu ŵakwenera kucita vici na awo ŵafumako ku mskambo?

¹⁰ Ŵalaŵiliri ŵali na udindo wa kuvikilira, kupwelelera na kovwira ŵabali na ŵadumbu  mu mpingo, comenecomene awo ŵaphyoka panji ŵalwara mwauzimu. (Ŵazgani Yakobe 5:14, 15.) Ŵanji mwa ŵanthu aŵa, ŵangaŵa kuti ŵafumako ku mskambo ndipo ŵakucitakoso yayi milimo yauzimu. Para vyaŵa nthena, mulara wacitemwa wakwenera kupenja mberere yiliyose yakuzgeŵa na kuyiciska kuti yiwelere mu ciŵaya, ico ni mpingo. Yesu wakalongosora kuti: “Ŵadada awo ŵali kucanya ŵakukhumba cara kuti yumoza wa ŵacoko aŵa watayike.”—Mat. 18:12-14.

11. Cifukwa wuli ŵanthu ŵanyake ŵangasuzgika kupulikira ulongozgi wa ŵalara?

¹¹ Yehova na Yesu Mbaliska ŵakufikapo. Kweni ŵaliska ŵacokoŵacoko awo ŵapika mulimo wa kupwelelera mipingo mbambura kufikapo. Ici cingapangiska kuti ŵanji ŵasuzgike kupulikira ŵalara. Ŵanthu aŵa ŵangaghanaghana kuti: ‘Ŵalara mbanthu ŵambura kufikapo nga ndise. Cifukwa wuli tikwenera kupulikira ulongozgi wawo?’ Mbunenesko kuti ŵalara mbambura kufikapo. Ndipouli, tikwenera kughawona mwakwenelera maubudi ghawo na ivyo ŵakutondeka kucita makora.

12, 13. (a) Kasi awo ŵakalongozganga ŵanthu ŵa Yehova mu nyengo yakale, ŵakacita maubudi wuli? (b) Cifukwa wuli maubudi gha ŵanthu awo ŵakalongozganga ghali kulembeka mu Baibolo?

¹² Malemba ghakuyowoya mwakupulikikwa makora vya maubudi gha ŵanthu awo Yehova wakimika kuti ŵalongozge ŵanthu ŵake mu nyengo yakale. Mwaciyelezgero, Davide wakaphakazgika kuŵa themba na mulongozgi wa Israyeli. Ndipouli, wakacita uleŵi na kukomeska munthu. (2 Sam. 12:7-9) Kweniso ghanaghanirani vya mpositole Petrosi. Nangauli wakapika mulimo ukuru mu mpingo Wacikhristu wakwambilira, wakacita maubudi ghakuru. (Mat. 16:18, 19; Yoh. 13:38; 18:27; Gal. 2:11-14) Kufuma pa Adamu na Eva, pa caru capasi pandaŵeso munthu munyake wakufikapo, kupatulako Yesu.

¹³ Cifukwa wuli Yehova wakaphalira ŵalembi ŵa Baibolo kuti ŵalembe maubudi gha ŵanthu awo wakimika? Cifukwa cimoza nchakuti Ciuta wakakhumbanga kulongora kuti wangatuma ŵanalume ŵambura kufikapo kuti ŵalongozge ŵanthu ŵake. Nakuti, ndimo wacitira kwambira kale. Ntheura, tiyeni tileke kunyunyuta panji kukana ulongozgi wa ŵalara cifukwa ca maubudi ghawo. Yehova wakukhumba kuti ticindikenge na kupulikira ŵalara.—Ŵazgani Exodus 16:2, 8.

14, 15. Kasi tikusambirapo vici pa umo Yehova wakayowoyeranga na ŵanthu ŵake kale?

¹⁴ Mazuŵa ghano, nchakuzirwa comene kupulikira awo ŵakutilongozga. Ghanaghanirani umo Yehova wakayowoyeranga na ŵanthu ŵake kale pa nyengo zakusuzga. Apo Ŵaisrayeli ŵakafumanga mu Eguputo, Ciuta wakapelekanga ulongozgi kwa iwo kwizira mwa Mozesi na Aroni. Kuti Ŵaisrayeli ŵapone cilengo ca nambara 10, ŵakeneranga kupulikira ulongozgi wakuti ŵarye cakurya capadera, na kumija ndopa za mberere pa mphanjizgo za milyango ya nyumba zawo. Ŵaisrayeli ŵakapulika ulongozgi uwu kufuma kucanya yayi. Iwo ŵakeneranga kupulika ulongozgi uwu ku ŵanalume ŵalara ŵa Israyeli, awo nawo ŵakawupulika kwa Mozesi. (Ex. 12:1-7, 21-23, 29) Pa nyengo iyi, Mozesi na ŵanalume ŵalara ndiwo ŵakapelekanga uthenga wa Yehova ku ŵanthu. Mwakuyana waka, ŵalara ŵakucita mulimo wakuzirwa comene mazuŵa ghano.

¹⁵ Panji mukukumbuka nkhani zinyake za mu Baibolo apo Yehova wakapeleka ulongozgi kwizira mu ŵanthu panji ŵangelo kuti ŵanthu ŵake ŵapone. Mu nkhani zose izi, Ciuta wakawona kuti nchakwenelera kugaŵirako ŵanji mazaza. Mathenga ghakimiranga  Yehova, ndipo ghakaphaliranga ŵanthu ivyo ŵakeneranga kucita kuti ŵapone. Yehova ndimo wangazakacitiraso pa Haramagedoni. Mazuŵa ghano, ŵalara awo ŵapika udindo wa kwimira Yehova panji gulu lake, ŵakwenera kuŵa maso comene kuti ŵaleke kugwiliskira nchito uheni udindo wawo.

16. Kasi tikwenera kupulikira “lizgu” wuli?

¹⁶ Ŵanthu ŵa Yehova ni “mskambo umoza” ndipo ŵakulongozgeka na “muliska yumoza,” Yesu Khristu. (Yoh. 10:16) Yesu wakalongora kuti waŵenge na ŵasambiri ŵake “mazuŵa ghose mpaka umaliro wa mgonezi.” (Mat. 28:20) Pakuŵa Themba kucanya, iyo wali na mazaza pa vinthu vyose ivyo vilongozgerenge ku pharanyiko la caru ca Satana. Kuti tilutilire kuŵa ŵakukolerana ndiposo ŵakuvikilirika mu mskambo wa Ciuta, tikwenera kupulikira ‘lizgu kunyuma kwithu’ ilo likutiphalira nthowa iyo tikwenera kwendamo. Pa “lizgu” ili pali ivyo mzimu utuŵa wa Ciuta ukuyowoya kwizira mu Baibolo na ivyo Yehova na Yesu ŵakuyowoya kwizira mu awo ŵali kwimikika kuŵa ŵaliska ŵacokoŵacoko.—Ŵazgani Yesaya 30:21; Uvumbuzi 3:22.

17, 18. (a) Kasi mskambo uli pa ngozi wuli, kweni pali wovwiri wuli? (b) Kasi nkhani yakulondezgapo yizamuzgora fumbo wuli?

¹⁷ Baibolo likuti Satana wakuyingayinga “nga ni nkhalamu yakuwuluma, wakukhumba kumilimitizga yunji.” (1 Pet. 5:8) Nga nchikoko ca muthondo ca njara, iyo wakuŵenda mskambo, ndipo ngwakunozgeka kubwaka mberere yiliyose iyo yapusa panji iyo yazgeŵa. Ici nchifukwa cikuru ico tikwenera kuŵira pamoza na mskambo ndiposo pamoza na “muliska na mulaŵiliri wa umoyo” withu. (1 Pet. 2:25) Pakuyowoya za awo ŵazamupona suzgo yikuru, lemba la Uvumbuzi 7:17 likuti: “Mwanamberere [Yesu] . . . wazamuŵaliska, ndipo wazamuŵalongozgera ku visimi vya maji gha umoyo. Ndipo Ciuta wazamufyura sozi lililose ku maso ghawo.” Ili ni layizgo liwemi comene.

¹⁸ Pakuti sono tasanda mulimo wakuzirwa wa ŵalara pakuŵa ŵaliska ŵacokoŵacoko, nchakwenelera kufumba kuti, Kasi ŵanalume ŵakwimikika aŵa, ŵangacita wuli vinthu mwakwenelera na mberere za Yesu? Nkhani yakulondezgapo yizamuzgora fumbo ili.