BEZALELI na Oholiyabu ŵakamanyanga ntchito ya kuzenga. Apo ŵakaŵa ŵazga ku Eguputo, ŵakwenera kuti ŵakawumbanga njerwa. Ŵakati ŵafuma mu Eguputo, ŵakapika mulimo wa kulongozga pa kupanga chihema. (Ex. 31:1-11) Nangauli ŵakatumika kuti ŵapange vinthu mwaluso, kweni ŵanthu ŵachoko waka ndiwo ŵakate ŵaviwonenge. Kasi ŵakagongowa kuti ŵanthu ŵanandi ŵaviwonenge yayi? Kasi walipo uyo wakawonanga ivyo ŵakachitanga? Kasi walipo uyo wakuwona ivyo imwe mukuchita?

Vinthu vinyake vya pa Chihema vikapangika mwaluso chomene. Mwachiyelezgero, ŵakerubi ŵagolide awo ŵakaŵa pachanya pa likasa la phangano ŵakapangika mwaluso chomene. Mpositole Paulosi wakati ŵakaŵa ‘ŵauchindami.’ (Heb. 9:5) Pakuti ŵakerubi aŵa ŵakaŵa ŵagolide, ŵakwenera kuti ŵakaŵa ŵakutowa chomene.—Ex. 37:7-9.

Mazuŵa ghano, para ŵanthu ŵangasanga vinthu ivyo Bezaleli na Oholiyabu ŵakapanga, ŵangaviŵika mu nyumba zapachanya chomene zakusungiramo vinthu vyakale. Ŵakerubi aŵa ŵakaŵikika mu Malo Ghatuŵa Chomene, ntheura wasembe mukuru pera ndiyo wakaŵawonanga kamoza pa chaka, pa Zuŵa la Mphepiska. (Heb. 9:6, 7) Ntheura mbanthu ŵachoko chomene awo ŵakaŵawona.

Muŵenge kuti ndimwe Bezaleli panji Oholiyabu ndipo mwafwilirapo kupanga vinthu mwaluso chomene, kasi mukate mujipulikenge wuli kumanya kuti mbanthu ŵachoko waka awo ŵakuviwona? Mazuŵa ghano, ŵanthu ŵakukondwa chomene para ŵanyawo ŵakudokera ivyo ŵachita na kuŵalumba. Para ŵanthu ŵandaŵalumbe ŵakuwona kuti palije icho ŵachitapo. Kweni ŵateŵeti ŵa Yehova ŵakuwona nthena yayi. Iwo ŵakuchita nga ni Bezaleli na Oholiyabu. Ŵakukhorwa para ŵakuchita khumbo la Yehova kweniso ŵakumanya kuti wakuŵatemwa.

Mu nyengo ya Yesu, ŵalongozgi ŵa visopa ŵakatemwanga kulomba munthowa yakuti ŵanthu ŵaŵawone. Kweni Yesu wakakana kuchita nthena. Wakati tilombenge kufumira pasi pa mtima, kwambura kuŵa na chilato chakuti ŵanthu ŵatiwone. Iyo wakati para tachita nthena, ‘Adada ŵithu  awo ŵakulaŵiska kwakubisika ŵazamutipa njombe.’ (Mat. 6:5, 6) Apa ntchakuwonekerathu kuti chakuzirwa chomene ni umo ŵanthu ŵakuwonera malurombo ghithu yayi, kweni umo Yehova wakughawonera. Para Yehova wakughawona kuti ngakuzirwa, mbwenu ngakuzirwa nadi. Ndimo viliriso na uteŵeti uliwose uwo tikuchita. Tileke kughanaghana kuti uteŵeti withu ukuŵa wakuzirwa pekha para ŵanthu ŵakutilumba. Kweni chakuzirwa ni para ukukondweska Yehova, ‘uyo wakulaŵiska kwakubisika.’

Ŵakati ŵamara kupanga chihema chakukumanamo, bingu likachibenekelera ndipo uchindami wa Yehova ukazuzga Chihema. (Ex. 40:34) Apa vikalongolerathu kuti Yehova wakakondwa. Kasi mukughanaghana kuti Bezaleli na Oholiyabu ŵakajipulika wuli pa nyengo iyi? Nangauli pa ivyo ŵakapanga pakaŵavya mazina ghawo, kweni ŵakamanya kuti Chiuta wakatumbika milimo yawo. (Zinth. 10:22) Vyaka vikati vyajumphapo, iwo ŵakwenera kuti ŵakakondwa kuwona kuti ivyo ŵakapanga vichali kugwiliskirika ntchito pakusopa Yehova. Para Bezaleli na Oholiyabu ŵazakawuskika mu charu chiphya, ŵazamukondwa kumanya kuti ivyo ŵakapanga vikagwiliskirika ntchito pakusopa kwaunenesko kwa vyaka 500.

Mu gulu la Yehova mazuŵa ghano, palije apo pakulembeka mazina gha awo ŵakujambura mavidiyo, kudinda vithuzi, kwimba sumu za Ufumu, kujambura vithuzithuzi, kung’anamura mabuku, kweniso awo ŵakulemba. Tingayowoya kuti palije uyo “wakuwona” ivyo ŵakuchita. Ndimo viliriso na milimo yinandi iyo yikuchitika mu mipingo yakujumpha 110,000 pa charu chose. Kasi tose tikuŵapo para muteŵeti wa maakaunti wakulemba lipoti la ndalama kuumaliro wa mwezi? Kasi tose tikuwona para mulembi wakusazga malipoti gha m’munda? Ni njani wakuŵikako mahara para mubali panji mudumbu wakugwira ntchito ya kunozga Nyumba ya Ufumu?

Bezaleli na Oholiyabu ŵakapokerapo yayi nkhombo, mendulu, panji chinthu chilichose chakuŵawonga chifukwa cha kupanga vinthu mwaluso. Kweni chakuzirwa chomene ntchakuti Yehova wakawona ivyo ŵakachita ndipo wakaŵatemwanga. Nase tiŵe ŵakujiyuyura na kuchita uteŵeti withu na mtima wose nga umo wakachitira Bezaleli na Oholiyabu.