1. Kasi tikukhala mu nyengo wuli?

TIKUKHALA mu nyengo “zakusuzga” chomene. Baibolo likuti izi ni nyengo za “mazuŵa ghaumaliro” ndipo zikamba mu 1914. Mu nyengo “zinonono na zakusuzga” izi, vinthu vyahenipa chomene mu charu kuluska kumanyuma kose. (2 Tim. 3:1-5) Tikumanya kuti vinthu vilutilirenge kuhenipa chifukwa Baibolo likuti “ŵanthu ŵaheni na ŵakupusika ŵalutilirenge kuhenipa.”—2 Tim. 3:13.

2. Longosorani umo vyakusanguluska vya mazuŵa ghano viliri. (Wonani chithuzi chakwamba.)

² Ŵanthu ŵanandi mazuŵa ghano ŵakutemwa kuwonelera vyakusanguluska ivyo vikulongora nkhaza, uzaghali, masalamusi, na vinyake ivyo Chiuta wakutinkha. Pa intaneti, pa TV, mu mafilimu, panji mu mabuku na magazini, vinthu vyankhaza na uzaghali ŵakuvilongora nga kuti ni viwemi waka. Mu vigaŵa vinyake malango ghakuzomerezga nkharo ziheni izo kale zikaŵa zakukanizgika. Kweni ndimo Yehova wakuwonera yayi.—Ŵazgani Ŵaroma 1:28-32.

3. Kasi charu chikuŵawona wuli awo ŵakulondezga malango gha Chiuta?

 ³ Ŵakhristu ŵakwambilira ŵakawoneleranga yayi vyakusanguluska vyankhaza na uzaghali. Ntheura ŵanthu ŵakaŵatinkhanga chifukwa chakuti ŵakalondezganga malango gha Chiuta. Petrosi wakati: ‘Pakuti Mwaŵakhristu mukulutilira chara kuchimbira nawo pamoza mu nthowa iyi, mu mathakalimbwa gha makhaliro ghaheni, ŵakuzizwa ndipo ŵakumunenani.’ (1 Pet. 4:4) Mazuŵa ghano napo, ŵanthu ŵakuwona kuti awo ŵakulondezga malango gha Chiuta mbakukhalira. Baibolo likuti ‘wose awo ŵakukhumba kuŵa na umoyo wa kusopa Chiuta mwakujipeleka mwa Khristu Yesu, nawo ŵatambuzgikenge.’—2 Tim. 3:12.

4. Kasi Baibolo likuti vichi pa nkhani ya mendezgano?

⁴ Baibolo likuchiska awo ŵakukhumba kuchita khumbo la Chiuta kuti ŵaleke kutemwa charu ichi na mikhaliro yake. (Ŵazgani 1 Yohane 2:15, 16.) Satana uyo ni ‘chiuta’ wa nyengo iyi ndiyo wakulongozga charu ichi. Wakugwiliskira ntchito visopa, maboma, ŵamalonda, na makampani ghakuthandazga makani kuti wapuluske ŵanthu. (2 Kor. 4:4; 1 Yoh. 5:19) Ntheura Ŵakhristu ŵakwenera kusankha mwavinjeru ŵanthu ŵakuchezga nawo. Baibolo likuchenjezga kuti: ‘Mungapuluskikanga chara. Mendezgano ghaheni ghakunanga makhaliro ghawemi.’—1 Kor. 15:33.

5, 6. Kasi mbanjani awo tikwenera yayi kuchezga nawo, ndipo chifukwa wuli?

⁵ Kuti ubwezi withu na Yehova uleke kunangika, tikwenera kusankha mwamahara awo tikuchezga nawo. Tiŵe maso na ŵanthu awo ŵakukana kupulikira Yehova ndiposo awo ŵakuti ŵakusopa Yehova kweni ŵakulondezga yayi malango ghake. Usange ŵanthu awo ŵakuti Mbakhristu ŵakuchita vinthu viheni, ndipo ŵakusintha yayi, tikuleka kuchezga nawo.—Rom. 16:17, 18.

⁶ Kanandi taŵanthu tikukhumba kuti titemwekenge na ŵanyithu. Ntheura usange tikuchezga na awo ŵakukana kulondezga malango gha Chiuta, nase tingamba kutolera nkharo yawo. Usange tikuchezga na ŵazaghali, nase tingamba kuchita uzaghali. Ivi ndivyo vyachitikira ŵabali na ŵadumbu ŵithu ŵanyake ndipo ŵali kusezgeka chifukwa ŵakasintha yayi nkharo yawo. (1 Kor. 5:11-13) Para ŵakulutilira kuchita nkharo yawo yiheni ŵakuŵa nga ni awo Petrosi wakayowoya.—Ŵazgani 2 Petrosi 2:20-22.

7. Kasi ŵabwezi ŵithu ŵakwenera kuŵa anjani?

⁷ Nangauli tikwenera kuchitira lusungu waliyose, kweni tileke kukolerana panji kuŵa paubwezi na ŵanthu awo ŵakukana kupulikira Chiuta. Ntheura ntchakwenelera yayi kuti Kaboni wa Yehova wasonganenge na munthu uyo wandabatizike panji uyo wakuchindika yayi malango gha Chiuta. Ntchakuzirwa chomene kuŵa paubwezi na Yehova kuluska kutemweka na ŵanthu awo ŵakuleka kulondezga malango gha Yehova. Tikwenera kutemwana na ŵanthu awo ŵakuchita khumbo la Chiuta. Yesu wakati: ‘Yose uyo wakuchita khumbo la Chiuta, uyu ndiyo ni mukuru na munung’una na mudumbu na mama wane.’—Mrk. 3:35.

8. Kasi Ŵaisrayeli ŵakataya mwaŵi wuli chifukwa cha kuchezga na ŵanthu ŵaheni?

⁸ Ŵaisrayeli ŵakataya mwaŵi chifukwa cha kuchezga na ŵanthu ŵambura kusopa Chiuta. Yehova wakawombora Ŵaisrayeli ku Eguputo, ndipo apo wakalutanga nawo ku charu cha layizgano, wakaŵakanizga kuchezga na ŵanthu ŵamitundu yinyake.  Yehova wakati: ‘Mungasindamiranga ŵachiuta ŵawo chara, panji kuŵateŵetera, panji kuchita kwakulingana na milimo yawo, kweni muŵapasulire na kuswa vikozgo vyawo. Muteŵeterenge Yehova Chiuta winu.’ (Ex. 23:24, 25) Kweni Ŵaisrayeli ŵanandi ŵakaleka kupulikira Chiuta. (Sal. 106:35-39) Chifukwa cha kuleka kupulikira Chiuta, pamasinda Yesu wakaphalira Ŵaisrayeli kuti: “Wonani! Nyumba yinu yajowoleka.” (Mat. 23:38) Yehova wakajowora Ŵaisrayeli, ndipo wakasankha Ŵakhristu ŵakuphakazgika kuti ndiwo ŵaŵe ŵanthu ŵake.—Mil. 2:1-4.

9. Kasi Ŵakhristu ŵakwenera kuchita wuli na ivyo charu chikuŵika pa intaneti panji pa TV?

⁹ Vinthu vinandi ivyo charu chikuŵika pa intaneti panji kuwoneska pa TV ni viwemi yayi ku Ŵakhristu. Vinthu ivi vingatovwira yayi kuti tiŵe na chipulikano mwa Yehova na malayizgo yake. Vikuchiska ŵanthu kuti ŵaŵe na makhumbiro ghaheni gha Satana. Ntheura kuti tileke kuŵa na ‘makhumbiro gha charu,’ tikwenera kuŵa maso chomene para tikusankha vinthu vyakuti tiŵazge panji kuwonelera.—Tito 2:12.

10. Ntchivichi chichitikirenge viheni ivyo vili mu charu?

¹⁰ Sonosono apa, charu cha Satana na viheni vyose ivyo chikuŵika pa intaneti panji pa TV viparanyikenge. Baibolo likuti: ‘Charu chikuluta, ntheura pera makhumbiro ghake, kweni uyo wakuchita khumbo la Chiuta wakukhalilira muyirayira.’ (1 Yoh. 2:17) Nakuti wamasalimo wakimba kuti: ‘Ŵaheni ŵadumulikenge; kweni awo ŵakumulindilira Yehova ŵaharenge charu. Ŵakuzika ndiwo ŵaharenge charu, ŵakondwenge na kusakata chomene.’ Kasi ŵazamukhala kwa utali wuli? ‘Ŵakunyoloka ŵamuhara charu na kukhala mwenemumo kwandanda.’—Sal. 37:9, 11, 29.

11. Kasi Chiuta wakutipa wuli chakurya chauzimu?

¹¹ Mu mazuŵa ghaumaliro agha, gulu la Yehova likupeleka vyakuŵazga na vyakuwonelera viwemi, ivyo vikutovwira kuti tiŵe na nkharo iyo yikulongozgera ku umoyo wamuyirayira. Yesu wakalomba kwa Yehova, wakati: ‘Kuti ŵaŵe na umoyo wamuyirayira, ŵakwenera kumumanyani imwe Chiuta waunenesko yekha, ndiposo Yesu Khristu, mweneuyo mukamutuma.’ (Yoh. 17:3) Kwizira mu gulu lake, Dada withu Yehova watipa vyose ivyo vikukhumbikwira kuti timumanye makora. Tili na magazini, maburosha, mabuku, mavidiyo, na Webusayiti ivyo vikutovwira kuti tilutilire kuteŵetera Chiuta. Gulu la Yehova likunozgaso maungano sabata yiliyose mu mipingo yakujumpha 110,000 pa charu chose. Ivyo tikusambira pa maungano agha kweniso pa maungano ghakuru vikukhozga chipulikano chithu mwa Yehova na malayizgo yake.—Heb. 10:24, 25.

12. Kasi mazgu ghakuti kutora panji kutengwa “mu Fumu pera,” ghakung’anamurachi?

¹² Ŵakhristu awo ŵakukhumba kutora panji kutengwa ŵakwenera kuŵa maso chomene na awo ŵakuchezga nawo. Mazgu gha Chiuta ghakuti: “Mungakakikanga joko mwakupambana pamoza na ŵambura kugomezga chara. Pakuti urunji ukukolerana wuli na uchikanamalango? Panji ungweru uli na wenenawene wuli na chisi?” (2 Kor. 6:14) Baibolo likuti ŵateŵeti ŵa Chiuta ŵakwenera kutora panji kutengwa “mu Fumu pera,” kung’anamura kuti ŵakwenera kutorana na munthu wakubatizika uyo wakulondezga malango gha Yehova. (1 Kor. 7:39) Usange mwatorana  na munyinu uyo nayo wakutemwa Yehova, movwiranenge kuti mulutilire kugomezgeka kwa Yehova.

13. Kasi Yehova wakaŵaphalira vichi Ŵaisrayeli pa nkhani ya nthengwa?

¹³ Yehova wakumanya ivyo vingawovwira ŵateŵeti ŵake. Wandasinthe maghanoghano pa nkhani ya kutora panji kutengwa “mu Fumu pera.” Yehova kwizira mwa Mozesi wakaphalira Ŵaisrayeli kuti ŵaleke kutorana na ŵanthu awo ŵakamusopanga yayi. Pakuyowoya za ŵamitundu awo ŵakakhalanga pafupi na Ŵaisrayeli, Yehova wakati: ‘Mungatolerananga nawo nthengwa. Mungamupanga mwana mwanalume wa iwo mwana mwanakazi wako, panji kutolera mwana wako mwanalume mwana mwanakazi wa iwo. Chifukwa tiŵapatuske ŵana ŵinu kuleka kulondezga Ine, mwakuti ŵateŵetere ŵachiuta ŵanyake; ntheura ukali wa Yehova ugolere kwimikana namwe, na kumuparanyani luŵiro.’—Dute. 7:3, 4.

14, 15. Kasi ntchivichi chikachitikira Solomoni chifukwa cha kuzerezga dango la Yehova?

¹⁴ Solomoni mwana wa Davide wakati wapika waka ufumu, wakalomba vinjeru ndipo Yehova wakamupa. Ntheura Solomoni wakamanyikwa chomene kuti ni themba lavinjeru. Nakuti fumukazi ya ku Sheba yikati yiza kuzakamuwona, yikazizwa chomene na vinjeru vya Solomoni, yikati: “Ntha nkhaghagomezga mazgu ndasuka ndiza ndipo maso ghane ghajiwonera; wonani! ntha ŵakandiphalira dera linyake; vinjeru vyako na usambazi wako vikuluska lumbiri ulo nkhapulika.” (1 Mathe. 10:7) Kweni nkhani ya Solomoni yikutisambizga ivyo vingatichitikira usange tasulako malango gha Chiuta na kutorana na munthu wakuwaro.—Muph. 4:13.

¹⁵ Yehova wakamutumbika Solomoni, kweni Solomoni wakazerezga dango la Yehova lakuti Muisrayeli wangatorananga na ŵamitundu yinyake chara. Solomoni wakatora ŵanakazi ŵanandi ŵambura kopa Yehova. Wakaŵa na ŵawoli 700 na ŵanakazi ŵanyake 300. Kasi ntchivichi chikamuchitikira? Solomoni wakati wachekura, ‘ŵawoli ŵake ŵakapatuska mtima wake kulondezga ŵachiuta ŵanyake. Ntheura Solomoni wakachita uheni pamaso pa Yehova.’ (1 Mathe. 11:1-6) Vinjeru vya Solomoni vikamara kweniso wakaleka kusopa Yehova chifukwa cha kuchezga na ŵanthu ŵaheni. Ntheura ivyo vikachitikira Solomoni ni chenjezgo ku ŵateŵeti ŵa Yehova awo ŵakughanaghana vya kutorana na munthu uyo wakuleka kutemwa Yehova.

16. Kasi awo ŵali kutorana na munthu wambura kugomezga ŵalondezge ulongozgi wuli?

¹⁶ Wuli usange munthu wasambira unenesko uku wali kale mu nthengwa? Baibolo likuti: “Imwe ŵawoli, muŵe ŵakujilambika ku ŵafumu ŵinu, mwakuti usange ŵanyake mbambura kupulikira mazgu, ŵawojeke kwambura mazgu kwizira mu makhaliro gha ŵawoli ŵawo.” (1 Pet. 3:1) Ulongozgi uwu ngwa ŵanakazi awo Mbakhristu, kweni ŵafumu nawo ŵakwenera kulondezga ulongozgi uwu usange ŵawoli ŵawo ŵakusopa Yehova yayi. Baibolo likupeleka ulongozgi wakupulikikwa makora, likuti: Mukwenera kuŵa mfumu panji muwoli muwemi ndipo londezgani malango gha Chiuta mu nthengwa yinu. Usange uyo wakusopa Chiuta yayi wakuwona kuti sono muli na nkharo yiwemi, nayo wangamba kuteŵetera Yehova. Ivi ndivyo vyachitikira ŵakutorana ŵanandi.

17, 18. Chifukwa wuli Nowa na Ŵakhristu ŵakwambilira ŵakapona?

¹⁷ Para mukuchezga na ŵanthu ŵaheni, ŵangamupuluskani kuti muleke kupulikira  Yehova. Kweni para mukuchezga na ŵanthu ŵawemi, ŵamovwiraninge kuti muŵe ŵakugomezgeka kwa Yehova. Nowa wali kutilekera chiyelezgero chiwemi. Wakakhalanga mu nyengo iyo Yehova wakawona kuti ‘uheni wa ŵanthu ukaŵa ukuru chomene kweniso kuti maghanoghano gha mtima wawo ghakaŵa ghaheni pera nyengo zose.’ (Gen. 6:5) Ŵanthu ŵakaŵa ŵaheni chomene mwakuti Yehova wakaghanaghana kuti waŵaparanye wose. Kweni ‘Nowa wakaŵa murunji na wakunyoloka mu nthanga yake; Nowa wakendanga na Chiuta.’—Gen. 6:7-9.

¹⁸ Nowa wakachezganga na ŵanthu ŵambura kopa Chiuta yayi. Iyo na mbumba yake ŵakatangwanikanga na ntchito ya kupanga chingalaŵa iyo Chiuta wakaŵatuma. Kweniso Nowa wakaŵa “mupharazgi wa urunji.” (2 Pet. 2:5) Ntchito ya kupharazga na kupanga chingalaŵa, kweniso kuchezga na ŵamumbumba yake, vikawovwira Nowa kuti walutilire kukondweska Chiuta. Ivi vikawovwiraso kuti Nowa na ŵamumbumba yake ŵapone pa Chigumula. Tose tili kufuma kwa iwo. Ntheura tikwenera kuwonga chomene kuti Nowa na mbumba yake ŵakapulikira Chiuta na kukana kuchezga na ŵanthu ŵaheni. Ŵakhristu ŵakwambilira nawo ŵakachezganga na ŵanthu ŵaheni yayi. Ŵakapulikira Chiuta lekani ŵakapona apo Yerusalemu wakaparanyika mu 70 C.E.—Luka 21:20-22.

19. Kasi ntchivichi chingatovwira kuti tiŵe ŵakugomezgeka kwa Yehova?

¹⁹ Nga umo wakachitira Nowa na ŵamumbumba yake kweniso Ŵakhristu ŵakwambilira, nase tingachezganga chara na ŵanthu ŵambura kopa Yehova. Tili na ŵabali na ŵadumbu ŵithu ŵanandi awo tikwenera kuchezga nawo. Mu mazuŵa ghaumaliro agha, para tikuchezga na awo ŵakulondezga malango gha Chiuta, ŵatovwirenge kuti ‘titchinthe mu chipulikano.’ (1 Kor. 16:13; Zinth. 13:20) Para tikusankha mwamahara ŵanthu ŵakuchezga nawo mu mazuŵa ghaumaliro agha, vitovwirenge kuti tizakapone umaliro wa charu chiheni ichi, na kunjira mu charu chiphya icho chili pafupi chomene.