KUFUMA MU NTHAMBA YITHU
“Yehova Wiza Namwe Kuno ku France Kuti Musambire Unenesko”
ANTOINE SKALECKI wakatemwanga kwenda pa hachi apo wakaŵa musepuka. Wakagwiranga ntchito yakufumiska malasha pasi pa mgodi. Utali wa mgodi uwu ukaŵa mamita 500 (mafiti 1,600). Adada ŵake ŵakapwetekeka mgodi wati wagumuka ndipo ivi vikapangiska Antoine kwamba kugwira ntchito pa mgodi kuti wapwelelere mbumba yakwake. Wakagwiranga kwa maora 9 pa zuŵa. Zuŵa linyake, mgodi ukagumuka ndipo Antoine wakate wafwirenge papo.
Ivyo ŵanthu ŵa ku Poland ŵakagwiliranga ntchito mu migodi, mgodi wa ku Dechy pafupi na Sin-le-Noble uko Antoine Skalecki wakagwiranga ntchito
Antoine wakababikira ku France kweni ŵapapi ŵake ŵakaŵa ŵa ku Poland. Ŵakaŵa mu gulu la ŵanthu awo ŵakaluta ku France mu ma 1920 na 1930. Chifukwa wuli ŵanthu ŵa ku Poland ŵakaluta ku France? Nkhondo Yakwamba ya pa charu chose yikati yamara, mu charu cha Poland mukaŵa ŵanthu ŵanandi chomene. Kweni charu cha France chikakhala na ŵanthu ŵachoko chifukwa ŵanalume ŵakujumpha 1 miliyoni ŵakafwa pa nkhondo. Charu ichi chikakhumbanga ŵanthu kuti ŵakagwirenge ntchito mu migodi ya malasha. Ntheura mu Seputembala 1919, vyaru vya France na Poland vikakolerana kuti ŵanthu ŵa ku Poland ŵakagwirenge ntchito ku France. Mu 1931, ku France kukaŵa ŵanthu 507,800 ŵakufuma ku Poland, ndipo ŵanandi ŵakakhalanga mu vigaŵa vya kumpoto uko kukaŵa migodi.
Ŵanthu ŵa ku Poland ŵakalimbikiranga ntchito. Ŵakati ŵiza ku France ŵakalutilira kulondezga kakhaliro na kasopero kawo. Antoine, uyo sono wali na vyaka 90 wakati: “A sekuru ŵane a Joseph ŵakasambizgika Baibolo na adada ŵawo.” Zuŵa lililose la Sabata, ŵanthu ŵa ku Poland ŵakavwaranga makora na kuluta ku tchalitchi. Kweni ŵanthu ŵanyake ŵa ku France ŵakaŵasekanga.
Ŵanthu ŵanandi ŵa ku Poland ŵakamba kukumana na Ŵasambiri ŵa Baibolo ku Nord-Pas-de-Calais. Ŵasambiri aŵa ŵakamba kupharazga mu chigaŵa ichi mu 1904. Mu 1915, Gongwe la Mulinda likamba kufuma mwezi uliwose mu Chipolishi, chiyowoyero cha ŵanthu ŵa ku Poland, ndipo magazini ya Wukani! yikamba mu 1925. Ŵanthu ŵanandi ŵa ku Poland ŵakachonthekanga mtima na fundo za mu Malemba izo zikalembekanga mu magazini agha kweniso mu buku la Zeze wa Mulungu.
Antoine na ŵa mu banja lakwake ŵakamanya vinandi vya Ŵasambiri ŵa Baibolo chifukwa cha asibweni ŵake, awo ŵakamba kuwungana na Ŵasambiri ŵa Baibolo mu 1924. Mu chaka ichi Ŵasambiri ŵa Baibolo ŵakachita ungano wawo wakwamba mu Chipolishi ku Bruay-en-Artois. Pakati pajumpha nyengo yichoko waka, kukiza Joseph F. Rutherford, uyo wakachitiska ungano uwo pakiza ŵanthu 2,000, ndipo ŵanandi ŵakaŵa ŵa ku Poland. Mubali Rutherford wakakondwa chomene kuwona kuti ŵanandi awo ŵakiza pa ungano uwu ŵakaŵa ŵa ku Poland. Iyo wakati: “Yehova wiza namwe kuno ku France kuti musambire unenesko. Sono imwe na ŵana ŵinu movwire ŵanthu ŵa kuno ku France. Ntchito yakupharazga yichali chomene, ndipo Yehova watumenge ŵapharazgi kuti ŵachite ntchito iyi.”
Ivi ndivyo Yehova wakachita nadi. Ŵabali ŵa ku Poland awo ŵakasambira unenesko ŵakalimbikira kupharazga nga umo ŵakachitiranga ku migodi. Ŵabali ŵanyake ŵakawelera ku Poland kuti ŵakawovwire ŵabali ŵawo kuti nawo ŵamanye unenesko. Teofil Piaskowski, Szczepan Kosiak, na Jan Zabuda nawo ŵakawelera ku Poland kuti ŵakapharazge makani ghawemi.
Ŵapharazgi ŵanandi ŵa ku Poland ŵakalutilira kupharazga mu France. Mu 1926, ŵanthu 1,000 ŵakategherezga ungano mu Chipolishi ku Sin-le-Noble ndipo 300 ŵakategherezga mu Chifurenchi. Buku Lapachaka la 1929 likati: ‘Mu chaka ichi ŵanthu 332 ŵa ku Poland ŵakabatizika.’ Pambere Nkhondo Yachiŵiri ya pa charu chose yindambe, pa mipingo 84 iyo yikaŵa ku France, mipingo 32 yikaŵa ya Chipolishi.
Ŵabali ŵa ku Poland ŵakuluta ku ungano. Pa chikhwangwani pakalembeka kuti, “Ŵakaboni ŵa Yehova”
Mu 1947, boma la ku Poland likapempha ŵanthu ŵake kuti ŵawelere kwawo, ndipo Ŵakaboni ŵa Yehova ŵanandi ŵakawelera. Nangauli ŵakawelera, kweni mu chaka ichi ŵapharazgi ŵa Ufumu ŵakasazgikira mu charu cha France. Mu 1948 kufika mu 1950 chiŵelengero cha ŵapharazgi mu France chikakura chomene. Mu 1948, ofesi ya munthavi ku France yikasankha ŵalaŵiliri ŵa dera 5 ŵakwamba mu charu ichi kuti wovwire ŵapharazgi aŵa. Ŵabali ŵanayi ŵakaŵa ŵa ku Poland, ndipo Antoine Skalecki wakaŵa yumoza wawo.
Ŵakaboni ŵanandi ŵa Yehova ŵa ku France ŵali na viwongo vya ŵabali ŵa ku Poland awo ŵakagwiranga ntchito mu migodi. Mazuŵa ghano napo, ŵanthu ŵanandi awo ŵakusamira ku France ŵakusambira unenesko. Ŵabali na ŵadumbu ŵanyake ŵakuwelera ku vyaru vyawo, kweni ŵanyake ŵakulutilira kukhala ku France. Ndipouli wose ŵakulimbikira kupharazga makani ghawemi gha Ufumu nga mbabali na ŵadumbu ŵakwambilira ŵa ku Poland.—Kufuma mu nthamba yithu ya ku France.
Panji Mungatemwa Kuŵerengaso Nkhani Izi
GONGWE LA MULINDA—LAKUSAMBIRA PA MPINGO
Umo Mbuto Zakwamba za Ufumu Zikaseŵekera ku Portugal
Kasi ni masuzgo wuli agho ŵapharazgi ŵa Ufumu ŵakwambilira ŵakatonda ku Portugal?
GONGWE LA MULINDA—LAKUSAMBIRA PA MPINGO
Nkhani Zachisanisani Zikathandazga Unenesko mu Ireland
Ntchivichi chikawovwira Mubali C. T. Russell kugomezga kuti “vuna yacha kale kuti yivunike”?
GONGWE LA MULINDA—LAKUSAMBIRA PA MPINGO
“Kasi Ungano Unyake Tiŵenge Nawo Pawuli?”
Chifukwa wuli ungano wa chigaŵa mu 1932, uwo pakiza ŵanthu ŵachoko waka mu tawuni ya Mexico ukaŵa wapadera?
GONGWE LA MULINDA—LAKUSAMBIRA PA MPINGO
“Nkhongono Zikakwera Ndipo Ŵakamba Kulimbikira Chomene Kupharazga”
Pamanyuma pa ungano wa chigaŵa uwo ukachitika mu 1922, kasi Ŵasambiri ŵa Baibolo ŵakachita wuli na ulongozgi wakuti ‘ŵapharazge Themba na Ufumu wake’?
GONGWE LA MULINDA—LAKUSAMBIRA PA MPINGO
“Palije Msewu Uheni Chomene Panji Malo Ghakutali Chomene”
Kuumaliro kwa m’ma 1920 kweniso kukwambilira kwa m’ma 1930, ŵapayiniya ŵakalimbikira chomene kupharazga makani ghawemi gha Ufumu wa Chiuta mu malo ghakutali gha charu cha Australia.
GONGWE LA MULINDA—LAKUSAMBIRA PA MPINGO
“Wukani! Imwe Ŵapharazgi ŵa Ufumu ŵa ku Britain”
Chiŵelengero cha Ŵapharazgi ŵa Ufumu chikakwera chomene yayi ku Britain kwa vyaka 10. Kasi ntchivichi chikasintha vithu?
