Umo Mungaŵira Mama Wacimwemwe

LERO, pa caru cose capasi, ŵanakazi ŵanandi ŵakugwira nchito zakulembeka. Mu vyaru ivyo ni visambazi, ŵanakazi ŵanandi ŵakugwira nchito zakulembeka, nga ni umo ŵanalume ŵakucitira. Mu vyaru vikavu kanandi ŵanakazi ŵakugwira nchito ya kulima kwa maora ghanandi, mwakuti ŵasangire mbumba zawo vinthu vyakukhumbikwa.

Ŵanakazi ŵanandi ŵali na maghanoghano ghakugaŵikana. Ŵekha ŵakukhumba kugwira nchito yakulembeka mwakuti ŵasange ndarama, kweniso kupwelelera mbumba yawo ndiposo nyumba. Ŵanakazi aŵa kuti ŵakusanga ndarama zakuti ŵagulire cakurya, vyakuvwara, na pakukhala pera yayi, kweniso ŵakuphika cakurya, ŵakucapa vyakuvwara, ndiposo kunozga pa nyumba.

Mwakusazgirapo, ŵamama Ŵacikhristu ŵakuyezgayezga kusambizga ŵana ŵawo umo ŵangaŵira paubwezi na Ciuta. Cristina, mama wa ŵana ŵasungwana ŵaŵiri wakati: “Mwambura kubisa, kugwira nchito yakulembeka, na kucita milimo ya pa nyumba nkhwakusuzga, comenecomene para muli na ŵana ŵacoko. Cikuŵa cakusuzga kuŵapwelelera makora ŵana.”

Kasi nchivici ico cikucitiska ŵamama kugwira nchito yakulembeka? Kasi ni masuzgo wuli agho ŵakukumana nagho? Kasi nchakwenelera kuti mama wagwirenge nchito yakulembeka mwakuti waŵe wacimwemwe?

Cifukwa Ico Ŵamama Ŵakugwilira Nchito Yakulembeka

Kwa ŵamama ŵanandi, kugwira nchito yakulembeka nkhwakukhumbikwa comene. Ŵanji ŵalije mwanalume uyo wangaŵawovwira pa kusanga ndarama zakovwilira mbumba yawo. Ŵakutorana ŵanyake ŵasanga kuti ndarama izo wakupokera munthu yumoza zingakwana yayi pakupwelelera vyakukhumbikwa vya mbumba.

Mbunenesko kuti ni ŵamama wose yayi awo ŵakugwira nchito cifukwa cakuti ŵakukhumba kusanga ndarama zakugulira vyakukhumbikwa. Ŵanandi ŵakugwira nchito yakulembeka cifukwa cakuti ŵakukhumba waka kuŵa ŵakuzirwa. Ŵanyake ŵakukhumba kuti ŵasankhenge ŵekha vyakucita vyakukhwaskana na ndarama panji kuti ŵagulenge vinthu vyakuŵakondweska. Ŵanandi ŵakugwira makora nchito yawo ndiposo ŵakukondwa nayo.

Cifukwa cinyake ico cikupangiska kuti ŵamama ŵagwirenge nchito yakulembeka ni ivyo  ŵakuyowoya ŵanyawo. Nangauli ŵanthu ŵanandi ŵakumanya kuti ŵamama awo ŵakugwira nchito ŵakusuzgika maghanoghano ndiposo ŵakuvuka comene, kweni awo ŵakusankha kuleka kugwira nchito yakulembeka kanandi ŵakuneneka. Mwanakazi munyake wakati: “Nchipusu yayi kuphalira ŵanji kuti ‘nili kusankha kuti nileke kugwira nchito yakulembeka.’” Iyo wakalutilira kuti: “Ŵanyake ŵangamba kuyowoya kweniso kucita vinthu vyakulongora kuti ivyo iwe wasankha ni vyambura kwenelera.” Rebeca, uyo ni mama wa mwana msungwana wa vilimika viŵiri wakati: “Nangauli mu cigaŵa ico tikukhala ŵanthu ŵakumanya kuti ŵanakazi ŵakwenera kupwelelera ŵana ŵawo, kweni nkhughanaghana kuti ŵamama awo ŵakuleka kugwira nchito yakulembeka ŵakuŵawona kuŵa ŵapasi.”

Vigomezgo vya Ŵanthu na Uwo Mbunenesko

Mu vigaŵa vinandi pa caru capasi, manyuzipepara, mawayilesi, na vinyake, vikuyowoya kuti “mwanakazi wanadi” ni uyo wakugwira nchito yapacanya, wakulipilika ndarama zinandi, wakuvwara vyakuvwara vyapacanya ndiposo wakujithemba. Para wafika pa nyumba wakuŵa na nkhongono zakumazgira masuzgo gha ŵana ŵake, zakucenyera mfumu wake para wananga, na kumarana na suzgo lililose la pa nyumba. Unenesko ngwakuti mbanakazi ŵacoko comene awo mbanadi, ŵeneawo ŵangacita ntheura.

Nchito zinandi zakulembeka izo ŵanakazi ŵakugwira zikuŵa zakuvuska ndiposo za ndarama zicoko. Ico cikuŵakhuŵazga comene ŵamama awo ŵakugwira nchito yakulembeka nchakuti, nyengo zinyake ŵakuwona kuti nchito iyo ŵakugwira yikuŵatondeska kulongora maluso ghanji agho ŵali nagho. Buku la Social Psychology likuti: “Nangauli pali fundo yakuti ŵanalume na ŵanakazi ŵayanenge, kweni ŵanalume ŵakulutilira kuŵa pa nchito zapacanya kuluska ŵanakazi. Ntheura ŵanakazi awo ŵakukhumba kuzirwa cifukwa ca nchito ŵali na suzgo likuru.” Nyuzipepara yinyake ya ku spain (El País) yikati: “Ŵanakazi awo ŵakugwira nchito ndiwo ŵakuŵa na suzgo la kwenjerwa cifukwa ca kusuzgika maghanoghano kuluska ŵanalume. Vili nthena cifukwa cakuti ŵakugwira nchito yakulembeka ndiposo nchito za pa nyumba pawo.”

Umo Ŵafumu Ŵangawovwilira

Vili kwa mama waliyose uyo ni Mkhristu kusankha kuti wagwirenge nchito yakulembeka panji yayi. Ndipouli, usange wali na mfumu wake, iyo pamoza na mfumu wake, ŵakwenera kusankhira lumoza pamanyuma pa kudumbiskana makora fundo zose.—Zintharika 14:15.

Wuli usange ŵakutorana ŵasankha kuti wose ŵagwirenge nchito yakulembeka cifukwa cakuti ŵali na ndarama zicoko? Usange vili nthena, mfumu wa mahara wangalondezga ulongozgi wa mu Baibolo wakuti: “Mwa ŵanalume, ntheura pera, mukhale makora na ŵawoli ŵinu kwakuyana na mahara; uku mukumugaŵira nchindi mwanakazi, nga nchiŵiya cakutomborokako, uku muli ŵahariri ŵamoza na wezi wa Umoyo.” (1 Petros 3:7) Mfumu wakulongora kuti wakumucindika muwoli wake mwa kumanya ivyo iyo wangatondeka kucita. Usange nchamacitiko wamovwirenge muwoli wake kucita milimo ya pa nyumba. Nga ni Yesu, mfumu wakwenera kuŵa wakukhumbisiska kucita milimo iyi mwakujicefya. Wakwenera yayi kulambalara milimo iyi cifukwa cakuti nyengo zinyake yingaŵa nga ni para njakukhozga soni. (Yohane 13:12-15) M’malo mwake wawonenge milimo iyi kuŵa yakulongolera citemwa ku muwoli wake uyo wakulimbikira kugwira nchito. Muwoli wake wangawonga comene.—Ŵaefeso 5:25, 28, 29.

Kukolerana nkhwakukhumbikwa comene usange wose mfumu na muwoli ŵakugwira nchito yakulembeka. Fundo iyi yikukhozgereka na nyuzipepara ya ABC, ya ku Spain. Nyuzipepara iyi yikayowoya vinthu vyakukhwaskana na kusanda uko kukacitika na Wupu Wakusanda vya Mbumba. Yikasuska za ciŵelengero cikuru ca ŵanthu awo ŵakupatana mu Spain cifukwa ca “kutondeka kulondezga malango gha cisopa na malango gha kakhaliro” pera yayi, kweniso cifukwa cakuti “ŵamama ŵakugwira nchito ndiposo cifukwa cakuti ŵanalume ŵakatondekanga kovwira ŵawoli ŵawo nchito za pa nyumba.”

Mulimo Wakuzirwa wa Mama Wacikhristu

Nangauli Yehova wali kupeleka kwa ŵadada mulimo wa kusambizga ŵana ŵawo, ŵamama Ŵacikhristu ŵakumanya kuti nawo ŵali kupika mulimo wakuzirwa uwu, comenecomene pa nyengo  iyo mwana wacali mwanici. (Zintharika 1:8; Ŵaefeso 6:4) Apo Yehova wakaphaliranga Ŵaisrayeli kuti ŵasambizgenge ŵana ŵawo Dango lake, wakaphaliranga ŵadada na ŵamama wuwo. Wakamanya kuti mulimo uwu ukakhumbikwira nyengo na kuzika, comenecomene mu nyengo iyo wunthu wa mwana ukuwumbikira. Pa cifukwa ici, Ciuta wakaphalira ŵapapi kuti ŵasambizge ŵana ŵawo para ŵali pa nyumba, para ŵakwenda mu nthowa, para ŵagona pasi, na para ŵakuwuka.—Duteronome 6:4-7.

Baibolo likudidimizga kuzirwa kwa mulimo wa ŵamama para likuti: “Leka kusida dango la ŵanyoko.” (Zintharika 6:20) Mbunenesko kuti mwanakazi wakutengwa wakwenera kufumba dankha mfumu wake pambere wandapeleke dango ku ŵana. Kweni nga ni umo lemba lapacanya ili likulongolera, ŵamama ŵali na wenelero wa kukhazikiska malango. Ndipo ŵana awo ŵakusunga malango gha Ciuta na ghakakhaliro agho ŵakusambizgika na mama wawo wakopa Ciuta, ŵakusanga candulo cikuru comene. (Zintharika 6:21, 22) Teresa, mama uyo wali na ŵana ŵanalume ŵaŵiri wakayowoya cifukwa ico wakulekera kupenja nchito yakulembeka. Iyo wakati: “Mulimo wakuzirwa comene uwo nili nawo ngwa kulera ŵana ŵane kuti ŵateŵetere Ciuta. Nkhukhumba kuti nicite mulimo uwu na nkhongono zane zose umo ningafiskira.”

Ŵamama Awo Vinthu Vikaŵayendera Makora

Themba Lemuel la ku Israyeli likandula comene na amama ŵake awo ŵakayezgayezga kucita makora mulimo wawo. Mazgu ‘agho ŵakalisambizga’ ghali kulembeka mu Mazgu ghakupelekeka na Ciuta. (Zintharika 31:1, 2; 2 Timote 3:16, 17) Umo mama uyu wakalongosolera za umo mwanakazi wamagomezgeka wakwenera kuŵira, vikovwira ŵana ŵanalume kusankha makora munthu wakuti ŵatore. Nchenjezgo zake pa nkhani ya uzaghali na kumwa comene moŵa, ni zakovwira comene nanga ni lero.—Zintharika 31:3-5, 10-31.

Mu nyengo ya Ŵakhristu ŵakwambilira, mpositole Paulosi wakalumba mulimo uwemi uwo Yunike wakacita, wa kusambizga Timote, mwana wake. Pakuti mfumu wake wakasopanga ŵaciuta ŵa ku Girisi, Yunike wakenera kuyezgayezga kukhorweska Timote kuti waŵe na cipulikano mu “Malembo ghatuŵa.” Kasi mphawuli apo Yunike wakambira kumusambizga Malemba Timote? Malemba ghakutiphalira kuti “kwamba ku wanici.” Mu mazgu ghanyake tingayowoya kuti kufuma apo Timote wakaŵira kabonda. (2 Timote 1:5; 3:14, 15) Nchakuwonekerathu kuti cipulikano ca Yunike na ciyelezgero cake, vikapangiska kuti Timote waŵe wakunozgekera kucita mulimo wa umishonare.—Ŵafilipi 2:19-22.

Baibolo likuyowoyaso za ŵamama awo ŵakapokeleranga ŵateŵeti ŵakugomezgeka ŵa Ciuta. Kucita nthena kukawovwira ŵana ŵawo kuti ŵacezgenge na ŵanthu ŵa nkharo iyo ŵakenera kutolerako. Mwaciyelezgero, nyengo zose mwanakazi Mushunemu wakapokeleranga mprofeti Elisha. Ivi vikapangiska kuti Elisha wawuske mwana wake uyo wakafwa. (2 Mathemba 4:8-10, 32-37) Ghanaghaniraniso za Mariya, nyina wa Marko, mulembi wa Baibolo. Wakazomerezga kuti mu nyumba mwake mucitikirenge maungano mu nyengo ya ŵasambiri ŵakwambilira. (Milimo 12:12) Nchakuwonekerathu kuti Marko wakasanga candulo cikuru comene cifukwa ca kucezga na ŵapositole na Ŵakhristu ŵanyake awo ŵakizanga nyengo zose ku nyumba yakwake.

Pali ukaboni wakuti Yehova wakuzirwiska comene ŵanakazi ŵakugomezgeka awo ŵakusambizga ŵana ŵawo fundo zake. Wakuŵatemwa comene ŵanakazi aŵa cifukwa cakuti mbakugomezgeka ndiposo ŵakuyezgayezga kuti mu nyumba mwawo muŵenge ŵanthu ŵakutemwa Ciuta.—2 Samuel 22:26; Zintharika 14:1.

Cakusankha Cakukondweska Comene

Nga ni umo viyelezgero vya mu Malemba ivyo taŵazga vyalongolera, kupwelelera mbumba mwakuthupi, mwauzimu na mu maghanoghano, kukwiziska vyandulo vyapadera comene. Kweni kucita nthena ni mulimo upusu yayi. Mulimo uwo mama wakucita pa nyumba kanandi ukuwoneka ukuru kuluska nchito yapacanya ya pa kampani.

Mbunenesko kuti pamanyuma pakuti mama wafumba mfumu wake, ndipo wasankha kuti waleke kugwira nchito yakulembeka, mbumba yingakhumbikwira kucepeskako kucita vinthu vinyake. Mama wangakhumbikwiraso kuzizipizga para ŵanthu awo ŵakuleka kupulikiska cifukwa  ico wakulekera kugwira nchito yakulembeka ŵakumugoska. Kweni vitumbiko vya kucita nthena ni vinandi comene. Paqui wali na ŵana ŵatatu ndipo wakukhumba kugwira nchito yakulembeka ya nyengo yicoko. Iyo wakati: “Nkhukhumba kuti nyengo zose niŵengepo para ŵana ŵane ŵakuwera ku sukulu mwakuti ŵaŵenge na wakuyowoya nawo.” Kasi ŵana ŵake ŵakwandula wuli? Iyo wakalutizga kuti: “Nkhuŵawovwira kucita nchito iyo ŵasambizgi ŵawo ŵati ŵalembere ku nyumba, ndipo usange ŵaŵa na suzgo nkhuŵawovwira nyengo yeneyiyo. Nyengo iyo tikucezgera lumoza zuŵa na zuŵa yikupangiska kuti tilutilire kuŵa ŵakufwatukirana pakudumbiskana. Nkhuyizirwiska comene nyengo iyi mwakuti nkhakana kugwira nchito yakulembeka ya zuŵa lose iyo nkhapika.”

Ŵamama ŵanandi Ŵacikhristu ŵali kusanga kuti usange ŵacepeskako nyengo yakugwilira nchito yakulembeka, ŵanthu wose mu mbumba ŵakwandula. Cristina, uyo tamuzunura kale wakalongosora kuti: “Nkhati naleka kugwira nchito yakulembeka, mbumba yane yikamba kwenda makora. Nkhaŵa na nyengo yakucezgera na ŵana ŵane kweniso yakovwilira mfumu wane mu nthowa zinandi. Nkhamba kukondwa na kusambizga ŵana ŵane ŵasungwana ndiposo kuwona kuti ŵakusambira na kucita makora vinthu.” Pali cinthu cimoza izo Cristina wakuluwa yayi. Iyo wakukumbukira kuti: “Mwana wane mulara wakasambilira ku sukulu ya mkaka kwenda, kweni mwana wane waciŵiri nkhamusambizga nekha. Wakati wamba kudedemera na kwamba kwenda sitepu yakwamba, apo wakakhumbanga kuwa nkhamukora. Nkhakondwa comene nkhanira!”

Fundo yinyake iyo yikukhumba kuyighanaghanira njakuti ndarama izo zikunangika para mama wacepeskako nyengo yakugwilira nchito yakulembeka zikuŵa zicoko. Cristina wakalongosora kuti: “Ndarama izo zikanangikanga pakupwelelera ŵana, na zakulipilira galimoto, zikaŵanga zakuluska hafu ya malipiro ghane. Tikati taghanaghanirapo mwakupwelelera tikasanga kuti ndarama izo nkhapokeranga ku nchito kwane zikakhalangapo zinandi yayi.”

Pamanyuma pa kusanda ukhaliro wawo, ŵakutorana ŵanyake ŵawona kuti uwemi wakuti muwoli wapwelelerenge mbumba yake, ngukuru comene kuluska ndarama zose izo mbumba yingananga. Mfumu wa Cristina, Paul, wakati: “Nili wakukondwa comene cifukwa cakuti muwoli wane wali kusankha kuti wakhalenge pa nyumba kuti wapwelelerenge ŵana ŵithu ŵaŵiri. Tose tikasuzgikanga comene apo muwoli wane wakagwiranga nchito yakulembeka.” Kasi kucita nthena kukaŵawovwira wuli ŵana ŵawo ŵaŵiri ŵasungwana? Paul wakalutizga kuti: “Ŵakujipulika kuŵa ŵakuvikilirika pera cara, kweniso ŵakuthaskika ku nkharo ziheni za pa wanici.” Cifukwa wuli mbumba iyi yikuwona kuti nchakuzirwa comene kucezga na ŵana ŵawo? Paul wakati: “Nakhorwa kuti usange taŵapapi tatondeka kulemba viwemi mu mitima ya ŵana ŵithu, munyake ndiyo wamulembamo.”

Ŵakutorana wose ŵakwenera kusanda ŵekha mukhaliro wawo, ndipo paŵavye uyo wakwenera kususka ŵanyake pa ivyo ŵasankha. (Ŵaroma 14:4; 1 Ŵatesalonika 4:11) Nangauli vili nthena, nchiwemi kughanaghanira za vyandulo vinandi ivyo mbumba yikusanga para mama wakuleka kugwira nchito yakulembeka. Paumaliro, Teresa, uyo mazgu ghake ghayowoyeka kale, wakati: “Palije cinthu ico cingapangiska kuti wamunthu uŵe na cimwemwe kuluska kupwelelera na kusambizga ŵana ŵako.”—Salmo 127:3.

[Cithuzithuzi pa peji 29]

Ŵamama Ŵacikhristu ŵakovwira pa mulimo wa kusambizga ŵana ŵawo