Sambirani Kufuma mu Mazgu gha Ciuta

Kasi Ŵakufwa Ŵazamuwuka?

Nkhani iyi yili na mafumbo agho panji muli kujifumbapo ndipo yikulongora uko mungasanga mazgoro mu Baibolo linu. Ŵakaboni ŵa Yehova ŵaŵenge ŵakukondwa kudumbiskana namwe mazgoro ghake.

1. Nchivici cizamucitikira ŵakufwa?

Apo Yesu wakafika ku Betaniya kufupi na Yerusalemu, Lazaro, mubwezi wake wakaŵa kuti wali mu dindi mazuŵa ghanayi. Yesu wakaluta ku dindi na Mariya ndiposo Marita, ŵadumbu ŵa Lazaro. Mwaluŵiro, wumba ukuru ukawungana. Ghanaghanirani waka umo Marita na Mariya ŵakakondwera apo Yesu wakawuska Lazaro.—Ŵazgani Yohane 11:20-24, 38-44.

Marita wakagomezganga kuti ŵakufwa ŵazamuwuka. Kwamba kale, ŵateŵeti ŵakugomezgeka ŵa Yehova ŵakumanya kuti kunthazi Ciuta wazamuwuska ŵakufwa ndipo ŵazamukhalaso pa caru capasi.—Ŵazgani Job 14:14, 15.

2. Kasi ŵakufwa ŵakumanya cilicose?

Nangauli “mzimu” ndiwo ukupangiska munthu kuŵa wamoyo, kweni mzimu pa iwo wekha nkhanthu kapadera ako kakukhala mwa munthu yayi. (Mupharazgi 3:19; Genesis 7:21, 22) Ise tili kulengeka kufuma ku dongo. (Genesis 2:7; 3:19) Para wongo withu wafwa, vyose ivyo tikughanaghana vikumalira papo. Ndico cifukwa cake Lazaro wakati wawuskika, wakayowoyapo kalikose yayi kakukhwaskana na ivyo vikacitikanga apo wakafwa cifukwa ŵakufwa ŵakumanya kalikose yayi.—Ŵazgani Salmo 146:4; Mupharazgi 9:5, 10.

Nchakuwonekerathu kuti ŵakufwa ŵangasuzgika yayi. Ntheura cisambizgo cakuti para ŵaheni wafwa Ciuta wakuŵawocha na moto kucanya nchautesi. Cisambizgo ici cikuyuyura Ciuta. Kocha ŵanthu kukumuseluska Ciuta.—Ŵazgani Yeremiya 7:31.

  3. Kasi tingayowoya na ŵakufwa?

Ŵakufwa ŵangayowoya yayi. (Salmo 115:17) Kweni para ŵangelo ŵaheni ŵakuyowoya na ŵanthu, ŵangajizgora nga ni mzimu wa munthu wakufwa. (2 Petrosi 2:4) Yehova wakukanizga kuyowoya na ŵakufwa.—Ŵazgani Duteronome 18:10, 11.

4. Mbanjani awo ŵazamuwuskika?

Mu caru ciphya, ŵanthu ŵanandi awo ŵali mu malaro ŵazamuwuskika. Nanga ni ŵanthu ŵanyake awo ŵakacitanga viheni cifukwa ca kuleka kumanya Yehova ŵazamuwuskika.—Ŵazgani Luka 23:43; Milimo 24:15.

Awo ŵazamuwuskika ŵazamusambira unenesko wakukhwaskana na Ciuta na kulongora cipulikano mwa Yesu mwa kumupulikira. (Uvumbuzi 20:11-13) Awo ŵazamuwuskika na kucita viwemi ŵazamusangwa na umoyo wamuyirayira pa caru capasi. Kweni ŵanthu ŵanyake awo ŵazamuwuskika ŵazamulutilira kucita viheni. Ŵanthu ŵanthena aŵa “ŵazamuwukira ku ceruzgo.”—Ŵazgani Yohane 5:28, 29.

5. Kasi ciwuka cikutisambizgaci za Yehova?

Ciwuka cizamuŵako cifukwa cakuti Ciuta wakatuma Mwana wake kuzakapeleka umoyo wake cifukwa ca ise. Ntheura, ciwuka nchilongolero cakuti Yehova wakutitemwa comene ndiposo wakutilengera lusungu.—Ŵazgani Yohane 3:16; Ŵaroma 6:23.

Kuti mumanye vinandi, wonani vipaturo 6 na 7 mu buku ili, Kasi Baibolo Likusambizgaci Comenecomene?, lakupharazgika na Ŵakaboni ŵa Yehova.

[Cithuzithuzi pa peji 16]

Adamu wakafuma ku dongo