Kasi Mukumanya?

Kasi fundo yakuti mpositole Petrosi wakakhala na wakunyuka vikumba pambere wandaphalirike kuluta kwa Koroneliyo yikutisambizgaci?

▪ Nkhani ya mu buku la Milimo yikuti Petrosi “wakakhala mu Yopa mazuŵa ghanji na Simoni yunji, wakunyuka vikumba,” uyo wakaŵa na “nyumba pafupi na nyanja.” (Milimo 9:43; 10:6) Ŵayuda ŵakawonanga nchito ya wakunyuka vikumba kuŵa yaukazuzi ndiposo yapasi. Buku la malango gha Ciyuda likati nchito ya kunyuka vikumba njiheni comene kuluska ya kuyora ulongwe. Nchito ya Simoni yikamupangiskanga kuti kanandi wakorenge nyama zakufwa, ico cikung’anamura kuti nyengo zose wakaŵanga wakufipirwa. (Leviticus 5:2; 11:39) Kuyana na umo mabuku ghanandi ghakuyowoyera pa nkhani iyi, Simoni wakwenera kuti wakagwiliskiranga nchito maji gha mu nyanja pakucita mulimo uwu, ndipo malo agho wakagwiliranga nchito ghakwenera kuti ghakaŵa kuwaro kwa tawuni cifukwa pakuŵa “sungu liheni comene” para ŵakunyuka vikumba.

Nangauli vikaŵa nthena, nchakuwonekerathu kuti Petrosi wakawonapo suzgo lililose yayi kukhala pamoza na Simoni. Ici cikulongora kuti Petrosi wakasambira kukana sankho ilo Ŵayuda ŵakaŵa nalo ku ŵanthu awo ŵakaŵawonanga ŵakufipirwa, nga umo Yesu nayo wakacitira.—Mateyu 9:11; Luka 7:36-50.

Kasi mazgu gha Yesu ghakuti “wayowoya wekha” ghakung’anamuraci?

▪ Apo Kayafa, uyo wakaŵa musofi mukuru wa Ŵayuda wakaphalira Yesu kuti wayowoye pakweru usange ni Khristu Mwana wa Ciuta, Yesu wakazgora kuti: “Wayowoya wekha.” (Mateyu 26:63, 64) Kasi wakang’anamurangaci?

Yesu wakazerezganga fumbo la Kayafa yayi. Mazgu ghakuti “wayowoya wekha” ghakuwoneka kuti ndigho Ŵayuda ŵakatemwanga kuyowoya para ŵakukhumba kukhozgera kuti fundo iyo yayowoyeka njaunenesko. Mwaciyelezgero, buku la malango gha Ŵayuda la mu Yerusalemu, ilo likanozgeka mu 300 C.E., likuyowoya za Muyuda munyake uyo wakati wafumbika usange rabi wafwa wakazgora kuti: “Wayowoya wekha.” Uku kukaŵa kukhozgera kuti rabi wafwa nadi.

Yesu wakamanyanga kuti musofi mukuru wali na mazaza gha kumulapizga kuti wayowoye unenesko. Kweniso, Yesu wakhalenge cete mphanyi cikang’anamuranga kuti wakukana kuti ni Khristu. Ntheura, zgoro la Yesu lakuti “Wayowoya wekha” likakhozgeranga kuti ivyo musofi mukuru wakafumbanga ni vyaunenesko. Nkhani yakuyana waka iyo yikalembeka na Mariko yikulongora kuti apo Kayafa wakafumba Yesu kuti wayowoye usange ni Mesiya, Yesu wakazgora mwacikanga kuti: “Ndine.”—Mariko 14:62; wonaniso Mateyu 26:25 na Mariko 15:2.

[Cithuzithuzi pa peji 18]

Kunyuka Vikumba ku Fez, Morocco