Visopa vyakupambanapambana vikuti Ciuta wali palipose, kung’anamura kuti panyengo yimoza wakukhala malo ghakupambanapambana. Mwaciyelezgero, buku la New Catholic Encyclopedia likuti Ciuta “wakukhala palipose ndiposo mu vinthu vyose ivyo wali kulenga.” John Wesley uyo wakambiska Chalichi la Methodist, wakalemba nkhani ya mutu wakuti “Ciuta Wali Palipose” ndipo wakati “kulije malo agho Ciuta wangaleka kusangika, Ciuta wakusangika nanga ni uko kulije vilengiwa.”

Kasi Baibolo likusambizgaci? Kasi Ciuta wakukhala palipose pa nyengo yimoza, kwali nkhucanya, pa caru capasi, ndiposo mu mitima ya ŵanthu?

Baibolo likuyowoya uko Ciuta wakukhala. Likuti wakukhala kucanya. Mu Baibolo muli kulembeka lurombo ulo Themba Solomoni wakalomba. Iyo wakati kwa Ciuta: “Imwe mupulike Imwe kucanya malo ghinu ghakukhalamo.” (1 Mathemba 8:43) Apo Yesu Khristu wakasambizga ŵasambiri ŵake kulomba, wakaŵaphalira kuti ŵalombenge kuti “Ŵadada ŵithu imwe muli kucanya.” (Mateyu 6:9) Baibolo likuti Khristu wakati wawuka, wakanjira “kucanya kweneco kuti sono wakawonekere pamaso pa Ciuta.”—Ŵahebere 9:24.

Mavesi agha ghakulongora pakweru kuti Yehova Ciuta wakukhala palipose yayi kweni wakukhala kucanya pera. Kweni kucanya uko kukuzunulika mu mavesi agha ni mu mlengalenga yayi, nesi uko kuli nyenyezi. Kucanya uko ise tikuwona kungakhala Mlengi wa cilengiwa cose yayi. (1 Mathemba 8:27) Baibolo likutiphalira kuti “Ciuta ni Mzimu.” (Yohane 4:24) Wakukhala kucanya uko ise tingawonako yayi cifukwa ni malo ghauzimu.—1 Ŵakorinte 15:44.

Kweni kasi Baibolo likung’anamuraci para likulongora kuti Ciuta wali palipose? Mwaciyelezgero, pa Salmo 139:7-10, Davide wakalemba kuti: “Ndiyenkhu kutayana na mzimu winu? Ndicimbilirenkhu kufumapo pamaso pinu? Usange ndikwelere kucanya, muli kuko! Usange nditandike mphasa yane mu Sheole, muli kuko. Usange ndijitolere mapapindo gha mulenji kuyakakhala ku mphelerekezgo za nyanja, nanga nkhwenekuko woko linu lindilongozgenge.” Kasi mavesi agha ghakulongora kuti Ciuta wakukhala pa malo ghalighose mwakuti wali mu malo ghose agho ghazunulika apa?

Wonani kuti Davide wakafumba dankha kuti: “Ndiyenkhu kutayana na mzimu winu?” * Na mzimu wake utuŵa, Ciuta wangawona cilicose, ndipo wangalongora nkhongono yake pa malo ghalighose, kwambura iyo kulutako panji kukakhalako. Mwaciyelezgero, mu vilimika vyasonosono, ŵasayansi ŵasanda dongo ilo lili ku pulaneti lakucemeka Mars. Pulaneti ili lili kutali comene na Caru Capasi. Kasi ŵalisanda wuli? Iwo ŵali kucita kulutako yayi ku pulaneti ili, kweni ŵakatumizgako cinthu ico cikuŵa nga ni ndege ndipo cikajambura vithuzithuzi na kuvitumizga pa Caru Capasi.

Mwakuyana waka, Yehova Ciuta wakukhumbikwira kuti waŵe palipose yayi kuti wawone ivyo vikucitika mu caru. Mazgu gha Ciuta ghakuti: “Kulije cilengiwa ico nchambura kuwonekera pamaso pake.” (Ŵahebere 4:13) Mzimu utuŵa panji kuti nkhongono iyo Yehova wakugwiliskira nchito yingafika palipose, ndipo yingapangiska kuti wawone vyose na kufiska khumbo lake nangauli wangaŵa kuti wali kucanya, ku ‘malo ghake ghatuŵa ghakukhalamo.’—Duteronome 26:15.