“A Yehova, . . . Mwandimanya!”
Sendelerani kwa Ciuta
“A Yehova, . . . Mwandimanya!”
“PALIJE cinthu cakuŵinya comene kuluska kumanya kuti palije uyo wakupwelerako za ise panji kutipulikiska.” * Kasi namwe mukukolerana nagho mazgu agha? Kasi namwe muli kujipulikapo kuti palije uyo wakupwelerako vya imwe panji kumupulikiskani? Para ni nthena, fundo iyi yingamupembuzgani: Yehova wakupwelelera comene awo ŵakumusopa ndipo wakumanya vyose ivyo vikuŵacitikira pa umoyo wawo. Mazgu gha Davide gha pa Salmo 139 ghakulongora kuti fundo iyi njaunenesko.
Davide wakagomezganga kuti Ciuta wakumughanaghanira, wakati: “A Yehova mwandisanda, mwandimanya!” (Vesi 1) Apa Davide wakayowoya mazgu ghawemi comene. Lizgu Lacihebere ilo lili kung’anamurika kuti ‘kusanda’ lingang’anamura kujima libwe la mtengo (Job 28:3), kwendera caru (Ŵeruzgi 18:2), panji kufumbilira ukaboni pa nkhani yinyake (Duteronome 13:14). Yehova wakutimanya nadi makora, mwakuti vili nga kuti wakusanda cilicose pa umoyo withu. Mazgu agho Davide wakayowoya ghakutisambizga kuti Ciuta wakutemwa ŵateŵeti ŵake. Wakuŵasanda ndipo wakuŵamanya waliyose payekha.
Davide wakalongosora umo Ciuta wakutisandira, wakati: “Mukumanya para ndakhala pasi na para ndawuka; mukupulikiska patali maghanoghano ghane.” (Vesi 2) Mbunenesko kuti, Yehova wali “patali,” wakukhala kucanya. Kweni, wakutimanya para takhala pasi, panji kuti tipumulepo, ndiposo para tawuka mulenji na kucita milimo yithu ya zuŵa na zuŵa. Wakumanyaso maghanoghano ghithu, ivyo tikukhumba, na ivyo ticitenge. Kasi Davide wakaŵa na wofi cifukwa cakuti Yehova wakamusandanga comene? Yayi, wakaŵa wakukondwa kuti Yehova wakumusanda. (Vesi 23, 24) Cifukwa wuli?
Davide wakamanya kuti Yehova wakusanda ŵateŵeti Ŵake kuti waŵasange vifukwa yayi. Pakukhozgera fundo iyi, Davide wakalemba kuti: “Mukupenja na kumanya uko nkhwenda na apo ndagona, mwazgoŵerana nagho mendero ghane ghose.” (Vesi 3) Zuŵa lililose, Yehova wakuwona ‘mendero ghithu ghose,’ kung’anamura kuti wakuwona maubudi ghithu, kweniso milimo yithu yiwemi. Kasi wakutisanda kuti watisange vifukwa panji kuti wawone viwemi mwa ise? Lizgu Lacihebere ilo lili kung’anamurika kuti ‘kupenja’ lingang’anamuraso “kusefa” panji “kuwuluska,” nga umo mulimi wakuwuluskira malezi kuti wawuskeko mwelero. Mazgu ghakuti “mwazgoŵerana nagho” ghali kufuma ku lizgu Lacihebere ilo likung’anamura “kuzirwiska.” Para zuŵa lililose Yehova wakusanda ivyo ŵateŵeti ŵake ŵakuyowoya na kucita, wakuzirwiska comene viwemi. Cifukwa wuli? Wakuzirwiska ivyo ŵakuyezgayezga kucita kuti ŵamukondweske.
Lemba la Salmo 139 likutisambizga kuti Yehova wakupwelelera comene awo ŵakumusopa. Zuŵa lililose wakuŵasanda na kuŵavikilira. Lekani wakumanya masuzgo agho ŵakukumana nagho ndipo wakupulikiska ulwilwi uwo ŵakuŵa nawo mu maghanoghano na mu mtima cifukwa ca masuzgo agha. Kasi muli ŵakunozgeka kusopa Ciuta wanthena uyu? Para ni nthena, manyani kuti Yehova ‘wazamuluwapo yayi mulimo winu na citemwa ico mukalongora ku zina lake.’—Ŵahebere 6:10.
Vyapaturo Ivyo Mungaŵazga mu Seputembala:
[Mazgu ghamusi]
^ ndime 3 Mazgu agha wakalemba ni Arthur H. Stainback.
