▪ Kasi muli kuviwonapo vithuzithuzi panji dirama la kubabika kwa Yesu? Ŵakulongora mathemba panji ŵanalume ŵavinjeru ŵatatu awo ŵakiza kuzakawona Yesu mu ciŵaya. Ŵakuti Ciuta wakatuma nyenyezi kuti yilongozgere ŵanthu aŵa ku Betelehemu, mpaka mu ciŵaya. Ŵana ŵanandi ŵakumanya na mazina wuwo gha mathemba ghatatu agha. Ŵakuti ni Mekiyoro (Melchior), munyake ni Kasipara (Caspar), ndipo wacitatu ni Balitazara (Baltazar). Kweni kasi nkhani iyi yikuyana na ivyo Baibolo likuyowoya? Yayi. Pali vinandi ivyo vikupambana.

Cakwamba, kasi ŵanthu aŵa ŵakaŵa ŵanjani? Mu Baibolo ilo likalembeka pakwamba nkhanira mu Cigiriki, ŵanthu aŵa ŵakucemeka mathemba panji ŵavinjeru yayi. Kweni ŵakucemeka ŵamagi, panji ŵakumanya vya nyenyezi. Ŵanthu aŵa ŵakwenera kuti ŵakaŵa ŵakuwukwa. Pakuwukwa ŵakalondezganga umo nyenyezi zikwendera. Baibolo likuzunura yayi mazina ghawo, nesi unandi wawo.

Caciŵiri, kasi ŵanthu aŵa ŵakaluta pawuli kukawona Yesu? Ŵakaluta apo wakaŵa mu ciŵaya yayi. Kasi tikumanya wuli? Mateyu, yumoza wa awo ŵakalembako makani ghawemi wakuti: “Ndipo ŵakati ŵanjira mu nyumba ŵakawona mwana pamoza na Mariya nyina.” (Mateyu 2:11) Lemba ili likuti nyengo iyo ŵanthu aŵa ŵakizira, Yesu wakaŵa bonda yayi, kweni “mwana.” Kweniso Mariya na Yosefe ŵakagonanga mu ciŵaya yayi, kweni ŵakakhalanga mu nyumba.

Cacitatu, ni njani uyo wakatuma nyenyezi kuti yiŵalongozge ŵakumanya vya nyenyezi? Ŵaliska ŵanandi ŵakusambizga kuti Ciuta ndiyo wakatuma nyenyezi iyi. Kasi ndiyo nadi wakayituma? Kumbukani kuti nyenyezi iyi pakwamba yikaŵalongozgera ku Betelehemu yayi. Kweni yikaŵalongozgera kwa Themba Herode ku Yerusalemu. Ŵakaphalira Herode kuti kuli Yesu. Ici cikaŵa cakofya, cifukwa Herode wakaŵa wasanji comene, ndipo wakakwiya kupulika kuti mwana uyu wazamuŵa “themba la Ŵayuda.” (Mateyu 2:2) Herode wakacita ucenjezi. Wakapangana na ŵanthu ŵara kuti para ŵawerako kukamuwona mwana, ŵazakamuphalire uko wali mwakuti nayo wakamusindamire. Kufuma apo, nyenyezi yikalongozgera ŵakumanya vya nyenyezi kwa Yosefe na Mariya. Ciuta walekenge kunjilirapo mphanyi ŵakumanya vya nyenyezi ŵara ŵakamukomeska mwana. Yewo Ciuta kunjilirapo. Herode wakati wawona kuti ŵakumanya vya nyenyezi ŵandizeko kuzakamuphalira vya mwana, wakakwiya comene, ndipo wakatuma ŵanthu kukakoma ŵasepuka wose mu Betelehemu na mu vigaŵa vyapafupi, ŵa vilimika viŵiri kukhilira pasi.—Mateyu 2:16.

Pakuyowoya za Yesu, Yehova wakati: “Uyu ni Mwana wane, wakutemweka, mweneuyo nkhukondwa nayo.” (Mateyu 3:17) Jifumbani kuti: Pakuti Ciuta ni Dada wacitemwa kweniso murunji, kasi wangatuma ŵanthu ŵambura kumumanya na ŵakuwukwa kuti ŵaŵe mathenga ghake? Nakuti asi Ciuta wakutinkha kuwukwa? (Duteronome 18:10) Kasi wangatumira dala nyenyezi kuti yiŵalongozgere kwa munthu wakofya comene mu caru kuti ŵakamuphalire uthenga uwo ungamukwiyiska? Kweniso, pakumanya kuti ŵalwani ŵakupenja mwana wake, kasi Ciuta wangatumira dala nyenyezi kuti yivumbulire ŵakumanya vya nyenyezi uko wakaŵa?

Tiyelezgere kuti mulara wa ŵasilikari watuma msilikari uyo wakumugomezga ku caru ca ŵalwani ŵake. Kasi wangaŵavumbulira ŵalwani ŵake uko ŵangasanga msilikari uyu? Yayi. Mwakuyana waka, Yehova wakatuma mwana wake ku caru cakofya ici. Kasi wangaphalira wuli Themba Herode uko kukaŵa Mwana Wake, pa nyengo yakuti mwana uyu walije civikiliro?

Ni njani pera uyo wakatuma nyenyezi, panji titi cinthu cakuwoneka nga ni nyenyezi? Jifumbani kuti: ‘Ni njani uyo wakakhumbanga kuti Yesu wakomeke mwakuti waleke kukura na kufiska nchito iyo wakatumika pa caru capasi? Ni njani uyo wakupuluska ŵanthu na kuthandazga mautesi, kucocozera vivulupi na kukomana?’ Yesu wakati munthu uyu ni “mutesi ndipo ni wiske wa utesi,” nakuti “wakukoma ŵanthu kufuma papo kale.” Ni Satana Dyabulosi.—Yohane 8:44.