Baibolo Likusintha Umoyo wa Ŵanthu

KASI mwanalume wa ku Scotland wakawona kuti nchivici cikaŵa cakuzirwa comene kuluska bizinesi iyo yikamwenderanga makora? Nchivici cikawovwira mwanalume munyake ku Brazil kusida nkharo yake yiheni na kuleka kukhweŵa munkhwala wakuzweteska wongo? Kasi mwanalume munyake wa ku Slovenia wakacita wuli kuti waleke kumwa comene phere? Ŵazgani ivyo ŵanthu aŵa ŵakuyowoya.

“Nkhawonanga Umoyo Kuŵa Wakunozga.”​—JOHN RICKETTS

CILIMIKA ICO WAKABABIKIRA: 1958

UKO WAKABABIKIRA: SCOTLAND

IVYO WAKACITANGA: BIZINESI YAPACANYA

UMO NKHAŴIRA KALE: Nkhaŵa wakukondwa cifukwa ca umo nkhalelekera na ŵapapi ŵane. Adada ŵakaŵa mulara wa ŵasilikari ku Britain, ntheura mbumba yithu yikendendekanga comene. Padera pa kukhala ku Scotland, tikakhalapo ku England, Germany, Kenya, Malaysia, Ireland na ku Cyprus. Kufuma waka apo nkhaŵa na vilimika vinkhondi na vitatu nkhasambiranga mu masukulu ghakugonera kuko ku Scotland. Paumaliro, nkhamalizga masambiro ghane pa Yunivesite ya Cambridge.

Apo nkhaŵa na vilimika 20, nkhamba kucita bizinesi ya mafuta. Ndipo bizinesi iyi nkhayicita kwa vilimika 8. Pakwamba, nkhacitiranga ku South America, pamasinda, mu Africa, ndipo paumaliro ku Western Australia. Nkhati naluta ku Australia nkhamba bizinesi yinyake ndipo pamasinda nkhayiguliska.

Ndalama izo nkhasanga zikanipangiska kuti nileke nchito ndipo panyengo iyi nkhaŵa na vilimika 40. Ntheura nkhamba kwendendeka waka. Nkhazingilira kaŵiri caru ca Australia pa njinga yamoto, kweniso nkhazingilira caru cose. Nkhawonanga umoyo kuŵa wakunozga.

UMO BAIBOLO LIKASINTHIRA UMOYO WANE: Pambere nindaleke nchito nkhapenjanga nthowa ya umo ningawongera Ciuta cifukwa ca umoyo uwo nkhasangwanga nawo. Nkhamba kuluta ku chalichi la Anglican ilo nkhakuliramo. Kweni ŵakalongosoranga vinandi yayi kufuma mu Baibolo. Kufuma apo, nkhamba kusambira na ŵanthu ŵa chalichi la Mormoni kweni ŵakanigongoweska cifukwa ŵakaligomezganga yayi Baibolo.

Zuŵa linyake Ŵakaboni ŵa Yehova ŵakiza pa nyumba yane. Nyengo yeneyiyo nkhawona kuti ivyo ŵakusambizga vikufuma mu Baibolo. Lemba limoza ilo ŵakaniŵazgira likaŵa la 1 Timote 2:3, 4. Mavesi agha ghakuti khumbo la Ciuta ndakuti “ŵanthu ŵa mitundu yose ŵafike pa kumanya makora unenesko.” Nkhakondwa comene kuwona kuti Ŵakaboni ŵakalongosoranga unenesko wa mu Baibolo.

Namanya unenesko cifukwa ca kusambira Baibolo na Ŵakaboni ŵa Yehova. Mwaciyelezgero, nasambira kuti Ciuta na Yesu ŵali mu gulu la  Ŵaciuta ŵatatu yayi, kweni mbanthu ŵaŵiri ŵakupambana. (Yohane 14:28; 1 Ŵakorinte 11:3) Nkhakondwa kumanya unenesko uwu. Nkhadandawura kuti nkhamalira nyengo yinandi kulimbana na kupulikiska cisambizgo cakusuzga cakuti kuli Ŵaciuta ŵatatu mwa yumoza.

Mwaluŵiro nkhamba kuwungana na Ŵakaboni ŵa Yehova. Nkhakondwaso cifukwa ca mtima waubwezi na nkharo yiwemi iyo waliyose wakaŵa nayo. Nkhakhorwa kuti nasanga cisopa caunenesko cifukwa ca citemwa cawo cambura upusikizgi.—Yohane 13:35.

UMO NASANGIRA CANDULO: Nati nabapatizika nkhasangana na mwanakazi muwemi zina lake Diane. Wakakulira mu mbumba ya Ŵakaboni ŵa Yehova, ndipo wakaŵa na mikhaliro yiwemi iyo yikanikondweska. Pamasinda tikatorana. Umo ine na Diane tikutemwerana kweniso wovwiri uwo wakunipa, nkhuwona kuti ni thumbiko lakufuma kwa Yehova.

Ine na Diane tikadokeranga kusamira uko kukakhumbikwiranga ŵapharazgi ŵanandi ŵa makani ghawemi gha mu Baibolo. Mu 2010, tikasamira ku Belize ku Central America. Ku malo agha tikupharazgira ŵanthu awo ŵakutemwa Ciuta ndipo ŵali nadi na nyota ya kumanya unenesko wa mu Baibolo.

Nili na mtende wa mu maghanoghano cifukwa cakuti namanya unenesko wakukhwaskana na Ciuta na Mazgu ghake Baibolo. Pakuti ndine muteŵeti wanyengozose, nkhukondwa kusambizga ŵanthu ŵanandi Baibolo. Palije cinthu cakukondweska kuluska kuwona umo Baibolo likusinthira umoyo wa munthu, nga umo likasinthira umoyo wane. Paumaliro nkhamanya umo ningawongera Ciuta cifukwa ca umoyo uwemi uwo nkhusangwa nawo.

“Ŵakanilongora Lusungu Lukuru.”​—MAURÍCIO ARAÚJO

CILIMIKA ICO WAKABABIKIRA: 1967

UKO WAKABABIKIRA: BRAZIL

IVYO WAKACITANGA: WAKAŴA NA NKHARO ZIHENI

UMO NKHAŴIRA KALE: Nkhakulira mu tawuni yicoko ya Avaré, mu caru ca São Paulo. Ŵanthu ŵanandi mu tawuni iyi mbakavu.

Ŵadada ŵakafwa pambere nindababike. Apo nkhaŵa musepuka, nkhavwaranga malaya gha ŵamama para ŵafumapo. Nkhamba kucita vinthu nga ndine mwanakazi ndipo ŵanthu ŵakamba kuniwona nga njumoza wa awo ŵali na nkharo zakugonana na ŵanalume ŵanyawo. Pamasinda, nkhamba kugonana na ŵanyamata ŵanyane kweniso ŵanalume ŵanji.

Apo nkhaŵa na vilimika vya m’ma 19 nkhakhumbanga kugonana na wose (ŵanalume na ŵanakazi), kulikose uko ningaŵasanga, kwali nkhu bala panji ku machalichi. Pa viphikiro, nkhavwaranga nga ni mwanakazi nakwamba kuvina gule wakucemeka samba ndipo nkhamanyikwa comene.

Ŵanji mwa ŵabwezi ŵane ŵakaŵa awo ŵakugonana ŵanalume ŵekhaŵekha, mahule na ŵanthu awo ŵakugwiliskira nchito minkhwala yakuzweteska wongo. Ŵanyake ŵakanicicizga kuti nikhweŵenge munkhwala wakuzweteska wongo, ndipo mwaluŵiro nkhamba kuwutemwa. Nyengo zinyake tikakhweŵanga usiku  wose. Nyengo zinyakeso nkhakhalanga kwa nekha zuŵa lose na kukhweŵa munkhwala wakuzweteska wongo. Nkhaghanda comene mwakuti ŵanthu ŵakatenge nili na Ezi.

UMO BAIBOLO LIKASINTHIRA UMOYO WANE: Pa nyengo iyi ndipo nkhakumana na Ŵakaboni ŵa Yehova. Ŵakanilongora lusungu lukuru. Limoza mwa mavesi agho ŵakaniŵazgira likaŵa la Ŵaroma 10:13, ilo likuti: “Waliyose uyo wakucema pa zina la Yehova wazamuponoskeka.” Mazgu agha ghakanovwira kuwona uwemi wa kugwiliskira nchito zina la Ciuta. Nyengo zinandi para nakhweŵa usiku wose, nkhajuranga windo na kulaŵiska kucanya na kuŵeyelera Yehova kuti wanovwire.

Cifukwa ca kufipira mtima amama awo ŵakakwenyeleranga comene pakuwona umo nkhajinangiranga na minkhwara, nkhaghanaghana vyakuti nileke kukhweŵa. Pamasinda nkhazomera kusambira Baibolo na Ŵakaboni ŵa Yehova. Ŵakanisimikizgira kuti kusambira Baibolo kunovwirenge kuti nifiske cilato cane ca kuleka kukhweŵa ndipo kukanovwira nadi.

Apo nkhalutilira kusambira Baibolo nkhawona kuti cikaŵa cakwenelera kuti nisinthe nkharo yane. Cikaniŵira cakusuzga comene kuleka kugonana na ŵanalume ŵanyane cifukwa vikakhazikika mu maghanoghano ghane. Cinthu ico cikanovwira nkhuleka vizgoŵi viheni. Nkhamazga ubwezi na awo nkhendanga nawo na kuleka kuluta ku mabala.

Nkhapembuzgika apo nkhasambira kuti Yehova wakunipwelelera nakuti wakamanyanga suzgo lane. (1 Yohane 3:19, 20) Mu cilimika ca 2002 nkhaŵa kuti nalekerathu nkharo zaukazuzi izi, ndipo mu cilimika cenecici nkhabapatizika kuŵa Kaboni wa Yehova.

UMO NASANGIRA CANDULO: Amama ŵakakondwa comene na umo nkhasinthira, ntheura nawo ŵakamba kusambira Baibolo. Nangauli ŵali na nthenda ya Sitiroku, kweni ŵakulutilira nipera kutemwa Yehova na unenesko wa mu Baibolo.

Naŵa mu uteŵeti wanyengo zose kwa vilimika 8 ndipo nkhumalira nyengo yinandi kusambizga ŵanji Baibolo. Kuyowoya unenesko nyengo zinyake nkhuŵa pa nkhondo yakulimbana na makhumbiro ghaheni. Kweni nkhukhozgeka kumanya kuti para naleka kuthera ku makhumbiro ghaheni, ndikuti nkhukondweska Yehova.

Ŵanthu ŵakunicindika cifukwa cakuti nili kusendelera kwa Yehova na kucita ivyo vikumukondweska. Mazuŵa ghano ndine wakukondwa comene.

“Nkhaŵa ciswa nthema.”​—LUKA ŠUC

CILIMIKA ICO WAKABABIKIRA: 1975

UKO WAKABABIKIRA: SLOVENIA

IVYO WAKACITANGA: WAKAŴA MULOŴEVU

UMO NKHAŴIRA KALE: Nkhababikira ku Ljubljana, mu msumba wa Slovenia. Nkhaŵa na umoyo wakunozga mpaka apo nkhaŵa na vilimika 4. Pamasinda adada ŵakajikoma. Ntheura, ŵamama ŵakeneranga kufwilirapo kugwira nchito kuti ŵasange cakurya ca ine na mukuru wane.

Apo nkhaŵa na vilimika 15, nkhamba kukhala na abuya. Nkhakondwanga comene kukhala na abuya cifukwa ndiko kukaŵa ŵabwezi ŵane ŵanandi. Kweniso kwa abuya uku, nkhafwatukanga  comene kuluska umo nkhakhaliranga kwithu. Apo nkhaŵa na vilimika 16 nkhamba kucezga na ŵanthu awo ŵakatemwanga kumwa phere ku umaliro wa sabata. Nkhaleka kumeta sisi ndipo likakura comene, nkhamba kuvwara mwambura kulongosoka ndipo pamasinda nkhamba kukhweŵa.

Nangauli nkhayezgapo minkhwala yakuzweteska wongo yakupambanapambana, kweni nkhaleka yayi kumwa phere cifukwa nkhasangwanga nalo comene. Pakati pajumpha nyengo yicoko waka, nkhamba kumwa moŵa unandi pa nyengo yimoza. Nkhaŵa nkhwantha pa kumwa moŵa ndipo cikaŵa cakusuzga kuti munthu wamanye kuti naloŵera. Kanandi ŵanthu ŵakamanyanga kuti namwa cifukwa ca sungu la moŵa ilo likapulikikwanga para nkhuthuta. Nanga viŵe nthena, palije uyo wakamanyanga unandi wa moŵa uwo namwa.

Kanandi ine ndine nkhawovwiranga ŵanyane pakwenda usiku para dansi yamara nangauli nkhamwanga moŵa unandi kuluska iwo. Zuŵa linyake nkhapulika yumoza mwa ŵabwezi ŵane wakuyowoya kuti ndine ciswa nthema. Mazgu agha ghakung’anamura munthu uyo wakumwa comene phere kuluska ŵanji. Zina ili likanikwenyerezga comene.

Nkhamba kughanaghanirapo pa ivyo nkhacitanga. Ndipo nkhamba kujiwona kuŵa wambura nchito. Nkhawonanga kuti palije ico nacitapo pa umoyo wane.

UMO BAIBOLO LIKASINTHIRA MOYO WANE: Panyengo iyi nkhawona kuti munyane munyake uyo tikasambiranga lumoza sukulu wakamba kuzika. Pakuzizwa na umo wakasinthira, nkhamucemera ku resitiranti kuti tikasangwepo. Apo tikadumbiskananga, wakalongosora kuti wamba kusambira Baibolo na Ŵakaboni ŵa Yehova. Wakaniphalirako vinyake mwa ivyo wakasambiranga, ivyo vikaŵa vyacilendo comene kwa ine cifukwa nkhaŵa kuti nindasopepo. Ntheura, nkhamba kuwungana na Ŵakaboni ŵa Yehova na kusambira nawo Baibolo.

Nati namba kusambira Baibolo nkhajulika kumaso ndipo nkhapulikiska visambizgo vinandi. Mwaciyelezgero, nkhasambira kuti tikukhala mu nyengo iyo Baibolo likuti “mazuŵa ghaumaliro.” (2 Timote 3:1-5) Nkhasambiraso kuti Ciuta wazamuparanya ŵanthu ŵaheni pa caru capasi, na kupeleka mwaŵi ku ŵanthu ŵawemi kuti ŵasangwe na umoyo wamuyirayira mu Paradiso. (Salmo 37:29) Nkhanweka comene kusintha umoyo wane mwakuti nane nizakaŵe yumoza mwa ŵanthu ŵawemi aŵa.

Nkhamba kuphalirako ŵabwezi ŵane unenesko wa mu Baibolo uwo nkhasambiranga. Nangauli ŵanandi ŵakanisekanga, kweni vikanovwira mu nthowa zinyake. Ivyo ŵakacitanga vikanovwira kuti nimanye kuti ŵakaŵa ŵabwezi ŵanadi yayi. Nkhamanya kuti suzgo lane la uloŵevu likiza cifukwa ca kusankha uheni ŵabwezi ŵakucezga nawo. Nyengo zose ŵakaghanaghananga vyakumwa phere ku umaliro wa sabata.

Nkhamazga ubwezi na ŵanthu aŵa na kwamba kuŵa na ŵabwezi ŵakukhozga awo Mbakaboni ŵa Yehova. Kuŵa paubwezi na ŵanthu aŵa kwanovwira comene cifukwa ŵakutemwa nadi Ciuta ndipo ŵakuyezgayezga kucita vinthu mwakuyana na malango yake. Mwapacokopacoko, nkhaleka uloŵevu.

UMO NASANGIRA CANDULO: Nkhuwonga comene Yehova cifukwa sono nkhukhumbikwiraso phere yayi kuti niŵe wakukondwa. Nkhumanya yayi umo mphanyi vinthu viliri niŵenge kuti nicali na umoyo wane wakale. Kweni sono nkhuwona kuti umoyo wane uli makora.

Kwa vilimika 7 naŵa na mwaŵi wa kuteŵetera pa ofesi ya munthavi ya Ŵakaboni ŵa Yehova ku Slovenia. Kumanya Yehova na kumuteŵetera kwanovwira kuti niŵe na umoyo wakukondweska.