Sambirani Kufuma mu Mazgu gha Ciuta

Kasi Nchivici Cizamucitikira Visopa?

Nkhani iyi yili na mafumbo agho panji muli kujifumbapo ndipo yikulongora uko mungasanga mazgoro mu Baibolo linu. Ŵakaboni ŵa Yehova ŵaŵenge ŵakukondwa kudumbiskana namwe mazgoro ghake.

1. Kasi visopa vyose ni viwemi?

Mu visopa vinandi muli ŵanthu ŵamitima yiwemi awo ŵakukhumba kukondweska Ciuta. Ciuta wakuŵawona ŵanthu aŵa, ndipo wakuŵaghanaghanira. Kweni cacitima nchakuti, ŵanthu ŵanji ŵakucita viheni mu zina la cisopa. Mu nyengo zakumasinda, ŵalongozgi ŵavisopa ŵakafika na pa kutambuzga awo ŵakaŵasuskanga. (2 Ŵakorinte 4:3, 4; 11:13-15) Mwakuyana na malipoti gha mu nyuzipepara, mazuŵa ghano ŵalongozgi ŵanji ŵa visopa ŵakukhuŵilizga ucigeŵenga, kukhozgera nkhondo, panji kucitira nkhaza ŵana.—Ŵazgani Mateyu 24:3-5, 11, 12.

Baibolo likusambizga kuti pali mitundu yiŵiri ya visopa. Pali cisopa caunenesko na cautesi. Cisopa cautesi cikusambizga vinthu vyautesi vyakukhwaskana na Ciuta. Ndipouli, Yehova Ciuta wakukhumba kuti ŵanthu ŵamanye unenesko wakukhwaskana na iyo.—Ŵazgani 1 Timote 2:3-5.

2. Kasi nchivici cizamucitikira visopa?

Ciuta wakukhumba yayi kuti ŵanthu ŵapusikikenge na visopa ivyo vikupusikizgira kuti vikumutemwa kweni vikusambizga unenesko yayi wakukhwaskana na iyo. Nakuti visopa ivi vikutemwa kuŵa paubwezi na caru ico cikuwusika na Satana Dyabulosi. (Yakobe 4:4; 1 Yohane 5:19) Mazgu gha Ciuta ghakuti visopa ivyo vikukolerana na maboma gha ŵanthu m’malo mwa Ciuta, vili nga ni mwanakazi muzaghali. Baibolo likucema muzaghali uyu kuti “Babuloni Mukuru,” zina ilo likiza cifukwa ca msumba wa Babuloni uwo kale ukaŵa cinyina ca cisopa cautesi pamasinda pa Ciwowota ca mu nyengo ya Nowa. Sonosono apa Ciuta wazamuparanya visopa ivyo vikupusika na kuyuzga ŵanthu.—Ŵazgani Uvumbuzi 17:1, 2, 5, 17; 18:8, 23, 24.

  3. Umo Ciuta wazamutumbikira ŵanthu pa caru cose

Nkhani yakukondweska njakuti cisopa cautesi cizamweruzgika. Para cisopa cautesi ceruzgika ŵanthu ŵazamuyuzgikaso yayi. Cisopa cautesi cizamupusikaso ŵanthu yayi nesi kuŵagaŵaniska. Panyengo iyo, ŵanthu wose ŵazamukolerana pakusopa Ciuta waunenesko yekha.—Ŵazgani Yesaya 11:9; Uvumbuzi 18:20, 21; 21:3, 4.

4. Kasi ŵanthu ŵamitima yiwemi ŵakwenera kucitaci?

Yehova wandaŵaluwe ŵanthu awo ŵakukhumba nadi kumusopa awo ŵali mu visopa vyautesi pa caru cose. Pasono wakuŵawunjika ŵanthu aŵa na kuŵasambizga unenesko.—Ŵazgani Mika 4:2, 5.

Yehova wakuŵapokelera mu mbumba yake awo ŵakukhumba kumuteŵetera. Tikusanga candulo cikuru nanga ni para ŵabwezi panji ŵabali ŵithu ŵangakwiya para tamba kuteŵetera Yehova. Tikuŵa paubwezi na Ciuta, kweniso na mbumba yiphya yacitemwa. Padera pa ivi, tiliso na cilindizga ca umoyo wamuyirayira.—Ŵazgani Mariko 10:29, 30; 2 Ŵakorinte 6:17, 18.

Kuti mumanye vinandi, wonani cipaturo 15 na 16 mu buku ili, Kasi Baibolo Likusambizgaci Comenecomene? lakupharazgika na Ŵakaboni ŵa Yehova.

[Kulongosora Cithuzithuzi pa peji 16]

The Complete Encyclopedia of Illustration / J. G. Heck