Baibolo Likusintha Umoyo wa Ŵanthu

Nchivici cikawovwira mwanakazi wa ku Philippines kuleka uloŵevu na kusintha vinthu mu mbumba yake? Kasi nchivici cikawovwira munthu wakutemwa maseŵera gha karati ku Australia kuti waŵe mupharazgi wa makani ghawemi? Ŵazgani ivyo ŵanthu aŵa ŵakayowoya.

“Pakatora nyengo kuti nisinthe.”​—CARMEN ALEGRE

CILIMIKA ICO WAKABABIKIRA: 1949

UKO WAKABABIKIRA: PHILIPPINES

IVYO WAKACITANGA: WAKAŴA MULOŴEVU

UMO NKHAŴIRA KALE: Nkhababikira ku San Fernando, tawuni iyo yili mu msumba wa Camarines Sur. Kweni nati nakura nkhakhala comene ku Antipolo, mu cigaŵa ca Rizal. Cigaŵa ici cili ku mapiri, kuli utheka na makuni ghanandi. Ndipo apo nkhizanga, tawuni iyi yikaŵa yicoko comene. Kanandi ŵanthu ŵakendanga usiku yayi ku malo agha. Kweni pasono tawuni iyi njikuru ndipo yili na ŵanthu ŵanandi.

Apo nkhaŵa ku Antipolo, nkhakumana na mwanalume munyake zina lake Benjamin, ndipo nyengo yikati yajumphapo tikatorana. Nkhawona kuti umoyo wa mu nthengwa ukaŵa wakusuzga comene kuluska umo nkhaghanaghaniranga. Nkhamba kumwa comene phere na cilato cakuti niluweko masuzgo. Nkhamba kusuzga comene. Ndipo ivi vikawonekanga pa umo nkhacitiranga na mfumu wane kweniso ŵana ŵane. Nkhajikoranga viŵi yayi nesi kuzikira pakucita nawo vinthu. Mfumu wane nkhamucindikanga yayi. Kuyowoya unenesko, mbumba yithu yikakondwanga yayi.

UMO BAIBOLO LIKASINTHIRA UMOYO WANE: Mulamu wane zina lake Editha ni Kaboni wa Yehova ndipo wakapempha kuti ine na Benjamin tisambirenge Baibolo na Ŵakaboni ŵa Yehova. Tikazomera na cigomezgo cakuti panji nthengwa yithu yingaŵako makora.

Apo tikasambiranga Baibolo tikamanya vinandi vyakukhwaskana na unenesko. Mazgu agho ghali pa Uvumbuzi 21:4 ndigho ghakanikhozga comene. Pakuyowoya za awo ŵazamukhala mu caru ciphya ca Paradiso mu Ufumu wa Ciuta, vesi ili likuti Ciuta “wazamufyura sozi lililose ku maso ghawo, ndipo nyifwa yizamuŵakoso cara, nesi kutengera panji kutampha nesi vyakuŵinya vizamuŵakoso cara. Vinthu vyakale vyafumapo.” Nkhakhumbisiska kuti nizakaŵe yumoza wa ŵanthu awo ŵazamusangwa na vitumbiko ivi.

Nkhamanya kuti nkhukhumbikwira kusintha nkharo yane na kawonero kavinthu. Vinthu vikasinthanga pacokopacoko, zuŵa limoza pera yayi. Ndipo pamasinda nkhaleka kumwa comene phere. Nkhasambiraso kuti nkhwenera kuŵa walusungu na kuzikira pakucita vinthu na mbumba yane. Kweniso nkhasambira kucindika mfumu  wane na kukolerana nayo apo wakudangilira mbumba yithu.

Ine na Benjamin tikamba kuwungana na Ŵakaboni ŵa Yehova, ndipo tikazizwa comene na ivyo tikawona. Pa Ŵakaboni ŵa Yehova pakaŵavya uyo wakachovanga njuga, muloŵevu, na kusankhana mtundu. Ŵakucindika waliyose. Tikakhorwa kuti tasanga cisopa caunenesko.—Yohane 13:34, 35.

UMO NASANGIRA CANDULO: Mbumba yithu yasintha comene. Pasono ine na Benjamin tili ŵakukondwa mu nthengwa yithu, ndipo tikusangwa kusambizga ŵanji Baibolo. Ŵana ŵithu ŵaŵiri pamoza na ŵawoli ŵawo, nawo ŵali kwamba kusambira Baibolo. Tikugomezga kuti nawo ŵazamwamba kuteŵetera Yehova. Uwu ndiwo umoyo wanadi.

“Nkhawonanga kuti palije uyo wanganitimba.”​—MICHAEL BLUNSDEN

CILIMIKA ICO WAKABABIKIRA: 1967

UKO WAKABABIKIRA: AUSTRALIA

IVYO WAKACITANGA: KARATI

UMO NKHAŴIRA KALE: Nkhakulira ku Albury, tawuni yakutowa kweniso yisambazi comene ku New South Wales. Nga umo viliri na matawuni ghanandi, nako ucigeŵenga uliko. Nangauli vili nthena, kweni tawuni ya Albury yikumanyikwa kuti nja mtende.

Nkhakulira mu mbumba yakusanga makora. Nangauli ŵapapi ŵane ŵakapatana apo nkhaŵa na vilimika 7, kweni ŵakawoneseskanga kuti ine, mukuru wane kweniso ŵadumbu ŵane ŵaŵiri tileke kusoŵa kanthu. Nkhasambiranga pa sukulu yiwemi comene ya pulayiveti mu cigaŵa ici. Ŵadada ŵakakhumbanga kuti para namalizga sukulu nicitenge bizinesi. Kweni ine mtima wane ukaŵa pa maseŵera, nga nkhuchova njinga na karati. Paumaliro nkhamba nchito ku shopu yakunozgera magalimoto. Nchito iyi yikanipanga mpata wakucitira maseŵera agha.

Nkhanothanga cifukwa nkhaŵa na nkhongono. Nyengo zinyake nkhawonanga kuti palije munthu uyo wanganitimba. Cifukwa ca nkhongono izo nkhaŵa nazo, vikanisuzganga kujikora kuti nileke kuzigwiliskira nchito uheni. Pakuwona kuti nkhasuzgikanga kujikora, msambizgi wane wakanicenya na kuniphalira kuti nkheneranga kuŵa na nkharo yiwemi. Wakadidimizga comene za uwemi wa kupulikira na kugomezgeka.

UMO BAIBOLO LIKASINTHIRA UMOYO WANE: Nati namba kusambira Baibolo nkhamanya kuti Yehova wakutinkha nkhaza. (Salmo 11:5) Pakwamba nkhaghanaghananga kuti maseŵera gha karati ni nkhaza yayi. Nkhatenge ngawemi waka. Nkhawonanga kuti maseŵera gha karati ghakukhuŵilizga nkharo izo zikukolerana na ivyo Baibolo likusambizga. Mbumba ya Ŵakaboni iyo yikanisambizganga yikazikira nane comene. Ŵakaniphalirapo yayi kuti nileke maseŵera agha, kweni ŵakalutilira waka kunisambizga unenesko.

 Apo nkhamba kumanya vinandi vyakukhwaskana na Baibolo kweniso apo ubwezi wane na Yehova ukakuranga, nkhamba kuwona vinthu mwakupambanako. Nkhakhorwa comene nati nasambira za umo Yesu, Mwana wa Yehova, wakacitiranga vinthu. Nangauli Yesu wakaŵa na nkhongono comene, kweni wakacitanga mbembe yayi. Nkhakhwaskika comene na mazgu ghake agho ghali pa Mateyu 26: 52, ghakuti: “Wose awo ŵakutora lupanga ŵakomekenge na lupanga.”

Apo nkhalutiliranga kusambira vinandi vyakukhwaskana na Yehova, nkhamba kumutemwa comene na kumucindika. Nkhakhozgeka comene kumanya kuti Yehova uyo ngwavinjeru kweniso wankhongono comene wakunipwelelera. Nkhaconthekaso comene kumanya kuti nanga mphanyengo iyo namukhuŵazga, Yehova wakuvuka nane yayi cikuru nkhufwilirapo. Nkhapembuzgika comene na layizgo lake lakuti: “Ine Yehova Ciuta wako, ndakukora ku woko lako la malyero; ndine nkhuti kwa iwe, ‘Ungopanga, ndine tindikovwire.’” (Yesaya 41:13) Nkhati namanya kuti Yehova wanilongora citemwa canthena, nkhacitapo kanthu.

Nkhamanya kuti cikaŵa cakusuzga comene kuleka maseŵera gha karati. Kweni nkhamanyaso kuti para naleka ndikuti nikondweskenge Yehova. Nkhasimikizga kuti kuteŵetera Ciuta nchinthu cakuzirwa comene. Paumaliro nkhakhorwa apo nkhaŵazga mazgu gha Yesu pa Mateyu 6:24, agho ghakuti: “Palije uyo wangateŵetera nga ni muzga wa ŵeneco ŵaŵiri.” Nkhamanya kuti vingacitika yayi kuteŵetera Ciuta mwakukwana uku nkhuseŵera karati. Cifukwa mphanyi mtima wane ukaŵanga ku maseŵera gha karati. Yikaŵa nyengo yakuti nisankhepo cimoza, kuteŵetera Yehova panji karati.

Vikanisuzga comene kuleka karati. Ndipo nkhasuzgikangaso comene mu maghanoghano. Ndipouli, nkhakondwanga kumanya kuti nkhukondweska Yehova. Nangauli vikaŵa nthena, nkhajipulikanga nga nkhwendera mphiska msambizgi wane wa karati. Awo ŵakucita maseŵera gha mtundu uwu ŵakuwona kuti kwendera mphiska munthu nkhwananga uko kungagowokereka yayi. Ŵanji ŵakafikanga na pakujikoma wuwo mwakuti soni zileke kuŵakora.

Vikanisuzga comene kuphalira msambizgi wane wa karati kuti naleka maseŵera agha. Nkhacitanga soni kulongosolera msambizgi wane cifukwa ico nkhalekera maseŵera gha karati. Kweni nkhamanya kuti nkhacita makora kuleka karati. Kweniso nkhajipanga mulandu cifukwa cakutondeka kulongosora vigomezgo vyane ku ŵanji uko kukaŵa kutaya mwaŵi wakuŵaphalirako cipulikano cane. Nkhawonanga nga namukhuŵazga kale Yehova pambere nindambe kumuteŵetera. Vyose ivi vikanisuzganga maghanoghano. Kanandi nkhalombanga kwa Yehova kweni paumaliro nkhaliranga waka.

Yehova wakwenera kuti wakawona cinthu cinyake ciwemi mwa ine cifukwa wakakhuŵilizga ŵabali na ŵadumbu mu mpingo kuti ŵanikhozge. Nkhakhorwa comene na citemwa, cipembuzgo na mtima wawo waubwezi. Nkhakhozgekaso comene na nkhani ya mu Baibolo yakukhwaskana na Davide na Batisheba. Nangauli, Davide wakacita zakwananga zikuru, kweni Yehova wakamugowokera wati wapera nadi. Cifukwa cakuti nkhaghanaghanirapo nkhani iyi, cikanovwira kuwona mwakwenelera ubudi wane.

UMO NASANGIRA CANDULO: Pambere nindambe kusambira Baibolo, nkhapwelerangako yayi vya ŵanji, nkhajighanaghaniranga waka nekha. Kweni Yehova wanovwira kuti nighanaghanirenge ŵanji. Muwoli wane uyo takhalira lumoza vilimika 7, nayo wanovwira pa nkhani iyi. Tatumbikika comene cifukwa tikusambira Baibolo na ŵanthu ŵanandi, ŵanji ŵa iwo ŵali na masuzgo ghakuru. Nkhukondwa comene para nkhuwona umo citemwa ca Yehova cikusinthira mitima ya ŵanthu, kuluska cimwemwe ico nkhaŵa naco apo nkhaŵa nkhwantha ya karati.

[Mazgu Ghakukhozgera pa peji 14]

“Nkhakhozgeka comene kumanya kuti Yehova uyo ngwavinjeru kweniso wankhongono comene wakunipwelelera”

 [Bokosi/Cithuzithuzi pa peji 15]

“Yewo Comene Cifukwa ca Nkhani Zakukhozga Izi!”

Kasi mukakondwa kuŵazga nkhani za kulongosora umoyo wa ŵanthu izo zajumpha? Izo zili pacanya apa ni zinyake mwa nkhani zakujumpha 50 izo zili kusindikizgika mu Gongwe la Mulinda kufuma mu mwezi wa Ogasiti 2008. Ŵaŵazgi ŵanandi ŵakutemwa comene cigaŵa cakuti “Baibolo Likusintha Umoyo wa Ŵanthu.” Cifukwa wuli ŵakucitemwa?

Kanandi ŵanthu awo ŵakuzunulika mu nkhani izi ŵakaŵa na umoyo wakupambanapambana. Apo ŵakaŵa ŵandasambire za Yehova Ciuta, ŵanji ŵa iwo ŵakaŵa ŵasambazi kweni cilato ca umoyo ŵakacimanyanga yayi. Ŵanji ŵakalimbananga na masuzgo ghakuru nga ni nkhaza, kumwa munkhwala wakuzweteska wongo na uloŵevu. Ŵanji pakwamba ŵakasopanga Yehova, kweni pamasinda ŵakaleka. Nkhani zose izi zikulongora kuti munthu wangasintha nakwamba kukondweska Ciuta. Nakuti awo ŵakucita nthena kanandi ŵakutumbikika. Kasi ŵaŵazgi ŵakukhwaskika wuli na nkhani izi?

Muŵazgi munyake wakalongosora umo nkhani ya mu magazini gha Febuluwale 1, 2009, yikawovwilira ŵanakazi awo ŵakaŵa mu gadi.

◼ Mwanakazi munyake wakati: “Ŵanandi ŵakapulikiskanga umo ŵanthu awo ŵakayowoyekanga mu nkhani ŵakajipulikiranga. Vithuzithuzi vya umoyo wawo wakale na wasono, kweniso mazgu gha munthu waliyose ghakuti umo nkhaŵira kale, vikaŵa vyakukhozga comene. Ŵanandi mu gadi ili ndimo ŵakaŵira. Ŵati ŵaŵazga nkhani izi, ŵanthu ŵaŵiri mu gadi ili ŵakamba kusambira Baibolo.”—C. W.

Ŵaŵazgi ŵanji ŵakacontheka na nkhani za mu Gongwe la Mulinda la Epulero 1, 2011. Mwaciyelezgero magazini iyi muli nkhani ya munthu munyake Guadalupe Villarreal, uyo wakaleka nkharo ya kugonana na ŵanalume ŵanyake na cilato cakuti wateŵetere Yehova. Wonani makalata ghaŵiri mwa makalata agho ghakafuma ku ŵaŵazgi pa nkhani yake.

◼ “Nkhani ya Guadalupe yili kunicontha comene. Nchakukondweska comene kuwona kuti ŵanthu ŵakusintha umoyo wawo cifukwa cakuti ŵakutemwa Yehova na Mazgu ghake.”—L. F.

◼ Kale nkhapharazgiranga munthu waliyose, kusazgapo ŵanthu awo ŵali na nkharo zakugonana na ŵanalume panji ŵanakazi pera. Kweni pamasinda nkhamba kuŵasurako waka na kuleka kuŵapharazgira. Nkhani iyi yikanovwira comene. Yikanovwira kuti niwonenge ŵanthu ŵantheura aŵa nga umo Yehova wakuŵawonera, cifukwa ŵangasintha na kwamba kumusopa.”—M. K.

Nkhani yinyake iyo ŵaŵazgi ŵakasanga nayo candulo yikaŵa ya Victoria Tong, iyo yili kulembeka mu Gongwe la Mulinda la Ogasiti 1, 2011. Victoria wakalongosora masuzgo agho wakasangana nagho apo wakaŵa mwana. Wakayowoya kuti vikamusuzganga kuwona kuti Yehova wakumutemwa, nanga ni apo wakaŵa kuti wamuteŵetera kwa vilimika vinandi. Pamasinda wakalongosora ico cikamovwira kuti wamanye kuti Yehova wakumutemwa. Wonani ivyo ŵaŵazgi ŵanji ŵakayowoya pa nkhani iyi.

◼ “Ivyo vikacitikira Victoria vikuyana comene na ivyo vikanicitikira. Nasangana na masuzgo ghanandi pamoyo wane. Nkhalimbananga na maghanoghano ghambura kwenelera nangauli pakajumpha vilimika vinandi kufuma apo nkhabapatizikira kuŵa Kaboni. Kweni nkhani ya Victoria yanovwira kufwilirapo kucita ivyo Yehova wakuwona mwa ine.—M. M.

◼ Apo nkhaŵa mwanici nkhatemwanga kulaŵilira vithuzithuzi vya mziro, kweni nkhafwilirapo kuti nileke. Sonosono apa nkhambiraso cizgoŵi ciheni ici. Nkhapempha ŵalara kuti ŵanovwire ndipo sono vikusintha. Ŵalara ŵakanisimikizgira kuti Ciuta wakunitemwa ndipo ngwalusungu. Ndipouli, nyengo zinyake nkhujiwona kuti ndine wambura kwenelera nipera, nga nipara Yehova wanganitemwa yayi. Nkhani ya Victoria yikanovwira comene. Pasono nkhumanya kuti para nkhughanaghana vyakuti Yehova wanganigowokera yayi nkhuwa nga nkhuyowoya kuti Sembe ya Mwana wake njakukwana yayi kuti zakwananga zane zigowokereke. Nili kusunga nkhani iyi mwakuti niŵazgengepo para namba kujiwona mwambura kwenelera. Yewo comene cifukwa ca nkhani zakukhozga izi!”—L. K.