Makalata ghakukhwaskana na vinthu vya boma la Peresiya ŵakaghatumizganga pa positi ya caru. Buku la Esther likulongosora umo Boma la Peresiya likatumizgiranga makalata. Likuti: ‘Moderekayi wakalemba mu zina la themba Ahaswerus, wakadidimizgamo na mphete ya themba, wakatuma ŵakalata na mathenga gha pa ŵakavalo, pa myulu, na gha pa ŵangamila ŵaluŵiro.’ (Esther 8:10) Ufumu wa Roma nawo ndimo ukacitiranga pakutumizga makalata ku ŵasilikari.

Kweni makalata ghanyake nga agho ghakalembekanga na mpositole Paulosi na ŵanji, ŵakaghatumizganga munthowa izi yayi. Usange kalata yinyake njakuzirwa comene ŵakatumanga muzga kuti wakapeleke. Ndipouli, ŵanandi ŵakatumizganga ŵanthu awo ŵakaŵamanyanga panji ŵalendo awo ŵakalutanga ku malo agho kukuluta kalata yawo. Nyengo zinyake ŵakatumizganga ŵamumbumba, ŵabwezi, ŵasilikari panji ŵamalonda. Kweni ico ŵakafipiranga mtima nkhugomezgeka kwa munthu uyo wayegha kalata ndiposo usange wamuyowoya makora uthenga uwo watumika. Baibolo likulongora kuti Paulosi, makalata ghanyake wakatumizganga Ŵakhristu ŵanyake awo ŵakaŵanga paulendo.​—Ŵaefeso 6:21, 22; Ŵakolose 4:7.

Cuma ca Ŵaisrayeli cikathembanga comene pa ulimi, kuŵeta viŵeto, na kusinthana vinthu. Baibolo likuzunura misika iyo yikaŵanga pa vipata vya mu msumba. Mwaciyelezgero, pakaŵa “Cipata Mberere,” “Cipata Somba,” na “Cipata ca ku Mafumiro gha Dazi.” (Nehemiya 3:1, 3; Yeremiya 19:2) Mazina agha ghakulongora mtundu wa vinthu ivyo vikaguliskikanga pa cipata cilicose. Malemba ghakuzunuraso “msewu wa ŵaphiki” ŵa mu Yerusalemu na vinthu ivyo ŵakaguliskanga.​—Yeremiya 37:21.

Wuli pa nkhani ya mitengo ya vinthu? Buku linyake lakulongosora Baibolo likuti: “Mitengo yikasinthanga para pajumpha vyaka vinandi, ntheura nchakusuzga kuyowoya mtengo weneco uwo ŵakaguliskiranga cinthu cinyake.” Ndipouli, fundo za mu mabuku ghakale kusazgapo Baibolo, zikulongora kuti kale napo vinthu vikaduranga. Mwaciyelezgero, kanandi ŵazga ŵakaŵaguliskanga na ndalama zasiliva zakale. Yosefe ŵakamuguliska na ndalama zasiliva 20, izo panji zikaŵa mashekeli ghakuyana na mtengo uwo ŵakaguliskiranga muzga mu vilimika vya m’ma 1700 B.C.E. (Genesis 37:28) Vilimika 300 vikati vyajumphapo, mtengo wa muzga ukaŵa mashekeli 30. (Exodus 21:32) Ca m’ma 700 B.C.E., mtengo ukafika pa mashekeli 50. (2 Mathemba 15:20) Pamasinda pa vyaka 200, mu nyengo ya muwuso wa Peresiya, mtengo wa muzga ukakwera comene kufika pa mashekeli 90 panji kujumphirapo. Fundo izi zikulongolerathu kuti suzgo lakukwera mtengo kwa vinthu ndapapo kale.