AWISKE Ian ŵakamwanga comene phere. Nangauli, Ian wakasoŵanga kanthu yayi, kweni wakasuzgikanga maghanoghano cifukwa cakuti adada ŵake ŵakacezganga nayo yayi. Iyo wakati: “Nkhaŵatemwanga viŵi yayi adada cifukwa cakuti ŵakamwanga comene kweniso ŵakacitiranga nkhaza amama.” Ian wati wakura, wakamba kukayikira usange Ciuta waliko nadi. Wakati: “‘Usange Ciuta waliko, cifukwa wuli wakuzomerezga kuti ŵanthu ŵasuzgikenge?’”

Nanga imwe masuzgo ghinu ghangaŵa kuti ngacoko, kweni mukwenera kuti mungakwenyelera para mukuwona ŵanthu ŵambura mulandu ŵakusuzgika. Kweni fumbo ilo Ian wakafumba pa nkhani ya masuzgo lingaŵa lakuzirwa comene kwa imwe usange namwe mukusuzgika, panji munthu uyo mukumutemwa walwara panji wafwa.

Ŵanyake ŵakugomezga kuti Ciuta wazomerezga masuzgo na cilato cakuti tisambire kujiyuyura na kuŵa ŵalusungu. Ŵanji ŵakughanaghana kuti ŵanthu ŵakusuzgika cifukwa ca kwananga uko ŵakacita kumasinda.

Ghakung’anamura kuti Ciuta vikumukhwaska yayi para ŵanthu ŵakusuzgika, ntheura nchakusuzga kuti ise timutemwe. Kweniso ghakulongora kuti Ciuta ngwankhaza.

Baibolo likuyowoya makora kuti ni Ciuta yayi uyo wakupangiska kuti ŵanthu ŵasuzgikenge. Ilo likuti: “Para yunji wakuyezgeka, waleke kuyowoya kuti: ‘Nkhuyezgeka na Ciuta.’ Pakuti Ciuta wangayezgeka na vinthu viheni cara, ndipo iyo kuti wakuyezga waliyose cara.” (Yakobe 1:13) Nakuti fundo yakuti Ciuta ndiyo wakupangiska masuzgo yikukolerana yayi na umo Baibolo likulongosolera wunthu wa Ciuta. Yikupambana wuli?

Mukhaliro ukuru wa Ciuta nchitemwa. (1 Yohane 4:8) Pakukhozgera fundo iyi, Baibolo likuti Ciuta wakucita vinthu nga umo mama wakonkheska wakucitira. Ciuta wakafumba kuti: “Kasi mwanakazi wangamanya kuluwa mwana wake wakonkha, kuti waleke kuŵa naye na cisungusungu mwana wa nthumbo yake? Enya, wangaluwa nadi, kweni Ine ntha ndikuluwenge.” (Yesaya 49:15) Kasi mukughanaghana kuti mama wacitemwa wangacitira dala vinthu ivyo vingapwetekeska mwana wake? Mupapi wacitemwa wangacita cilicose kuti wacepeske masuzgo gha mwana wake. Mwakuyana waka, ni Ciuta yayi uyo wakupangiska kuti ŵanthu ŵambura mulandu ŵasuzgikenge.​—Genesis 18:25.

Nangauli vili nthena, kweni ŵanthu ŵambura mulandu nawo ŵakusuzgika. Panji mungajifumba kuti, ‘Usange Ciuta wakutipwelelera kweniso ngwankhongonozose, cifukwa wuli wakuleka kuwuskapo ivyo vikupangiska masuzgo?’

Pali vifukwa vyakupulikikwa ivyo Ciuta wazomerezgera kuti masuzgo ghalutilire. Wonani fundo iyi: Kanandi ŵanthu ndiwo ŵakupangiska kuti ŵanyawo ŵasuzgike. Ŵanthu ŵankhaza awo ŵakusuzga ŵanyawo, ŵakukhumba yayi kuleka nkharo zawo. Ntheura, kuti Ciuta wawuskepo masuzgo, wakwenera kuparanya dankha ŵaheni aŵa.

Pakulongosora cifukwa ico Ciuta wandaparanyire ŵaheni mpaka sono, mpositole Petrosi wakati: “Yehova wakucedwa cara na layizgo lake, umo ŵanthu ŵanji ŵakuwonera kuti nkhucedwa, kweni ngwakuzika mtima na imwe cifukwa wakukhumba cara kuti munyake waparanyike, kweni wakukhumba kuti wose ŵafike pa kupera.” (2 Petrosi 3:9) Cifukwa cakuti Yehova Ciuta wazizipizga, walongora kuti ngwacitemwa kweniso ngwalusungu.

Ndipouli, sonosono apa Yehova Ciuta wacitengepo kanthu. Iyo ‘wazamuwezgera suzgo awo ŵakuwuskira suzgo’ ŵanthu ŵambura mulandu. Awo ŵakwambiska masuzgo “ŵazamupokera cilango ca pharanyiko lamuyirayira.”​—2 Ŵatesalonika 1:​6-9.

Ian uyo wazunulika mu nkhani iyi, wali kusanga mazgoro ghakukhorweska pa nkhani ya masuzgo. Ivyo wali kusambira vili kumovwira kuti wambe kuwona umoyo mwakwenelera. Ŵazgani nkhani yake pa peji 13 mu magazini iyi.