KASI Yehova wakulindizgaci kwa awo ŵakukhumba kumusopa mwakugomezgeka? Kasi wakukhumba kuti ticitenge vinthu mwakufikapo kuti wakondwe? Panji wakukhazga kuti ticitenge ivyo tingafiska? Para tingasanga mazgoro gha mafumbo agha tisopenge Ciuta mwakukondwa. Tiyeni tiwone ivyo nchimi Mika yikalemba pa nkhani iyi.​—Ŵazgani Mika 6:8.

“Wakalongora iwe . . . ico nchiwemi.” Tikwenera kughanaghanira waka yayi ivyo Ciuta wakukhumba kwa ise. Wali kutiphalira mwakupulikikwa makora mu Baibolo ivyo wakukhumba. Vyose ivyo Ciuta wakukhumba kwa ise ni ‘viwemi,’ viheni yayi. “Ciuta nchitemwa,” ntheura wakutikhumbira viwemi comene. (1 Yohane 4:8; 5:3) Para tikucita ivyo Ciuta wakukhumba, iyo wakondwenge ndipo nase tisangenge candulo.​—Duteronome 10:12, 13.

‘Kasi Yehova wakukhumba vici kwa imwe?’ Kasi Ciuta wangakhumba nadi kanthu kwa ise? Enya. Wakukhumba kuti timupulikirenge cifukwa iyo ndiyo wakutipa umoyo na ivyo vikukhumbikwa pa umoyo. (Salmo 36:9) Ipo kasi ni vici ivyo Ciuta wakukhumba kwa ise? Mika wakayowoya fundo zitatu pa nkhani ya ivyo Ciuta wakukhumba. Fundo ziŵiri zakwambilira zikukhwaskana na umo tikucitira na ŵanyithu, ndipo yacitatu njakukhwaskana na ubwezi withu na Ciuta.

“Kucita urunji.” Buku linyake likuti lizgu la Cihebere lakuti “urunji,” “likung’anamura kukhala makora na ŵanyithu mu cikaya.” Ciuta wakukhumba kuti ticitirenge ŵanyithu urunji kweniso tiŵacitirenge vinthu mwakukolerana na malango ghake. Tikucita urunji para tikuleka kutemwera na para tikugomezgeka pakucita vinthu na ŵanji. (Leviticus 19:15; Yesaya 1:17; Ŵahebere 13:18) Usange ŵanyithu tikuŵacitira urunji, nawoso ŵaticitirenge mwakuyana waka.​—Mateyu 7:12.

“Kutemwa lusungu.” Ciuta wakukhumba kuti tilongorenge waka lusungu yayi, kweni tikwenera kulutemwa. Lizgu la Cihebere lakuti [cheʹsedh]; ilo likung’anamura “lusungu,” lingang’anamuraso “lusungu lukuru” panji “citemwa cambura upusikizgi.” Munthu munyake wakusanda Baibolo wakati: ‘Mazgu ghakuti citemwa na lusungu, pa ghekha ghakulongora yayi ng’anamuro leneco la lizgu ili kweni para ghasazgika pamoza ndipo ghakupeleka ng’anamuro lake.’ Usange tikutemwa lusungu, tilulongorenge kufumira pasi pa mtima, na kovwira awo ŵakusuzgika. Para tikucita nthena, tikuŵa na cimwemwe.​—Milimo 20:35.

“Kwenda wakujiyuyura na Ciuta wako.” Mu Baibolo lizgu lakuti “kwenda” likung’anamura “kulondezga nthowa yinyake ya kacitiro ka vinthu.” Tikwenda na Ciuta usange tikucita vinthu nga umo Baibolo likuyowoyera. Kuti ticite nthena, tikwenera “kujiyuyura.” Kasi tingacita wuli? Para tili ŵakujiyuyura, timanyenge kuti ndise ŵakupeleŵera kwa Ciuta kweniso kumanya ivyo tingatondeka kufiska. Ntheura, kwenda ‘mwakujiyuyura na Ciuta,’ kukung’anamura kumanya ivyo iyo wakukhumba kweniso ivyo ise tingacita.

Cakukondweska nchakuti, Yehova wakukhumba vinandi yayi kukuluska ivyo tingafiska. Wakukondwa comene para wakuwona kuti tikufwilirapo kucita ivyo tingafiska pakumuteŵetera. (Ŵakolose 3:23) Wakumanya makora kutondeka kwithu. (Salmo 103:14) Usange nase mwakujiyuyura tamanya fundo izi, tendenge nayo mwacimwemwe. Mwalekeraci kusambira umo mungacitira kuti mwambe kwenda na Ciuta? Para mucitenge nthena wamutumbikaninge comene.​—Zintharika 10:22.