Nkhababikira mu katawuni kacoko ka Texcoco. Pa nyengo iyo misewu yinandi yikaŵavya thara, yikaŵa ya fuvu. Ŵanthu ŵa pa mizi yapafupi ŵakatemwanga kuyegha vinthu vyawo pa mbunda na kuluta navyo ku tawuni kukaguliska. Mbumba yithu yikaŵa yikavu ndipo tikaŵamo ŵana 9 ndipo ine nili wa nambara 7. Adada ŵakasonanga skapato kuti ŵatipwelelere. Kweni ŵakafwa apo nkhaŵa na vyaka 7. Kufuma pa nyengo iyo amama ŵakamba kusuzgikira kuti ŵatisangire cakurya.

Ŵasekuru ŵakimbanga gitala ndipo ndiwo ŵakalongozganga kwaya ku chalichi. Pafupifupi waliyose mu mbumba yithu wakalizganga vyakwimbira. Amama ŵakimbanga kwaya ku chalichi ndipo asibweni ŵakimbanga na kulizga piyano. Tose tikaŵa Ŵakatolika ŵakujipeleka, ndipo ine nkhawovwiranga wasembe panyengo ya Misa ndipo nkhakhumbanga kuzakaŵa mishonale. Kweni pa nyengo yeneyiyi nkhatemwanga kuwonelera mafilimu gha karati. Apo nkhawoneleranga mafilimu agha, nkhamba kuŵa munthu wankhaza comene.

Mu msumba wa Puebla, nkhanjira sukulu ya chalichi iyo yikasambizganga vya usembe. Cilato cane cikaŵa cakuti nizakaŵe wasembe Wacikatolika. Kweni mu cilimika caumaliro, nkhakhuŵara comene na Chalichi la Katolika. Sisitere wacisungwana wakamba kuninyengelera kuti nigone nayo. Nangauli nkhakana ciyezgo ici, kweni nkhamba kughanaghana vyakutora. Nakuti nkhabowozga kuti ŵasembe ŵanandi ŵakacitanga vinthu mwaupusikizgi. Paumaliro, nkhaleka vyakuti nizakaŵe wasembe.

 M’malo mwake nkhamba kusambira vyakwimba ku Mexico. Nkhati namalizga nkhatora ndipo mu nyengo yicoko waka tikaŵa na ŵana ŵanayi. Kuti novwire mbumba yane nkhimbanga ku Chalichi pa nyengo ya Misa.

Kufuma waka pakwamba, mu nthengwa yithu tikakhaliranga waka masuzgo. Kanandi ine na muwoli wane tikambananga cifukwa ca sanji. Pakwamba tikanenananga waka, kweni pamasinda tikamba kutimbana. Ndipo tikapatukana pati pajumpha vyaka 13 ndipo pamasinda tikalekana.

Apo tikaŵa kuti tindapatukane nkhakumanapo na Ŵakaboni ŵa Yehova. Ŵanakazi ŵaŵiri ŵakiza pa nyumba ndipo ŵakatipempha kuti tidumbiskane Baibolo. Pakuti nkhaghanaghananga kuti nkhumanya vinandi mu Baibolo, ntheura nkhanozgekera kuti niŵasuske. Nkhaŵafumba mafumbo ghanonono agho nkhawonanga kuti ghangazgoreka yayi. Kweni nkhazizwa kuwona kuti nyengo zose ŵakazgoranga makora kufuma mu Baibolo. Apa nkhawona kuti nkhumanya vicoko comene vyakukhwaskana na Baibolo. Ndipouli, ŵakaleka kutiyendera cifukwa nkhaŵa wakutangwanika comene kweniso muwoli wane wakaŵacitiranga msinjiro.

Nkhakumanaso na Ŵakaboni ŵa Yehova pati pajumpha vilimika vinkhondi, ndipo pa nyengo iyi nkhaŵa kuti nili na mwanakazi munyake zina lake Elvira. Elvira wakaŵasuskanga yayi Ŵakaboni ŵa Yehova, ntheura cikaniŵira cipusu kuti nisambirenge Baibolo mwakukhazikika. Nangauli vikaŵa nthena, kweni pakajumpha vyaka vinandi kuti nisinthe nkharo yane.

Kweni nkhamanya kuti usange nkhukhumba kusopa Yehova na mtima wose nkhwenera kusintha. Cakwamba nkheneranga kuleka kwimba pa Misa ya Ŵakatolika, na kusanga nchito yinyake kuti nipwelelerenge mbumba yane. (Uvumbuzi 18:4) Nkhenerangaso kulembeska nthengwa yane.

Kukwiya luŵiro ndico cikaŵa cinthu ico cikanisuzga comene kuti nisinthe. Kweni malemba ghaŵiri agho ghakanovwira comene ni, Salmo 11:5, ilo likuti Yehova wakutinkha nkhaza, na 1 Petrosi 3:7, ilo likanisambizga kuti usange nkhukhumba kuti Yehova wapulike malurombo ghane, nkhwenera kucindika muwoli wane. Nati naghanaghanirapo pa mavesi agha na kulomba wovwiri kwa Yehova, nkhamba kusintha.

Sono mbumba yane njakukondwa. Sono nkhuyezgayezga kuti niŵeso paubwezi na ŵana ŵane ŵa mwanakazi wakwamba na kovwira mbumba yane yasono kuti yilutilire kuŵa na cipulikano cakukhora.

Apo nkhaŵa mwana nkhakhumbanga kuzakaŵa wasembe na kovwira ŵanthu. Sono nkhuwona kuti umoyo wane ngwacandulo nadi. Nkhovwira mbumba yane mwakusambizga ŵanthu kwimba. Nkhuwonga comene cifukwa cakuti Yehova wakazikira nane, na kunipa mwaŵi kuti nisinthe kuŵa munthu muwemi.