Ciuta wakupulika malurombo gha ŵanthu ŵamitundu yose. (Salmo 145:18, 19) Baibolo likuticiska kuti timuphalirenge vyose ivyo tikwenjerwa navyo. (Ŵafilipi 4:6, 7) Ndipouli, malurombo ghanyake Ciuta wakukondwa nagho yayi. Mwaciyelezgero, malurombo ghakucita kusunga pa mtima ghakumukondweska yayi.—Ŵazgani Mateyu 6:7.

Kweniso Yehova wakukondwa yayi na malurombo gha ŵanthu awo ŵakuyuyulira dala malango ghake. (Zintharika 28:9) Mwaciyelezgero, kale Ciuta wakakana kupulika malurombo gha Ŵaisrayeli awo ŵakaŵa na mulandu wa kukoma. Ici cikulongora kuti tikwenera kufiska vinthu vinyake kuti Ciuta wapulike malurombo ghithu.—Ŵazgani Yesaya 1:15.

Tingalomba yayi kwa Ciuta usange tilije cipulikano. (Yakobe 1:5, 6) Tikwenera kugomezga kuti waliko kweniso kuti wakutipwelelera. Ntheura, tikwenera kusambira Baibolo kuti tiŵe na cipulikano cakukhora. Cifukwa cipulikano canadi cikujintha pa ukaboni uwo ukusangika mu Mazgu gha Ciuta.—Ŵazgani Ŵahebere 11:1, 6.

Tikwenera kulomba kufumira pasi pa mtima kweniso mwakujiyuyura. Nanga ni Mwana wake Yesu, wakaŵa wakujiyuyura pakulomba. (Luka 22:41, 42) Ntheura, m’malo mwa kuphalira Ciuta vyakucita, tikwenera kufwilirapo kumanya ivyo iyo wakukhumba. Ndipo tingavimanya para tikuŵazga Baibolo. Para tingacita nthena mbwenu tilombenge mwakukolerana na khumbo lake.—Ŵazgani 1 Yohane 5:14.