Vyaka 3,000 ivyo vyajumpha, munthu munyake wakalemba kuti wakapangika mwakuzizwiska. (Masalmo 139:14) Mwana wakupangika mwakuzizwiska chomene. Lekani ŵanthu ŵanandi ŵakugomezga kuti kuli Mlengi, uyo wakalenga vyamoyo vyose.—Ŵazgani Masalmo 139:13-17; Ŵahebere 3:4.

Uyo wakalenga charu chapasi na kuchinozga kuti pakhalenge vyamoyo, ndiyo mweneko wa umoyo. (Masalmo 36:9) Kwamba kale, Mlengi wakutiphalira vinandi vya iyo.—Ŵazgani Yesaya 45:18.

Thupi lithu likuyanako na la vinyama. Vili nthena chifukwa chakuti taŵanthu na vinyama, tose tikalengeka kuti tikhalenge pa charu chapasi. Kweni Mlengi wakapanga munthu wakwamba kufuma ku dongo, ku chinyama yayi.—Ŵazgani Genesis 1:24; 2:7.

Ŵanthu na vinyama ŵakupambana mu nthowa ziŵiri zikuruzikuru. Yakwamba, ŵanthu ŵakumanya Mlengi, ŵakumutemwa, na kumuchindika. Yachiŵiri, ŵanthu ŵali kulengeka kuti ŵakhalenge kwamuyirayira, kweni vinyama yayi. Taŵanthu tikufwa chifukwa chakuti munthu wakwamba wakakana kupulikira Mlengi.—Ŵazgani Genesis 1:27; 2:15-17.