Wupu wa United Nations ukuphalira ŵanthu wose kuti ŵakoleranenge, ŵachindikenge wanangwa wa ŵanyawo, kweniso ŵavikilirenge chilengiwa. Chifukwa wuli? Mu buku linyake la UN Chronicle muli mazgu agho Maher Nasser wakayowoya. Iyo wakati: ‘Pa charu chose pali vinthu viheni vinandi ivyo vikutimbanizga umoyo wa ŵanthu. Vinyake mwa vinthu ivi ni: Kusintha kwa chilengiwa, nkhaza, uchigeŵenga, ŵanthu ŵakuchichizgika kuleka vikaya vyawo, kweniso matenda.’

Ŵanthu ŵanyake ŵakukhumba kuti pa charu chose paŵe waka boma limoza. Ŵanyake mwa ŵanthu aŵa ni Dante wa ku Italy na Albert Einstein wakumanya vyasayansi. Albert Einstein wakababika mu 1879 na kufwa mu 1955. Ndipo Dante wakababika mu 1265 na kufwa mu 1321. Iyo wakaŵa wakusambira chomene, wakalembanga mapowemu, kweniso wakaŵa kaswiri wandyali. Dante wakagomezganga kuti mu charu cha ndyali ichi mungaŵa mtende yayi chifukwa ŵanthu mbambura kukolerana. Dante wakakora mazgu gha Yesu Khristu ghakuti “ufumu . . . uwo ukugaŵikana ukupasuka.”—Luka 11:17.

Yikati yamara waka nkhondo Yachiŵiri ya pa Charu Chose iyo ŵakagwiliskira ntchito mabomba ghakofya, Albert Einstein wakalembera kalata wupu wa United Nations. Iyo wakati: “Wupu wa United Nations ukwenera kuchitapo kanthu mwaluŵiro mwakuti pa charu chose paŵe chivikiliro kweniso paŵe boma limoza liwemi.”

Kweni kasi ŵandyali awo ŵangapanga boma ili, ŵangaleka vimbundi, nkhaza, na kukandilizgana? Panji kasi nawo ŵangayana waka na ŵanyawo awo ŵali kuwusapo? Mafumbo agha ghakutikumbuska waka mazgu agho kaswiri munyake wakumanya vya mbiri Lord Acton wakayowoya. Iyo wakati: ‘Para munthu wapika mazaza wakwamba kuŵa na nkharo yiheni ndipo para wapika mazaza ghanandi vinthu vikunangikirathu.’

Kuti taŵanthu tiŵe pa mtende wanadi, tikwenera kuŵa ŵakukolerana. Kweni kasi tingachita wuli? Kasi vingachitika nadi kuti tiŵe pa mtende? Baibolo likuti ndivyo vichitikenge. Munthowa wuli? Ufumu wa Chiuta ndiwo wizenge na mtende pa charu chapasi, maboma gha ndyali yayi. Ni boma la Chiuta pera ilo lingalamulira makora taŵanthu. Kasi boma ili ni ndi? Baibolo likuti boma ili ni “Ufumu wa Chiuta.”—Luka 4:43.

Yesu Khristu wakaghanaghaniranga chomene vya Ufumu wa Chiuta lekani mu lurombo ulo wakasambizga ŵasambiri ŵake wakayowoya kuti: “Ufumu winu wize. Khumbo linu lichitike pano pasi.” (Mateyu 6:9, 10) Nadi, Ufumu wa Chiuta uzamuwoneseska kuti khumbo la Chiuta lachitika pa charu chapasi, la ŵanthu ŵalyezgi yayi.

Ufumu wa Chiuta ukuchemekaso kuti “Ufumu wakuchanya.” (Mateyu 5:3) Chifukwa wuli? Chifukwa Ufumu uwu uzamulamulira pa charu chapasi kufuma kuchanya. Kasi ichi chikung’anamura vichi? Boma ili lizamukhumba wovwiri uliwose wa ndalama yayi panji misonkho kuti lende makora. Ŵanthu awo ŵazamuwusika na boma ili ŵazamupumuzgika nadi.

Mazgu ghakuti “ufumu” ghakulongora kuti Ufumu wa Chiuta ni boma lakugomezgeka. Fumu ya boma ili ni Yesu Khristu uyo wali kupika nkhongono kufuma kwa Chiuta. Pakuyowoya za Yesu, Baibolo likuti:

• “Kuwusa kuzamuŵa pa chiŵegha chake . . . Kusazgikira kwa muwuso wake na mtende vizamumara chara.”—Yesaya 9:6, 7.

• “Iyo wakapika muwuso, ntchindi, na ufumu kuti ŵanthu, mitundu ya ŵanthu, na ŵanthu ŵa viyowoyero vyose ŵamuteŵeterenge. Muwuso wake . . . uzamuparanyika chara.”—Daniyeli 7:14.

•   “Ufumu wa charu wazgoka Ufumu wa Fumu [Chiuta] yithu na wa Khristu wake.”—Chivumbuzi 11:15.

Lurombo ulo Yesu wakasambizga ŵasambiri ŵake luzamufiskika apo Ufumu wa Chiuta uzamufiska khumbo la Chiuta pa charu chapasi. Chifukwa cha Ufumu uwu, ŵanthu wose ŵazamusambira umo ŵangapwelelera makora charu kuti chiŵe chiwemi nga umo chikaŵira pakwamba. Charu ichi chizamuŵaso na vyamoyo vinandi.

Ufumu wa Chiuta uzamusambizgaso taŵanthu. Tose tizamusambizgika vinthu vimoza. Pazamuŵavya kugaŵikana panji kwambana. Lemba la Yesaya 11:9 likuti: “Vizamupwetekana chara panji kuparanyana . . . chifukwa charu chapasi chizamuzura na kumanya Yehova nga umo maji ghakuzuzgira nyanja.”

Pa charu chose chapasi, ŵanthu ŵazamuŵa pa mtende kweniso ŵazamuŵa ŵakukolerana, ivyo wupu wa United Nations watondeka kufiska. Lemba la Salimo 37:11 likuti: “Ŵazamukondwa chomene na mtende ukuru.” Para nyengo yajumphapo, tizamuyowoyaso yayi mazgu ghakuti, “kuswa malango,” “kunangika kwa chilengiwa,” “ukavu,” na “nkhondo.” Kweni kasi mphawuli apo vinthu ivi vizamuchitikira? Kasi mphawuli apo Ufumu wa Chiuta uzamwamba kulamulira pa charu chapasi? Kasi uzamulamulira wuli? Ndipo kasi mungachita wuli kuti muzakasange vitumbiko mu Ufumu uwu? Tiyeni tiwone.