Baibolo lili na nkhongono yakusintha umoyo wa ŵanthu. Wonani nkhani za ŵanthu ŵaŵiri aŵa: Ricardo na Andres.

RICARDO: Apo nkhaŵa na vyaka 15, nkhajoyina gulu la vigeŵenga. Ŵabwezi ŵane aŵa ŵakatimbanizga chomene umoyo wane. Ndipo nkhamba kuŵa na khumbo lakuti nkhakhale mu jele vyaka 10. Uwu ukuwoneka nga mbuzeleza. Kweni mu chigaŵa chithu, ŵanthu ŵakaŵachindikanga awo ŵakhalako ku jele. Ndipo nane nkhakhumbanga kuŵa nga ndiwo.

Nkhachitanga vyose ivyo vigeŵenga vikutemwa kuchita, nga kumwa munkhwala wakuzweteska wongo, uzaghali, na nkhaza. Usiku unyake tikalasananga na futi na gulu linyake la vigeŵenga. Nkhaghanaghananga kuti nikomekenge, kweni mwamwaŵi nkhapwetekeka yayi. Ivi vikati vyachitika, nkhamba kughanaghanirapo chomene vya umoyo wane na ivyo nkhukhumba kuchita. Ndipo nkhawona kuti nkhwenera kusintha. Kweni nkhate nisinthenge wuli? Ni nkhu uko nkhate nisangenge wovwiri?

Ŵabali ŵane ŵanandi ŵakakondwanga yayi. Ŵakasangananga na masuzgo ghanandi. Kweni ndimo vikaŵira yayi na banja la asibweni. Nkhawonanga kuti ŵakaŵa ŵanthu ŵawemi, ndipo ŵakalondezganga ivyo Baibolo likuyowoya. Zuŵa linyake ŵakanisambizga kuti zina la Chiuta ni Yehova. Pakati pajumpha nyengo yichoko waka kufuma apo tikalasananga, nkhalomba kwa Yehova ndipo nkhazunura zina lake na kumupempha kuti wanovwire. Nkhazizwa chomene kuti zuŵa lakulondezgapo, Kaboni wa Yehova wakagogoda pa chijaro. Ndiyo wakamba kunisambizga Baibolo.

Pakaŵa suzgo linyake ilo nkhasangana nalo. Kanandi ŵabwezi ŵane ŵakaniyimbiranga foni kuti tikaŵire lumoza. Nangauli chikaŵa chipusu yayi, kweni nkhakana. Nkhaŵikapo mtima kuti nilutilire kusambira Baibolo, ndipo nkhukondwa chomene kuti ndivyo nkhachita. Umoyo wane ukasintha chomene, ndipo pasono ndine wakukondwa zanadi.

Nkhamuphalira Chiuta mu lurombo kuti nyengo yinyake nkhakhumbanga kuti nkhakhale mu jele vyaka 10 mwakuti ŵanthu ŵanichindikenge. Ntheura, nkhamupempha Yehova kuti wanovwire kuti nimuteŵetere kwa vyaka 10 nga mupharazgi wanyengozose, mwakuti novwire ŵanyane nga umo nane ŵakanovwilira. Chiuta wali kuzgora lurombo lwane, ndipo nateŵetera nga mupharazgi wanyengozose kwa vyaka 17. Kweniso nindalutepo ku jele.

Ŵanandi mwa ŵabwezi ŵane ŵakale, ŵakhala mu jele vyaka vinandi. Ŵanyake ŵali kufwa. Nkhuwonga chomene ŵabali ŵane awo Mbakaboni ŵa Yehova. Ŵakapambananga na ŵanthu ŵanyake chifukwa ŵakalondezganga fundo za mu Baibolo. Nkhaŵachindikanga chomene ŵabali ŵane aŵa  kuluska waliyose mu kagulu kithu ka vigeŵenga. Kuluska vyose, nkhuwonga Chiuta chifukwa cha kunisambizga kuti niŵe na umoyo uwemi.

ANDRES: Nkhababika na kukulira mu tawuni yinyake yikavu uko ŵanthu ŵakatemwanga chomene munkhwala wakutimbanizga wongo, kwiba, kukomana, kweniso uhule. Adada ŵakatemwanga chomene moŵa na kokeni. Nyengo zose adada na amama ŵakatemwanga kunenana na kutimbana.

Nkhamba kumwa moŵa na munkhwala wakutimbanizga wongo apo nkhaŵa nichali muchoko. Kanandi nkhatandaranga mu misewu, nkhibanga na kuguliska ivyo niba. Nati nakura, adada ŵakamba kunisambizga vinthu viheni. Ŵakanisambizga umo ningagwentheskera na kuguliska munkhwala wakuzweteska wongo na vinthu vinyake ivyo boma likakanizganga. Nkhasanganga ndalama mwaluŵiro chomene. Zuŵa linyake ŵapolisi ŵakiza ku nyumba kwane na kunikaka. Ŵakaniyimba mulandu wakuti nkhakhumbanga kukoma munthu. Ntheura ŵakanijalira mu jele kwa vyaka 5.

Zuŵa linyake namulenji apo nkhaŵa mu jele, tikapulika chipharazgo mu masipika kuti tikuchemeka kuti tikapulikizge nkhani ya mu Baibolo iyo yikayowoyeka na Ŵakaboni ŵa Yehova. Nkhaluta ndipo ivyo nkhapulika vikaŵa vyamahara, ntheura nkhamba kusambira Baibolo na Kaboni wa Yehova. Ŵakanisambizga ivyo Chiuta wakukhumba na kunilongosolera makora mwambura kubisa ivyo Malemba ghakuyowoya.

Nkhawona kuti ningasintha yayi umoyo wane kwambura wovwiri wa Yehova, chomenechomene para ŵakayidi ŵanyane ŵaniwofya kuti nileke kusambira Baibolo. Nkhalomba kwa Yehova kuti wanipe nkhongono na vinjeru, ndipo wakanovwira nadi. Nkhaleka kuchita wofi ndipo nkhamba kuphalirako ŵakayidi ŵanyane ivyo Baibolo likusambizga.

Deti lane lakufumira mu jele likati lakwana, nkhafipa mtima chomene mwakuti nkhakhumbanga yayi kufumamo. Apo nkhafumanga kuluta ku nyumba, ŵakayidi ŵanyane ŵanandi ŵakanibayibiskanga. Ŵanyake ŵakayowoyanga mwachitemwa kuti, ‘Wende makora kamuliska kithu.’

Nkhumanya yayi umo umoyo wane ukate uŵirenge nilekenge kuzomera kuti Chiuta wanisambizge. Nkhumuwonga chomene Chiuta chifukwa chakuti wakunitemwa ndipo wakawona kuti ningasintha umoyo wane. *