“Wafukafuke, wagwire ntchito yiwemi na mawoko ghake, mwakuti waŵe na kanthu kakuti wamupeko mukavu.”​—ŴAEFESO 4:28.

Mlengi withu wakukhumba kuti tiwonenge ntchito mwakwenelera. Chifukwa wuli? Chifukwa munthu uyo wakulimbikira kugwira ntchito wakuŵa wakukondwa chifukwa wakusanga vinthu ivyo vingawovwira iyo pamoza na banja lake. Iyo wangawovwiraso munthu munyake uyo wasuzgika. Uyo wakamulemba ntchito nayo wamuwonenge kuti ngwakuzirwa. Ndipo kanandi munthu uyo wakulimbikira ntchito ŵakumulekeska bweka yayi ntchito. Baibolo likulongosora kuti viwemi ivyo munthu wakusanga pa ntchito, “ntchawanangwa chakufuma kwa Chiuta.”​—Mupharazgi 3:13.

“Tikugomezga kuti tili na njuŵi yiwemi, ndipo tikukhumba kuŵa ŵakugomezgeka mu vinthu vyose.”​—ŴAHEBERE 13:18.

Para tili ŵakugomezgeka tikujichindika, tikuŵa na mtende wa mu mtima, ndipo usiku tikugona tulo tuwemi. Kweniso ŵanthu ŵakutigomezga na kutichindika. Kweni ŵanthu ŵambura kugomezgeka ŵakujipoka vinthu viwemi ivi. Kweniso njuŵi zawo zingaŵasuzga ndipo ŵakukhala mwawofi pakumanya kuti zuŵa linyake ivyo ŵakuchita vingazakavumbukwa.

“Umoyo winu uŵenge wambura kutemwa ndalama, uku mukukhorwa na vinthu ivyo vilipo.”​—ŴAHEBERE 13:5.

Tikukhumbikwira ndalama kuti tisange chakurya na vinthu vinyake vyakukhumbikwa. Kweni, “kutemwa ndalama” nkhwakofya chomene. Kungapangiska munthu kumalira nyengo yake yinandi na nkhongono kulimbana na kusanga ndalama zinandi. Ivi vingananga nthengwa kweniso munthu wangaŵavya nyengo yakuchezgera na ŵana, ndipo vingapangiskaso kuti walwarengelwarenge. (1 Timote 6:9, 10) Kweniso munthu uyo wakutemwa chomene ndalama wangayezgeka kuchita vinthu mwambura kugomezgeka. Munthu munyake wavinjeru wakayowoya kuti: “Munthu wakugomezgeka wapokerenge vitumbiko vinandi, kweni uyo wakuchimbilira kusambazga waŵenge wambura mulandu chara.”​—Zintharika 28:20.

“Sungilira vinjeru na kaghanaghaniro kawemi.”​—ZINTHARIKA 3:21.

Masambiro ghawemi ghangatovwira kuti para takura tizakachitenge makora vinthu na kuŵa mupapi muwemi. Kweni ni nyengo zose yayi apo munthu vinthu vikumwendera makora na kuŵa wakukondwa nangauli wangaŵa kuti wasambira masambiro ghapachanya mu charu ichi. Kuti vinthu vitendere makora mu vigaŵa vyose vya umoyo withu, tikukhumbikwira masambiro agho Chiuta wakupeleka. Malemba ghakuti munthu uyo wakutegherezga kwa Chiuta, “chilichose icho wakuchita chendenge makora.”​—Salimo 1:1-3.