Lipoti la mu 2014 likulongora kuti ŵawukirano 61 pa 100 ŵa vyaka vyapakati pa 18-25 ŵakuwona kuti kugonana pambere ŵandatorane “sono ni nkhani yikuru yayi ku India.” Dokotala wa ku Mumbai wakaphalira nyuzipepara ya Hindustan Times kuti iyo wakuwona kuti “para ŵanyamata ŵakwamba vibwezi ŵakughanaghana vya kutorana yayi. Ŵakuyowoyapo yayi vya nthengwa nanga ni para ŵapangana kuti ŵagonane usiku umoza pera, ŵali pa chibwezi, panji ŵakukhalira lumoza.”

FUNDO YAKUTI TIGHANAGHANIREPO: Kasi ŵanthu ŵanandi awo ŵakutora matenda panji kusuzgika maghanoghano ni awo ŵakugonana pambere ŵandatorane panji ni awo ŵakugonana para ŵatorana?—1 Ŵakorinte 6:18.

Ukaboni ukulongora kuti ŵanthu awo kanandi ŵakwambana na ŵabali ŵawo, ŵakukaŵa yayi kufwa para ŵafika vyaka vyapakati pa 35 na 50. Ŵanthu ŵa pa yunivesite ya Copenhagen ndiwo ŵakachita kafukufuku uyu mu vyaka 11, ndipo ŵakachitira pa ŵanthu pafupifupi 10,000 ŵa vyaka vyapakati pa 35 na 50. Ŵakasanga kuti awo nyengo zinandi ŵakambananga na ŵabali ŵawo, ŵakaŵa pangozi yikuru yakuti ŵangafwa luŵiro kuluska awo ŵakambananga viŵi yayi. Uyo wakambiska kafukufuku uyu wakayowoya kuti usange ŵanthu ŵangasambira kumazga luŵiro masuzgo na mphindano “vingawovwira chomene kuti unandi wa ŵanthu awo ŵakufwa ŵachali ŵachoko uchepeko.”

BAIBOLO LIKUTI: “Munthu uyo wakumanya tunthu wakujiwezga pakuyowoya, ndipo munthu waumanyi wakuzikira.”—Zintharika 17:27.

Sonosono apa ku Louisiana ŵanthu ŵanyake ŵakachita kafukufuku pa ŵanthu 564 awo ŵakaŵa kuti ŵatorana waka. Iwo ŵakasanga kuti ŵanthu awo pa chibwezi ŵakutemwa kulekana na kuweleranaso, usange ŵatorana ŵakukaŵa yayi kukhumba kupatukana para ŵakhala waka vyaka vinkhondi mu nthengwa. Kanandi ŵakwambana chomene ndipo ŵakukondwa yayi na nthengwa yawo.

BAIBOLO LIKUTI: “Icho Chiuta wagumanya pamoza [mu nthengwa], munthu waleke kupatura.”—Mateyu 19:6.