Ŵanthu awo mbakugomezgeka, ŵanyawo nawo ŵakuŵagomezga. Mwachiyelezgero, ŵapapi, ŵabwezi, kweniso mabwana ghakugomezga awo mbakugomezgeka. Ŵanthu awo mbakugomezgeka nyengo zose ŵakulondezga malango, ŵakufiska ivyo ŵalayizga, kweniso ŵakuyowoya unenesko.

Kanandi munthu uyo ngwakugomezgeka wakupika wanangwa kuyana na umo wakugomezgekera.

Sarahi wakati: “Kanandi kuti ŵapapi ŵakugomezge ni para nyengo zose ukugomezgeka nanga ni para iwo palije.”

FUNDO YA MU BAIBOLO: “Lutilirani kuyezga umo imwe muliri.”—2 Ŵakorinte 13:5.

Fundo zakulondezgapo izi zingamovwirani usange mukukhumba kuti ŵanthu ŵamugomezganinge panji kuti ŵambeso kumugomezgani.

Nyengo zose yowoyani unenesko. Ŵanthu ŵalekenge kumugomezgani usange nyengo zinyake mukuteta. Ŵanthu ŵangamba kumugomezgani usange mukuyowoya unenesko pa ivyo mwabudiska.

Caiman wakati: “Vikusuzga yayi kuyowoya unenesko para vinthu vili makora waka. Kweni para mukuyowoya unenesko pa vinthu ivyo vingananga lumbiri lwinu, ŵanthu ŵamugomezganinge.”

FUNDO YA MU BAIBOLO: “Tikukhumba kuŵa ŵakugomezgeka mu vinthu vyose.”—Ŵahebere 13:18.

Gomezgekani. Kafukufuku uyo wakachitika ku U.S. wakalongora kuti makampani ghanandi para ghakukhumba kulemba munthu ntchito ghakupenja uyo ngwakugomezgeka. Para ŵachinyamata mbakugomezgeka vikuzakaŵawovwira chomene para ŵakura.

Sarah wakati: “Ŵapapi ŵane ŵakuwona para nkhugwira ntchito za panyumba kwambura kuniphalira. Para nkhulutilira kuchita nthena mwakugomezgeka ndipo nawo ŵakunigomezga chomene.”

FUNDO YA MU BAIBOLO: “Nili na chigomezgo kuti upulikirenge, . . . pakumanya kuti uchitenge vinandi kuluska ivyo nayowoya.”—Filimoni 21.

Zikirani. Kanandi ŵanthu ŵakumanya para munthu wakukura kweni pakwenera kujumpha nyengo kuti ŵanthu ŵamanye usange munthu ngwakukhwima mu maghanoghano.

Brandon wakati: “Pangatora nyengo kuti ŵapapi kweniso ŵanthu ŵanyake ŵamumanyani kuti ndimwe ŵakugomezgeka. Kweni para nyengo zose mukugomezgeka ndipo ŵanthu ŵamanyenge kuti ndimwe ŵakugomezgeka nadi.”

FUNDO YA MU BAIBOLO: “Vwarani mtima wa . . . kuzikira.”—Ŵakolose 3:12.