Ŵanthu awo ŵakulimbikira ntchito ŵakuŵa ŵakata yayi. M’malo mwake ŵakulimbikira kugwira ntchito kuti ŵasange vyakukhumbikwira kweniso kuti ŵawovwire ŵanyawo nangauli ntchito iyo ŵakugwira ŵanthu ŵangayiwona nga njapasi.

Pali vinandi ivyo vikukhumbikwa pa umoyo. Mu charu ichi, ŵanthu ŵanandi ŵakulimbikira yayi ntchito. Kweni para munthu wakulimbikira ntchito vinthu vikumuyendera makora.—Mupharazgi 3:13.

Reyon wakati: “Para wamunthu ukulimbikira ntchito ukuŵa wakukondwa kweniso wakukhorwa. Chifukwa chakuti nkhuŵa wakukhorwa, vikunovwira kuti nitemwenge ntchito. Para wamunthu ukutemwa ntchito ukuŵa na mbiri yiwemi.”

FUNDO YA MU BAIBOLO: “Ntchito yiliyose iyo munthu wakulimbikira kuyichita yili na chandulo.”—Zintharika 14:23.

Vinthu vyakulondezgapo ivi vingamovwirani kuti muwonenge mwakwenelera ntchito.

Ŵikanipo mtima para mukusambira ntchito. Kwali mukugwira ntchito za panyumba, mukulemba homuweki panji mukugwira ntchito yakulembeka, mukwenera kuchita na mtima wose. Para mwayimanya ntchito, sankhani nthowa za umo mungachitira mwaluso ntchito iyo mukugwira kweniso kwambura kutaya nyengo yitali. Para mwayimanya makora ntchito, mukondwenge para mukugwira.

FUNDO YA MU BAIBOLO: “Kasi wamuwona munthu waluso pa mulimo wake? Wimilirenge panthazi pa mathemba, panthazi pa ŵanthu bweka wimilirengepo yayi.”—Zintharika 22:29.

Ŵanyinu ŵakovwirika. Para mukugwira makora ntchito, mukovwiraso ŵanyinu. Mwachiyelezgero, para mukulimbikira kugwira ntchito za panyumba, mukovwira ŵa mu banja linu kuti ŵaleke kuphyoka chomene na ntchito.

FUNDO YA MU BAIBOLO: “Uyo wakupeleka wakukondwa chomene kuluska uyo wakupokera.”—Milimo 20:35.

Sazgiraniko ntchito iyo mukwenera kugwira. M’malo mwakugwira waka ntchito iyo mwapika, sazgiraniko ntchito yinyake. Para mwachita nthena, ndikuti mukumanya ivyo mungachita ndipo mukugwira ntchito kwambura kuchichizgika kweni chifukwa chakuti mwakhumba mwekha.—Mateyu 5:41.

FUNDO YA MU BAIBOLO: “Mwakuti mulimo wako uwemi uchitike kwambura kuchichizgika, kweni mu khumbo lako.”—Filimoni 14.

Muwonenge ntchito mwakwenelera. Ŵanthu awo ŵakulimbikira ntchito ŵakuŵa ŵakata yayi kweniso ŵakugwira waka ntchito kwambura kupumura yayi. Para munthu wakugwira ntchito, wakuŵa wakukondwa para wakulimbikira kweniso para wakusanga nyengo yakupumulira.

FUNDO YA MU BAIBOLO: “Woko limoza lakuzura na chipumulo ndiwemi kuluska mawoko ghaŵiri ghakuzura na kuphyoka na kuchimbizga waka mphepo.”—Mupharazgi 4:6.