KU ŴAPAPI
7: Nkharo
IVYO MUKWENERA KUMANYA
Nkharo ni mikhaliro iyo munthu wakulondezga na kumanyikwa nayo. Mwachiyelezgero, kasi mukuyezgayezga kuti muŵe ŵakugomezgeka mu vinthu vyose? Para ni nthena ipo mungatemwa kuti ndimoso ŵana ŵinu ŵachitirenge.
Mungaŵasambizgaso uwemi wakulimbikira ntchito, kuŵa walusungu kweniso kughanaghanira ŵanji. Para mwana wasambizgika vinthu ivi wachali muchoko, kunthazi vizamumusuzga yayi.
FUNDO YA MU BAIBOLO: “Lera mwana mu nthowa iyo wakwenera kwendamo, nanga wangakura wafumengemo chara.”—Zintharika 22:6, mazgu ghamusi.
CHIFUKWA WULI NTCHAKUZIRWA
Mazuŵa ghano ntchakukhumbikwa chomene kuŵa na nkharo yiwemi. Mama munyake zina lake Karyn wakati: “Mazuŵa ghano munthu wangawona vinthu viheni pa foni nyengo yiliyose. Ŵana ŵithu ŵangawonelera vinthu viheni uku takhala nawo lumoza.”
FUNDO YA MU BAIBOLO: “Ŵanthu ŵakukhwima . . . ŵali kuzgoŵezga nkhongono zawo zakamanyiro kupambaniska pakati pa chiwemi na chiheni.”—Ŵahebere 5:14.
Sambizgani ŵana ŵinu kuti ŵaghanaghanirenge ŵanji. Mungaŵasambizga ŵana ŵinu tunthu tuchokotuchoko (nga nkhuyowoya mwantchindi na kuwonga), kweniso kuti ŵaghanaghanirenge ŵanyawo. Mikhaliro iyi njakuzirwa chomene chifukwa ŵanthu mazuŵa ghano ŵakutangwanika chomene na mafoni kweniso matabuleti kuluska kuchezga na ŵanyawo.
FUNDO YA MU BAIBOLO: “Ivyo mukukhumba kuti ŵanthu ŵamuchitiraninge, ndivyo namwe muŵachitirenge.”—Luka 6:31.
IVYO MUNGACHITA
Ŵalongosolerani makora ŵana ŵinu. Kafukufuku wakulongora kuti usange ŵana ŵasambizgika makora uheni wakugonana pambere ŵandanjire munthengwa, kanandi ŵakuŵa ŵakujikora pa nkhani ya kugonana.
ICHO CHINGAMOVWIRANI: Yambani na kudumbiskana nkhani iyo yachitika mwasonosono mu chigaŵa chinu. Mwachiyelezgero, usange pa nyuzi ŵayowoya kuti ŵanthu ŵakoma ŵanyawo, mungayowoya kuti: “Ntchachitima kuti ŵanthu ŵanyake ŵakukoma ŵanyawo. Ukughanaghana kuti vikenda wuli kuti ŵanthu aŵa ŵambe kukoma ŵanyawo?”
Brandon wakati: “Ntchakusuzga kuti mwana wapambaniske pakati pa chiwemi na chiheni usange wakumanya yayi.”
Sambizgani ŵana ŵinu nkharo yiwemi. Ŵana ŵachoko nawo ŵangasambira kuwonga para ŵanthu ŵaŵachitira viwemi. Buku linyake likuti: “Para ŵana mukuŵawona kuti mbakuzirwa kwali mpha sukulu, muchigaŵa panji mu banja nawo ŵakuŵa ŵakunozgeka kovwira ŵanthu ŵanyake.”—Parenting Without Borders.
ICHO CHINGAMOVWIRANI: Ŵagaŵirani ntchito za panyumba ŵana ŵinu kuti ŵasambire uwemi wakuteŵetera ŵanji.
Tara wakati: “Para ŵana ŵinu ŵazgoŵera kugwira ntchito za panyumba, vizamuŵasuzga yayi para ŵamba kukhala paŵekha chifukwa ŵali kuzgoŵera kale kugwira ntchito.”
