Usange mfumu na muwoli ŵakuchitira lumoza vinthu, ŵali nga ni uyo wakwendeska ndege na movwiri wake. Para ŵasangana na masuzgo ŵakovwirana m’malo mwakulekera munthu yumoza.

FUNDO YA MU BAIBOLO: “Mbaŵiriso yayi, kweni thupi limoza.”—Mateyu 19:6.

Christopher wakati: “Mfumu na muwoli ŵakwenera kuchitira vinthu pamoza kuti nthengwa yende makora.”

Para pasangika suzgo, mfumu na muwoli awo ŵakuchitira vinthu pamoza yayi ŵakwamba kugazgana m’malo mwakumazga suzgo. Tumasuzgo tuchokotuchoko paumaliro likuŵa suzgo likuru.

Alexandra wakati: “Ntchakuzirwa chomene kuchitira vinthu lumoza munthengwa. Ine na mfumu wane tilekenge kuchitira lumoza vinthu, mphanyi vili nga ni ŵanthu ŵaŵiri awo ŵakugona chipinda chimoza awo waliyose wakwendera yake pakusankha vinthu.”

JISANDANI

• Kasi ndalama izo mukusanga, mukuwona kuti ni “zinu pera”?

• Kasi nkhufwatuka chomene para mfumu panji muwoli wane palije?

• Kasi nkhuŵikako mahara yayi ku ŵabali ŵa munyane wamunthengwa?

DUMBISKANANI NA MUNYINU WAMUNTHENGWA

• Kasi ni vinthu wuli ivyo tikuchitira lumoza munthengwa yithu?

• Kasi ni vinthu wuli ivyo tikwenera kusintha kuti tichite makora?

• Kasi tingachita wuli kuti tichitirenge lumoza vinthu?

IVYO VINGAMOVWIRANI

• Tiyelezgere kuti mukuchita maseŵero ghanyake ndipo imwe na munyinu wamunthengwa muli timu yakupambana. Kasi mungachita wuli kuti imwe na munyinu muŵe timu yimoza pakulimbana na masuzgo?

• M’malo mwakughanaghana kuti, ‘Kasi ningawina wuli?’ ghanaghanirani kuti, ‘Kasi tingawina wuli’?

Ethan wakati: “Lekani kughanaghanira za uyo wabuda panji uyo wandabude. Chifukwa ichi chingawovwira yayi kuti muŵe na mtende mu banja kweniso ŵakukolerana.”

FUNDO YA MU BAIBOLO: “Kulaŵiska pa ivyo imwe mukukhumba pera yayi, kweniso ivyo ŵanyinu ŵakukhumba.”—Ŵafilipi 2:3, 4.