Kuŵa na Umoyo Uwemi
Baibolo ni buku la vyachipatala yayi. Ndipouli, lili na fundo zakovwira kuti tiŵe na umoyo uwemi. Wonani fundo zinyake za mu Baibolo izo zingamovwirani kuti muŵe na umoyo uwemi.
MUPWELELERENGE THUPI LINU
FUNDO YA MU BAIBOLO: “Palije munthu uyo wakutinkha thupi lake, kweni wakulilyeska na kulipwelelera.”—Ŵaefeso 5:29.
IVYO FUNDO IYI YIKUNG’ANAMURA: Fundo ya pa lemba ili yikutichiska kuti tikwenera kuchita ivyo tingafiska kuti tipwelelere thupi lithu. Kafukufuku munyake wakalongora kuti matenda ghanyake ghakwiza chifukwa cha ivyo taŵanthu tikusankha. Ntheura para tasankha makora vinthu, tikuŵa na umoyo uwemi.
IVYO MUNGACHITA:
-
Chakurya. Muryenge chakurya cha magulu ghose kweniso mumwenge maji ghanandi.
-
Muchitenge Maseŵero. Kuchita maseŵero kungamovwirani kuti muŵe na thupi liwemi, nanga mungaŵa kuti mukulwara panji muli ŵachekuru. Nangauli ŵachibali panji madokotala ŵangamovwirani kuti muchitenge maseŵero, kweni mwaŵeneko mukwenera kuŵikapo mtima chomene.
-
Mugonenge Mwakukwana. Ŵanthu awo ŵakugona mwakukwana yayi, ŵangamba kulwara matenda ghakuru. Ŵanthu ŵanandi ŵakugona mwakukwana yayi chifukwa ŵakuchita vinthu vinyake pa nyengo iyo ŵakwenera kugona. Ntheura para mugonenge mwakukwana muŵenge na umoyo uwemi.
LEKANI VIZGOŴI VIHENI
FUNDO YA MU BAIBOLO: “Tiyeni tijitozge ku ukazuzi wose wa thupi na wauzimu.”—2 Ŵakorinte 7:1.
IVYO FUNDO IYI YIKUNG’ANAMURA: Tikuŵa na umoyo uwemi para tikugega vinthu ivyo vingananga thupi lithu nga, nkhukhweŵa hona. Kukhweŵa hona ntchimoza mwa vinthu ivyo vikupangiska ŵanthu ŵanandi kulwara na kufwa.
IVYO MUNGACHITA: Sankhani zuŵa ilo muzamulekera kukhweŵa ndipo lembani pa kalendara yinu. Pambere zuŵa ili lindakwane, mungatayirathu ndudu na kuleka kwenda na matchisa kweniso vinthu vinyake ivyo vingamupangiskani kukhweŵa. Lekani kuluta ku malo uko ŵanthu ŵanandi ŵakutemwa kukhweŵa. Phalirani ŵa mu banja linu na ŵabwezi ŵinu kuti mukukhumba kuleka kukhweŵa mwakuti ŵamovwirani.
FUNDO ZINYAKE ZA MU BAIBOLO
Kuti musange Baibolo, mungapempha yumoza wa Ŵakaboni ŵa Yehova mu chigaŵa chinu
GEGANI VINTHU IVYO VINGAPANGISKA NGOZI.
“Usange wazenga nyumba yiphya, uŵikeposo kachiliŵa pachanya pa mtenje, kuti uleke kuŵa na mulandu wa ndopa para munthu wawapo.”—DOTORONOME 22:8.
MUJIKORENGE PARA MWAKWIYA.
“Uyo wakuleka kukalipa luŵiro wali na umanyi ukuru, Kweni wakaŵefu wakulongora uchindere wake.”—ZINTHARIKA 14:29.
GEGANI KURYA MWAKUJUMPHIZGA.
“Ungaŵanga yayi pamoza na awo . . . ŵali na dozo likuru.”—ZINTHARIKA 23:20.
Panji Mungatemwa Kuŵerengaso Nkhani Izi
WUKANI!
Umoyo Uwemi na Kuzizipizga Masuzgo
Para munthu wakulwaralwara, kasi ndikuti wangaŵa yayi wakukondwa?
