Ŵanthu mamiliyoni ghanandi ŵalondezga fundo izo zili mu magazini iyi ndipo ŵachita vinandi kuti ŵamazge sankho mu mitima yawo. Kweni unenesko ngwakuti patekha tingamazga yayi mtundu uliwose wa sankho. Kasi chikung’anamura kuti suzgo ili lingamalirathu yayi?

Maboma gha ŵanthu ghatondeka kumazga sankho. Kweni kasi chikung’anamura kuti palije boma ilo lingamazga sankho?

Boma ilo lingamazga sankho likwenera

1. 1. Kuchiska ŵanthu kuti ŵasinthe kaghanaghaniro kawo na umo ŵakuwonera ŵanji.

2. 2. Kumazga vinthu ivyo vingapangiska kuti chiŵe chakusuzga kuchitira ŵanji viwemi.

3. 3. Kuŵa na ŵalongozgi awo ŵalije sankho.

4. 4. Kovwira ŵanthu wose kuti ŵaŵe ŵakukolerana.

Baibolo likutisimikizgira kuti Chiuta wali kukhazikiska boma ilo lingachita ivi. Boma ili ni “Ufumu wa Chiuta.”—Luka 4:43.

Wonani ivyo boma ili lizamuchita.

“Awo ŵakukhala mu charu [ŵazamusambira] urunji.”—YESAYA 26:9.

“Mu urunji wenecho muzamufuma mtende, ndipo chipambi cha urunji wenecho ni bata na chimango muyirayira.”—YESAYA 32:17.

Kasi fundo iyi yikung’anamurachi? Ufumu wa Chiuta uzamusambizga ŵanthu icho ntchiwemi. Para ŵanthu ŵamanya chiwemi na chiheni panji kuti urunji na kuwura urunji, kaghanaghaniro kawo kazamusintha. Ŵanthu wose ŵazamumanya kuti chinthu chiwemi icho ŵangachita, nkhutemwa ŵanthu ŵa mitundu yose.

Chiuta “wazamufyura masozi ghose ku maso ghawo, ndipo nyifwa yizamuŵakoso yayi. Kuzamuŵavya kutengera panji kulira, kutampha nesi vyakuŵinya. Vinthu vyakale vyafumapo.”—CHIVUMBUZI 21:4.

Kasi fundo iyi yikung’anamurachi? Ufumu wa Chiuta uzamumazga vyakuŵinya vyose ivyo vilipo chifukwa cha kuwura urunji. Munthu wazamutinkha ŵanyake yayi chifukwa cha vinthu vyakale vyambura urunji ivyo ŵakamuchitira.

“Wazamweruzga kutolera waka ivyo maso ghake ghawona yayi, nesi kuchenya kuyana na ivyo wapulika waka na makutu ghake. Ŵakuyuyuka wazamuŵeruzga mwaurunji, wazamuchenya ŵanthu mwakunyoloka chifukwa cha ŵakuzika ŵa charu chapasi.”—YESAYA 11:3, 4.

Kasi fundo iyi yikung’anamurachi? Yesu Khristu uyo ni Fumu ya Ufumu wa Chiuta, wazamulamulira mwaurunji kweniso mwambura kutemwera pa charu chapasi. Yesu wakutemwera mtundu unyake wa ŵanthu kuluska unyake yayi, ndipo wazamuwoneseska kuti ŵanthu pa charu chose chapasi ŵakulondezga malango ghake.

Ufumu wa Chiuta ukusambizga ŵanthu kuŵa na ‘maghanoghano ghakuyana, chitemwa chakuyana, na kukolerana chomene na kuŵa na maghanoghano ghamoza.’—ŴAFILIPI 2:2.

Kasi fundo iyi yikung’anamurachi? Ŵanthu awo ŵazamuŵa mu Ufumu wa Chiuta ŵazamuŵa waka ŵakukolerana yayi. Kweni ŵazamuŵa ‘ŵakukolerana chomene’ chifukwa ŵazamutemwana zanadi.