Munthu wangamba kuŵa na sankho chifukwa cha kujiwona panji kujikuzga. Munthu uyo wakujikuzga wakujiwona kuti iyo ndiyo ngwakuzirwa chomene. Wakujiwona kuti ngwapachanya ndipo wakuwona ŵanthu ŵanyake awo mbakupambana na iyo kuti mbapasi. Waliyose wangawira mu chipingo ichi. Buku linyake likuti: “Ŵanthu ŵanandi ŵakuwona kuti ŵakupambana na ŵanthu ŵa mitundu yinyake mu vinandi. Ŵakuwona kuti umo ŵakukhalira, vyakurya vyawo, kavwaliro, vyakuchita, vigomezgo, kawonero ka vinthu, na vinyake vyantheura, ni vyapachanya kuluska vya ŵanyawo.” (Encyclopædia Britannica) Kasi tingagega wuli kaghanaghaniro kakubudika aka?

“Muŵe ŵakujiyuyura na kuwona ŵanyinu kuti ŵakumuluskani.”—ŴAFILIPI 2:3.

Kasi fundo iyi yikung’anamurachi? Kuti tileke kujighanaghanira tekha mwakujumphizga, tikwenera kuŵa ŵakujiyuyura. Para tili ŵakujiyuyura timanyenge kuti ŵanyithu ŵakutiluska mu vigaŵa vinyake. Palije mtundu wa ŵanthu uwo vyose ukuchita makora.

Wonani ivyo vikachitikira Stefan. Iyo wakakulira mu charu cha Chikomyunizimu. Kweni iyo wakamazga sankho ilo wakaŵa nalo pa ŵanthu awo ŵakafuma mu vyaru ivyo mulije Chikomyunizimu. Iyo wakuti: “Nkhuwona kuti kughanaghanira fundo  yakuti ŵanyithu ŵakutiluska nkhwakuzirwa chomene pakulimbana na sankho. Nane nkhumanya vyose yayi. Ningasambirako kwa munthu waliyose.”

Lekani kujighanaghanira mwakujumphizga ndipo zomerezgani kuti namwe mukubudiska. Zomerezgani kuti ŵanji ŵakuchita makora vinthu vinyake ivyo imwe mukutondeka. Para munthu munyake wali na suzgo lekani kughanaghana kuti ndikuti ŵanthu wose ŵa mtundu wake ŵali na suzgo.

M’malo mwa kughanaghanira viheni munthu wa mtundu unyake, jifumbani kuti:

• ‘Kasi ivyo nkhutinkha mwa munthu uyu ni viheni nadi, panji tikupambana waka?’

• ‘Kasi munthu uyu nayo wangasanga vinyake ivyo ine nkhubudiska?’

• ‘Kasi ni vigaŵa wuli ivyo munthu uyu wakuchita makora kuluska ine?’

Usange mungazgora mwaunenesko mafumbo agha, vimovwiraninge kuti mumazge sankho na kuwona vinthu vinyake viwemi mwa munthu uyo, ivyo namwe mungadokerako.