Umoyo ukulongora kuti ukachita kulengeka. Vyamoyo vili na tunthu tuchokotuchoko twakuchemeka maselo. Maselo ghali nga ni mafakitare ghachokoghachoko ndipo ghakugwira ntchito zinandi chomene izo zikovwira kuti umoyo ulutilire kweniso kuti vyamoyo vyandanenge. Ndimo viliriso nanga ni mu vinthu vyamoyo ivyo vikuwoneka kuŵa vipusu waka. Mwachiyelezgero, ghanaghanirani za yisiti iyo ŵakugwiliskira ntchito pa vyakuphika. Kabulunga kalikose ka yisiti nkhanthu ka moyo. Pakuyaniska na maselo gha ŵanthu, selo la yisiti lingawoneka kuŵa lipusu waka. Kweni lili na vyakuchitika vinandi. Selo la yisiti lili na DNA panji kuti ulongozgi uwo ukuphalira selo vyakuchita. Selo lililose lili na tunthu tuchokotuchoko uto tukovwira kugaya chakurya kuti selo lilutilire kuŵa lamoyo. Usange chakurya chamara, selo la yisiti ili, likusintha na kuchepeska vyakuchita ndipo paumaliro likuleka dankha kugwira ntchito na kuŵa nga lagona. Lekani yisiti wakuphikira wangasungika kwanyengo yitali ndipo pamanyuma wangazakambaso kugwira ntchito panyengo iyo munthu wakumugwiliska ntchito pakuphikira.

Ŵasayansi ŵasanda maselo gha yisiti kwa vyaka vinandi mwakuti ŵamanye makora umo maselo gha munthu ghakugwilira ntchito. Ndipouli, pali vinandi ivyo ŵachali ŵandavimanye makora. Purofesa munyake wakayowoya kuti: “Tilije ŵakaswiri ŵakukwana ŵakuti ŵangayezgelera vyose ivyo tikukhumba mwakuti tipulikiske makora umo maselo gha yisiti ghakugwilira ntchito.”—Ross King, professor of machine intelligence at Chalmers University of Technology in Sweden.

Kasi imwe mukuwona wuli? Kasi selo la yisiti ilo likuwoneka kuŵa lipusu waka, kweni lakusuzga  kulimanya makora umo likugwilira ntchito, likupeleka ukaboni wakuti likachita kupangika? Panji kasi likaŵako lekha kwambura wakulipanga?

Umoyo ukuŵako kufuma ku umoyo unyake pera. DNA yili kupangika na tunthu tunyake twakuchemeka nucleotides. Selo lililose la munthu lili na tunthu utu twakukwana 3.2 biliyoni. Tunthu utu ndito tukuŵa na ulongozgi wa umo selo lingapangira maproteni na ma enzymes.

Ŵasayansi ŵakuti nanga tunthu twakuchemeka nucleotides utu, tungiza pamoza maulendo mabiliyoni ghanandi panji matililiyoni ghanandi, kweni tungapanga waka DNA yimoza pera. Nangauli ivi ni vyakuti vingachitikaso nakale yayi.

Unenesko ngwakuti palije ukaboni uliwose uwo ŵasayansi ŵasanga wakulongora kuti umoyo ungapangika kufuma ku vinthu vyambura umoyo.

Umoyo wa munthu ngwapadera. Taŵanthu tili kulengeka munthowa yakuti tingakondwa na umoyo mwakukwana mwakupambana na vyamoyo vyose. Tili na mwaŵi wakusambira ntchito panji maluso ghakupambanapambana, kuchita vinthu vyakovwira ŵanji, kweniso kulongosolera ŵanyithu umo tikujipulikira. Tikukondwa na vyakurya vyakupambanapambana, kunuska, kupulika, kukondwa na mitundu ya vinthu, kweniso kuwona. Tikunozgekera vyamunthazi na kufufuza umo tingachitira kuti tiŵe na umoyo wakukhorweska.

Kasi imwe mukuwona wuli? Kasi vinthu vyakukondweska ivi, vikizamo vyekha mwa ise pakuti vikaŵa vyakukhumbikwa kuti tilutilire kuŵa na umoyo kweniso kubabana? Panji ntchilongolero chakuti umoyo ntchawanangwa chakufuma kwa Mlengi withu wachitemwa?