Ŵalongozgi ŵa vyaru kweniso mawupu ghakurughakuru pa charu chose ŵatondeka kukhazikiska mtende. Pasono ndipo pa charu chapasi pakuchitika nkhondo chomene kuluska nyengo yinyake yiliyose kufuma apo pakaŵira Nkhondo Yachiŵiri ya pa Charu Chose. Ŵanthu pafupifupi 2 biliyoni ŵali mu malo umo mukuchitika nkhondo.

 Chifukwa wuli ŵanthu ŵakutondeka kukhazikiska mtende? Kasi Baibolo likuti wuli?

1.  1. Ŵanthu ŵakulongora mikhaliro iyo yikuŵatondeska kukhazikiska mtende. Baibolo likayowoyerathu kuti mu nyengo yithu iyi “ŵanthu [ŵaŵenge] ŵakujitemwa, ŵakutemwa ndalama, ŵakujiŵikamo, ŵakujikuzga, . . . ŵambura kugomezgeka, . . . ŵanonono, . . . ŵambura kujikora, ŵakofya, . . . ŵakajilangi, ŵakujitukumura na kunotha.”—2 Timote 3:2-4.

2.  2. Kwambura Mlengi wawo Yehova a Chiuta, ŵanthu pa iwo ŵekha walije nkhongono yakumazgira masuzgo. Baibolo likuti: “Munthu uyo wakwenda wangalongozga yayi mendero ghake.”—Yeremiya 10:23.

3.  3. Charu chose chapasi chili mu mawoko gha munthu muheni uyo ngwankhongono chomene, Satana Dyabulosi “uyo wakupuluska charu chose.” (Chivumbuzi 12:9) Nkhondo zilutilirenge kuchitika chifukwa “charu chose chikugona mu nkhongono za muheni.”—1 Yohane 5:19.

 Baibolo likutisimikizgira kuti Chiuta ndiyo wiziskenge mtende, ŵanthu yayi.

•   Baibolo likuti: “Pakuti nkhumanya maghanoghano agho nkhughanaghanira imwe, maghanoghano gha mtende, gha soka chara, kumupani munthazi muwemi na chigomezgo.’”—Yeremiya 29:11.

 Kasi Chiuta wazamufiska wuli layizgo ili? Baibolo likuti: “Chiuta, uyo wakupeleka mtende wazamung’anyira pasi Satana.” (Ŵaroma 16:20) Chiuta wazamugwiliskira ntchito boma lakuchanya, ilo Baibolo likulichema kuti “Ufumu wa Chiuta,” kuti lizakakhazikiske mtende pa charu chose chapasi. (Luka 4:43) Apo Yesu wazamulamulira mu Ufumu wa Chiuta, ŵanthu ŵazamusambizgika umo ŵangakhalira mwa mtende.—Yesaya 9:6, 7.

•   Kuti mumanye vinandi, ŵazgani nkhani ya mutu wakuti“Kasi Ufumu wa Chiuta Uzamuchita Vichi?”