Mu October na November 2020, Khoti Lakuwona vya Wanangwa wa Ŵanthu ku Europe, likapeleka vyeruzgo ivyo vikaŵikira kumanyuma Ŵakaboni ŵa Yehova ku Azerbaijan. Milandu iyi yikaŵa ya pakati pa Gridneva na Azerbaijan, Sheveli na Shengelaya na Azerbaijan, Jafarov na Azerbaijan, kweniso Tagiyev na Azerbaijan. Vyeruzgo ivyo khoti ili likapeleka vyawovwira waka kuti ŵabali ŵithu ŵalutilire kuŵa na wanangwa wa kupharazga, kuwungana pamoza kuti ŵasope, na kunjizga mabuku ghithu mu charu cha Azerbaijan.

Milandu iyi ŵakaluta nayo ku Khoti mu 2011 na 2012. Mulandu wa pakati pa Gridneva na Azerbaijan kweniso Sheveli na Shengelaya na Azerbaijan ukaŵa wa ivyo ŵapolisi ŵakachita apo ŵakatimbanizga maungano gha mpingo panji kutimbanizga ntchito yithu ya kupharazga. Mulandu wa Jafarov na Azerbaijan kweniso Tagiyev na Azerbaijan ukaŵa wa ivyo boma likachita pakukanizga panji kuzomerezga mabuku ghithu ghachoko waka kuti ghanjire mu charu ichi.

Chakukondweska ntchakuti, milandu yitatu pa milandu yinayi iyi, (wa Gridneva na Azerbaijan, Jafarov na Azerbaijan, kweniso Tagiyev na Azerbaijan), boma la Azerbaijan likazomera kuti likaswa nadi wanangwa wa ŵabali ŵithu ndipo likakolerana navyo vyakuti liŵalipire ndalama zakukwana madola 12,880 gha ku America.

Pa mulandu wa Sheveli na Shengelaya na Azerbaijan, uwo ukaŵa wa ivyo ŵamazaza ŵakachita pakukaka mbumba iyi mwambura kukolerana na dango na kuyitumizga ku charu chinyake, Khoti Lakuwona vya Wanangwa wa Ŵanthu ku Europe likati boma la Azerbaijan liŵalipire ndalama zakukwana madola 3,680 gha ku America.

Pakupeleka chigamuro ichi, Khoti Lakuwona vya Wanangwa wa Ŵanthu ku Europe likati: “Kukaka [mbumba iyi] chifukwa chakuti yikapempheranga panji kuchita vinyake vyakukhwaskana na ivyo yikugomezga [vikususkana] na malango gha wupu wa [European] Convention [on Human Rights]. Kuyowoya unenesko ivi vikuyana waka na kukanizga visopa vinyake ivyo vindalembeskeke mu boma ndipo vingalongora kuti boma ndilo likuchita kusankhira munthu ivyo wakwenera kugomezga.”

Mu vyaka vyasonosono apa, ŵamazaza ku Azerbaijan ŵamba kuchita vinthu makora waka na Ŵakaboni ŵa Yehova ndipo ŵakuchindika wanangwa wawo. Tikuwonga chomene wanangwa wakusazgikira uwo wiza chifukwa cha ivyo Khoti Lakuwona vya Wanangwa wa Ŵanthu ku Europe ladumura. Chikuru chomene, tikuwonga Yehova Chiuta, uyo “ntchiphokwero chithu na nkhongono zithu.”—Salimo 46:1.