MAY 3, 2022
NKHANI ZA PA CHARU CHOSE
“Ŵikani Mtima pa Ubwezi Winu na Yehova”
Pulogiramu Yapadera Yakhozga Ŵabali ku Ukraine na Poland
Pa April 26, 2022, Mubali Mark Sanderson, wa mu Wupu Wakulongozga wa Ŵakaboni ŵa Yehova, wakaluta ku Poland kuti wakakhozge mwauzimu ŵabali na ŵadumbu awo ŵakhwaskika na nkhondo ku Ukraine.
Ŵabali ku Poland ŵakugwira ntchito mu holo yakuchitiramo Maungano ghakurughakuru
Mipingo yose ku Poland na Ukraine yikachemeka kuti yikachiteko pulogiramu ya padera iyo yikaŵako pa April 30, 2022. Ku Poland, awo ŵali kuchimbira nkhondo ku Ukraine na awo ŵakuchitako ntchito yakupeleka wovwiri ŵakaŵa ŵamoza mwa awo ŵakachemeka kuti ŵakasangikepo pa pulogiramu iyi maso na maso ku Warsaw. Kusazgapo na awo ŵakachita waka kujoyina ku pulogiramu iyi, tingati wose awo ŵakachitako ungano uwu ŵakaŵapo ŵakujumpha 250,000 ku Poland na ku Ukraine.
Mubali Sanderson wakayowoya kuti, “Taŵabali na ŵadumbu pa charu chose chapasi tikughanaghana vya imwe ndipo tikumulomberani. Ku likuru lithu zuŵa lililose lurombo lukupelekeka lwakukhwaskana na ŵabali ŵithu ku Russia na Ukraine, kusazgaposo malurombo agho ghakupelekeka pa maungano gha Wupu Wakulongozga.” Mubali uyu wakaŵasimikizgiraso kuti “suzgo ntchilongolero chakuti Yehova waleka kumutumbikani yayi. Wakumuwonani, wakumutemwani, ndipo wali pafupi chomene na awo ŵakusuzgika maghanoghano.”
Ŵabali na ŵadumbu awo ŵali kuchimbira mu nyumba zawo ku Mariupol, Ukraine, ŵakuwonelera ungano wapadera
Mubali Sanderson wakalutizga kuti: “Ŵikani mtima pa ubwezi winu na Yehova. Chilato chithu ntchakuti tipone waka yayi, kweni tikukhumba kuti tizakafume mu masuzgo agha uku tili na chipulikano chakukhora na kujipulika kuti tili pafupi chomene na Yehova. Ivi ndivyo Yehova wakutisambizga.”
Serhiy, uyo ni mulara ku Odessa, Ukraine, wakati: “Mu masabata ghajumpha agha, kusuzgika maghanoghano, vinthu ivyo nataya, na vinthu vyamabuchi vyanisoŵeskanga tulo. Ndipouli, [ Pulogiramu yapadera iyi] yanikhukiska na kunisimikizgira kuti Yehova wakupwelelera waka gulu lake yayi kweni wakupwelelera munthu waliyose payekha.”
Mudumbu Tatiana, uyo wali kuchimbira kukwawo ku Kyiv, Ukraine, wakati: “Mwahuno, najipulika nadi kuti Yehova wali nane pafupi. Yehova wakunihaga na kunilongora chitemwa chake. Kulikose uko tingaŵa, nyengo zose Yehova wakuŵa nase.”
Tikuŵatemwa chomene ŵabali na ŵadumbu ŵithu, ndipo tili na chigomezgo chose kuti pulogiramu yapadera iyi yiŵasimikizgirenge “chitemwa chakugomezgeka” icho Yehova wali nacho pa ŵanthu ŵake.—Salimo 136:1.
