Pa June 10, 2023, Mubali Geoffrey Jackson, uyo ngwa mu Wupu Wakulongozga, wakafumiska buku la mu Baibolo la Makani Ghawemi Umo Wakalembera Mateyu mu Chiromani (Southern Greece). Buku la mu Baibolo ili likafumiskika pa ungano wapadera uwo ukachitikira ku ofesi ya munthavi ya Piraeus, Greece. Ŵanthu ŵakujumpha 29,000 ŵakawonelera pulogiramu iyi. Mipingo yose yikawonelera pulogiramu iyi ku Greece na Cyprus. Nyengo yeneyiyo lati lafuma waka, buku la mu Baibolo ili likamba kusangika pa intaneti kuti ŵanthu ŵachite dawunilodi. Baibolo lakupulinta lifikenge mu mipingo mu myezi ya munthazi umu.

Chiyowoyero ichi chilije malango pa nkhani ya kalembero na kayowoyero, ntheura ichi chikapangiska kuti mulimo wakung’anamura Baibolo ili uwe wakusuzga chomene. Ŵabali na ŵadumbu awo ŵakuchita mulimo wakung’anamura mu chiyowoyero ichi ŵalipo 10 ndipo mulimo wawo uwu ŵakuchitira ku ofesi ya munthavi ya Greece. Ŵabali aŵa ŵakovwirika chomene na ŵabali na ŵadumbu awo ŵakugwilira kunyumba kwawo.

Pamanyuma pakuti waŵerenga buku la mu Baibolo la Mateyu mu Chiromani, (Southern Greece) mudumbu munyake wakayowoya kuti: “Nkhamba kumumanya Yehova apo nkhasambiranga Baibolo mu chiyowoyero cha Chigiriki. Nangauli nkhapulikanga ivyo nkhaŵerenganga, kweni kuŵerenga Baibolo mu chiyowoyero chakonkhera kukunifika pa mtima ndipo vikunovwira kuti nilondezgenge fundo izo nkhuŵerenga.”

Mudumbu munyake wakayowoya kuti: “Umo fundo ya pa Mateyu 26:38, 39 yili kulembekera mu Chiromani, (Southern Greece) yikunifika pa mtima chomene. Yesu wakaphalira ŵasambiri ŵake kuti ‘Nili na chitima chikuru chakuti ningafwa nacho.’ Kweni wakalomba kwa Yehova kuti wamupe nkhongono kuchita khumbo lake. Pakuti sono nkhupulikiska makora mavesi agha, nkhumanya kuti nkhwananga yayi usange nyengo zinyake wamunthu ungaŵa na chitima. Kweniso mavesi agha ghakunikumbuska kuti nkhwenera kulomba chomene kwa Yehova kuti wanipe nkhongono kuti nitonde masuzgo kweniso kuti niphalirengeko ŵabali na ŵadumbu umo nkhujipulikira.”

Nase tikukondwa pamoza na ŵabali na ŵadumbu aŵa apo ŵakusanga chandulo na chawanangwa chakuzirwa ichi, icho chiŵawovwirenge kuŵa paubwezi na Yehova.—Yakobe 4:8.