Muliri wa COVID-19 wapangiska kuti paŵe masuzgo ghanyake mu maofesi ghithu 11 agho ŵakung’anamulirako mabuku ghithu ku India, mu viyowoyero 36. Yehova wakuŵawovwira awo ŵakuchita mulimo uwu kuti ŵatonde masuzgo, na kulutilira kugwira ntchito yawo.

Ntchito yakung’anamura yikukhumba kuti mwaŵanthu mugwilirenge pamoza. Kweni apo muliri wa COVID-19 ukulutilira kuthandazgika, charu cha India chakanizga kuti ŵanthu ŵakumane pamoza. Ivi vyapangiska kuti awo ŵakung’anamura mabuku ghithu ŵaleke kugwilira pamoza, Kweniso awo ŵakujambura mavidiyo na vinthu vya kutegherezga waka, nawo ŵakaleka kujambura vinthu ivi.

Ntheura m’malo mwakuti ŵakumane pamoza, iwo ŵakamba kugwiliskira ntchito pulogiramu yinyake ya pa kompyuta kuti ŵakumane pamoza ndipo ŵanyake ŵakajambuliranga ku nyumba kwawo. Ivi vyapangiska kuti chiŵe chipusu kupempha wovwiri ku ŵabali na ŵadumbu ŵa mu vyaru vinyake nga Bangladesh na United States.

Ŵabali aŵa ŵasangaso nthowa zinyake izo zikuŵawovwira kuti ŵajambure mavidiyo gha chiyowoyero cha mawoko, ndipo ŵakuchita nthena uku ŵakhala mwakutalikirana na ŵanyawo. Ŵabali ŵanyake ŵali kusintha vinthu vinyake na kwamba kujambulira mavidiyo mu vipinda vyawo, ndipo pakuchita mulimo uwu ŵanji ŵakugwiliskira ntchito ivyo ŵali navyo nga ni mafoni ghawo.

Ŵabali aŵa ŵakuthemba chomene Yehova kuti waŵawovwire kulutilira kuŵa ŵakukondwa na kuchita vinandi mu nyengo yakusuzga iyi. Wonani vinyake ivyo ŵabali na ŵadumbu aŵa ŵakayowoya:

Mubali Jose Francis wa ku Kolkata wakati, “Para wamunthu uli mu masuzgo ukuwona nga nthowa yajalika ndipo kulije kwakunjilira, kweni Yehova wakumanya nthowa iyo wangamovwilirani.”

Mudumbu Bindu Rani Chandan wa ku Bangalore wakati, “Nangauli nkhusangana na masuzgo, kweni ndine wakukondwa chomene kuti Yehova wakunigwiliskira ntchito mu nyengo yakusuzga iyi.”

Mudumbu Rubina Patel wa ku Vadodara wakati, “Palije icho chingamujanda Yehova panji gulu lake nanga ungaŵa muliri wa coronavirus.”

Tikunotha chomene chifukwa chakuti ŵabali na ŵadumbu ŵithu aŵa ŵakuchita mulimo wakuzirwa uwu. Tikumanya kuti mzimu utuŵa wa Yehova ndiwo ukuŵawovwira kuti ŵatonde masuzgo ndipo mulimo uwo ŵakuchita ukovwiraso kuti uchimi uwo Yesu wakayowoya ufiskike, uwo ukuti: “Makani ghawemi agha gha Ufumu, ghazamupharazgika mu charu chose chapasi kuti uŵe ukaboni ku mitundu yose.”—Mateyu 24:14.