Dennis Christensen wakafika makora ku Denmark pa May 25, 2022. Wakafumiskika mayiro ghake mu jele la ku Russia ndipo mwaluŵiro wakatumizgika kukwake. Wakhala mu ma jele ghakupambanapambana kwa vyaka 5.

Dennis wakuti, “Ndine wakukondwa chomene kufumiskika mu jele na kusanganaso na muwoli wane, Irina. Nkhuwona kuti vyose ivyo ŵabali na ŵadumbu pa charu chose ŵakachitanga pa kunikhozga, ntchawanangwa chakufuma kwa Yehova. Nkhulutilira kulombera ŵabali na ŵadumbu ŵachikanga awo ŵakutambuzgika na kujalirika mu majele chifukwa cha chipulikano chawo.”

Ŵabwezi na ŵachibali ndiwo ŵakovwira Dennis na Irina mwauzimu na mwakuthupi. Iwo ŵakati, “Tikulindilira mwakunweka kukasopa Yehova mwawanangwa pamoza na ŵabali na ŵadumbu ku Denmark.”

Dennis wakakika pa May 25, 2017, apo ŵamazaza wa boma la Russia awo ŵakavwara vyakujijara ku maso kweniso ŵakaŵa na vilwero ŵakatimbanizga maungano gha mpingo agho nayo wakaŵapo ku Oryol. Wakapika mulandu wakuti wakovwirapo pa milimo ya wupu wachisopa icho chikuchita vinthu vyakofya ndipo chikakanizgika na Khoti Likuru la Russia pamanyuma waka pa mwezi umoza.

Ŵamazaza ŵaboma la Russia ŵayowoyapo mwakuwerezgawerezga kuti kukanizgika uko kukayowoyeka mu 2017 nkhwa mawupu ghakuzomerezgeka na dango gha Ŵakaboni ŵa Yehova, ndipo kukolerana yayi na wanangwa uwo Kaboni wa Yehova waliyose wali nawo wakuti wangachita vinthu ivyo vikukhwaskana na chigomezgo chake. Ndipouli, kukakika kwa Dennis kukaŵa waka kwamba kwa kutambuzga, kukaka na kujalira mu jele Ŵakaboni ŵa Yehova ŵanandi mu charu chose cha Russia na Crimea.

Kufika pasono, ŵabali na ŵadumbu 91 ŵachali mu jele. Tikulomba kuti Yehova walutilire kukhozga ŵanthu ŵakugomezgeka aŵa na kuchita nawo vinthu “mu nthowa yapadera.”—Salimo 4:3.