Khoti la Pavlovskiy ku Chigaŵa cha Nizhny Novgorod lipelekenge chigamuro chake sonosono apa pa mulandu wa Mubali Aleksey Oreshkov, Aleksandr Rakovskiy, na Aleksandr Vavilov. a Uyo wakwimira boma pa milandu wachali wandapemphe chilango icho ŵabali aŵa ŵangapika.

Aleksey Oreshkov

• Chaka cha kubabikira: 1971 (Pavlovo, Chigaŵa cha Nizhny Novgorod)

• Mbiri yake: Apo wakaŵa muchoko wakatemwanga maseŵera gha table tennis. Wakasambira vya sumu pa yunivesite yinyake ndipo wakumanya chomene kulizga vyakwimbira ivyo ŵakulizga na mulomo. Pasono wali kupumura. Wapwelelera amama ŵake awo mbachekuru kwa vyaka vinandi. Wakabatizika na kuŵa Kaboni wa Yehova mu 2011

Aleksandr Rakovskiy

• Chaka cha kubabikira: 1980 (Pavlovo, Chigaŵa cha Nizhny Novgorod)

• Mbiri yake: Apo wakaŵa muchoko, wakasambira kulizga gitara ndipo wakimbanga na gulu linyake lakwimba. Wakugwira ntchito ya kuwona umo Intaneti yikwendera. Wakatorana na muwoli wake Tatyana, mu 2005. Ŵakamba kusambira Baibolo na Ŵakaboni ŵa Yehova ŵati ŵamanya ivyo likulayizga pa nkhani ya ivyo vizamuchitika munthazi. Wakabatizika mu 2009. Ŵali na mwana mwanakazi na mwanalume

Aleksandr Vavilov

• Chaka cha kubabikira: 1967 (Kropotkin, Chigaŵa cha Krasnodar)

• Mbiri yake: Apo wakaŵa muchoko wakatemwanga kuchimbira, kushuwa (kuskamba), kuseŵera mu chiwuvi, na kudinda vithuzi. Wakaŵapo msilikari. Wakasambira vya maseŵera gha mbembe. Kweni wakasankha kuti waleke kuchitako maseŵera ghankhaza ndipo wakamba ntchito ya kumeta. Iyo na muwoli wake Yelena, ŵakamba kusambira Baibolo na Ŵakaboni ŵa Yehova. Ŵakatorana mu 1994 ndipo ŵakabatizika mu 1995. Ŵakutemwa kuchezga kuwaro kwa nyumba yawo

Pa July 16 na 17, 2019, ŵa Federal Security Service (FSB) ŵakasecha nyumba zinandi za Ŵakaboni ŵa Yehova ku Chigaŵa cha Nizhny Novgorod. Ivi vikati vyachitika, Aleksey Oreshkov na Aleksandr Vavilov ŵakafumbika mafumbo ndipo paumaliro ŵakaŵasunga mu jele kulindilira kuti mulandu wawo weruzgike. Aleksey wakasungika mu jele mazuŵa 211, kufuma apo wakatumika pa jele la panyumba ilo wakakhala mazuŵa 31. Aleksandr wakasungika mu jele mazuŵa 241.

Apo wakasungikanga mu jele, Aleksey wakalombanga pafupipafupi kweniso kufumira pasi pa mtima, kuluska kumasinda kose. Zuŵa lililose para wawuka, wakalombanga kuti waghawonenge mwakwenelera masuzgo agho wasanganenge nagho zuŵa ilo, kweniso kuti walutilire kugomezgeka na kughanaghanira vya Yehova na Mazgu ghake. Iyo wakutiso: “Para zuŵa likukanjira, malurombo ghane ghakaŵanga ghatali kweniso ghakufumira pasi pa mtima, ndipo nkhayezgeskanga kuzunura mazina gha ŵabali wose. Nkhalomberanga ŵamazaza ŵa jele, ŵakayidi ŵanyane, uyo wakafufuzanga mulandu wane, mbumba yane, mpingo wane, na gulu lithu.”

Aleksandr Vavilov wakuti: “Nkhuwona kuti Yehova wali nane pafupi chomene. Nkhujipulika kuti wakunilongozga kweniso wakuniyegha mu mawoko ghake nga umo muliska wakuyeghera kana ka mberere. Zuŵa lililose nkhujiwonera nekha umo wakunipwelelera.”

Pa September 21, 2020, Aleksandr Rakovskiy nayo wakapika mulandu ndipo mulandu wake ŵakawusazga na mulandu wa Mubali Oreshkov na Vavilov. Ŵabali wose ŵatatu ŵakupika mulandu chifukwa cha kuchitako vinthu vyakukhwaskana na kusopa pa maungano gha Ŵakaboni ŵa Yehova. Ŵakukanizgikaso kwenda kufuma mu vigaŵa ivyo ŵakukhala.

Aleksandr Rakovskiy wakuwona kuti kughanaghanira pa mauchimi gha mu Baibolo, chomenechomene ghakuyowoya vya themba la kumpoto, vikumovwira kuti wazizipizgenge. Iyo wakuti: “Vikunovwira kuti nileke kughanaghanira masuzgo agho nkhukumana nagho, kweni niŵikenge mtima pa mauchimi agho ghakuyowoya vya kutambuzgika na umo ghakufiskikira. Kweniso vikunovwira kuti niŵike mtima pa layizgo la Yehova lakuti watovwirenge para tikutambuzgika.”

Tili na chigomezgo chose kuti ŵabali ŵatatu aŵa ŵalutilirenge kuwona vinthu mwakwenelera apo chipulikano chawo chakukhora chikuŵawovwira kuti ŵazizipizge nthambuzgo iyi.—Ŵafilipi 1:29.