Khoti la mu Msumba wa Blagoveshchenskiy ku Chigaŵa cha Amur lipelekenge chigamuro chake sonosono apa pa mulandu wa Mubali Aleksey Berchuk na Dmitriy Golik. a

Aleksey Berchuk

• Chaka cha kubabikira: 1975 (Kartaly, ku Chigaŵa cha Chelyabinsk)

• Mbiri yake: Wagwirapo ntchito yakuzenga kweniso ya ukalipentara. Wakamba kusambira Baibolo m’ma 1990. Wakaleka maseŵera gha nkhaza ndipo sono wakutemwa kuseŵera bola la malundi na ŵabwezi ŵake. Wakabatizika mu 1998. Wakatorana na muwoli wake Anna, mu 2008

Dmitriy Golik

• Chaka cha kubabikira: 1987 (Tokhoy, Republic of Buryatia)

• Mbiri yake: Wakugwira ntchito ya kung’anamura Chitchayinizi kuya mu Chirussia. Wakutemwa kunyamura maweti (visulo), kuseŵera bola la malundi, na kulizga gitara

  Mbumba yakwake yose yikamba kusambira Baibolo cha m’ma 1990. Wakabatizika mu 2002. Wati wachemeka kuti wakanjire usilikari, wakapempha kuti ŵamupe ntchito zinyake. Wakatumika kuti wakagwirenge ku malo ghanyake agho ŵakupwelelerako ŵachekuru. Wakatorana na muwoli wake Kristina, mu 2012. Wose ŵakusambira Chingelezi na Chitchayinizi kuti ŵasazgireko uteŵeti wawo

Kukwambilira kwa 2018, ŵamazaza ŵa boma ŵakaŵika mwakubisilizga makamera na vyakujambulira mazgu mu nyumba ya Mubali Golik. Mu June 2018, ŵa Federal Security Service (FSB) ŵakasecha nyumba 7 za Ŵakaboni ŵa Yehova ku Blagoveshchensk. Ivi vikati vyachitika, Mubali Dmitriy Golik na Aleksey Berchuk, ŵakaŵapa mulandu. Iwo ŵakupika mulandu wakuti ŵakulongozga gulu ilo likuchita vinthu vyakofya.

Aleksey wakaphalirika nyengo yeneyiyo yayi vyakuti wali na mulandu. Pa January 21, 2019, ŵakamukaka apo wakaŵa pa malo agho ŵakuwona vyakukhwaskana na mapasipoti ku Chiŵanja cha ndege cha Domodedovo, Moscow. Mulara wa awo ŵakufufuza milandu ku FSB wakamutora Aleksey na kuwelera nayo ku msumba wakwake, uko pasono wakuzomerezgeka yayi kwenda.

Ŵabali wose ŵaŵiri aŵa ŵakulongosora kuti ntchakuzirwa chomene kunozgekera masuzgo agho tingakumana nagho munthazi. Dmitriy wakuti, “Ntchiheni yayi kukhazga kuti vinthu vyendenge makora, kweni tikweneraso kunozgekera masuzgo gha munthazi.” Iyo wakulutizga kuti: “Mbunenesko kuti kunozgekera kukanovwira. Kweni icho chikanovwira chomene ntchakuti nkhaŵikapo mtima kukhozga chipulikano chane. Para tikutambuzgika, chinthu chakuzirwa chomene nkhuchenjera panji kumanya kubisama yayi, kweni kugomezgeka kwithu kwa Chiuta. Yesu wakhumbenge mphanyi wakabisama ku ŵalwani ŵake, nakuti nthena ŵakamusanga yayi, kweni ndicho chikaŵa chilato chake yayi. Pakuŵa ŵasambiri ŵake, chilato chithu ntchakuti tigwenthe masuzgo yayi, kweni kulimbana nagho na chikanga.”

Aleksey wakusazgirapo kuti: “Para tikughanaghana kuti, ‘Ine ivi vinganichitikira yayi’ mbwenu tikubudiska chomene. Ntchakuwonekerathu kuti Yehova wazomerezga kuti ivi vichitike. Para mwazomerezga fundo yakuti mungatambuzgika na kwamba kuwona vinthu mwakwenelera, mbwenu para nthambuzgo yamba nadi, chizamuŵa chipusu kuzomerezga na kuzizipizga, uku mukuthemba wovwiri wa Yehova.”

Tikumanya kuti ŵabali ŵithu ku Russia, kusazgapo Aleksey, Dmitriy, na ŵawoli ŵawo, ŵalutilirenge kujipulika nga ni wamasalimo uyo wakati: “Wonani! Chiuta ni movwiri wane. Yehova wali na awo ŵakunifighilira.”—Salimo 54:3, 4.