Khoti la Zeyskiy ilo lili ku Chigaŵa cha Amur, lipelekenge chigamuro chake sonosono apa pa mulandu wa Mubali Konstantin Moiseyenko. a Uyo wakwimira boma pa milandu wapempha khoti kuti limupe chilango chakuti wagwire jele vyaka 6.

Konstantin Moiseyenko

• Chaka cha kubabikira: 1976 (Abakan, Republic of Khakassia)

• Mbiri yake: Wali na ŵanung’una ŵake awo mbamuleza. Apo wakaŵa munyamata, wakachitanga maseŵero gha kalati. Wakamba kugwira ntchito ya uinjiniya kweniso ya kupanga mapulogiramu gha pa kompyuta

  Mu 1998, wakatorana na Margarita, uyo wakugwira ntchito yakuwona vya mafashoni gha vyakuvwara. Wose ŵakamba kusambira Baibolo na Ŵakaboni ŵa Yehova kukwambilira kwa chaka cha 2000. Chifukwa chakuti Baibolo likuneneska pa nkhani ya mbiri kweniso pa nkhani ya vya sayansi, vikamupangiska Konstantin kuti wanweke kusambira vinandi. Iyo na muwoli wake ŵakabatizika mu chaka chakulondezgapo

  Adada ŵake ŵali kufwa vyaka 10 ivyo vyajumpha. Kwa vyaka 6, wakapwelelera abuya ŵake awo ŵakalaŵiskanga yayi m’paka apo ŵakafwira mwasonosono apa

Pa March 11, 2019, Dipatimenti Yakufufuza Milandu ya Federal Security Service (FSB) ku Chigaŵa cha Amur, yikamba kumupa mulandu Mubali Konstantin Moiseyenko. Kufuma apo, ŵamazaza ŵakasecha nyumba 5 za Ŵakaboni ŵa Yehova, kusazgapo na nyumba ya Konstantin. Ŵamazaza aŵa ŵakapoka vinthu nga malaputopu, mafoni, na vimakalata vinyake vyakukhumbikwa. Konstantin wakaŵikika mu gulu la ŵanthu awo boma la Russia likuti ŵakuchita vinthu vyakofya, ndipo ivi vikupangiska kuti watondekenge kutora ndalama ku maakaunti ghake gha ku banki.

Konstantin wakukumbuka chakuchitika chakukhozga icho iyo na muwoli wake ŵakawona pa ungano wa chigaŵa uwo ukachitikira ku Seoul, South Korea, mu 2018. Apo ungano ukaŵa mukati, yumoza wa awo ŵakadumbanga nkhani wakati wose awo ŵali kujalirikapo mu jele chifukwa cha chipulikano chawo ŵayimilire. Konstantin wakuti: “Pafupifupi waliyose mwa ŵabali awo ŵakaŵa mu sitediyamu wakayimilira. [Uyo wakayowoyanga nkhani] wakati: ‘Wonani! Wose mbamoyo ndipo ŵali makora waka!’ Ivi vikanovwira kujiwonera nekha kuti ntchamachitiko kuzizipizga nthambuzgo.” Uyo wakayowoyanga nkhani wakadidimizgaso fundo ya pa Salimo 23:5: “Mukuninozgera thebulu pamaso pa ŵalwani ŵane. Mukuphakazga mutu wane na mafuta. Nkhombo yane njakuzura makora.” Konstantin wakukumbuka kuti mazgu agha ghakaŵafika pa mtima chomene wose.

Konstantin wakuwongaso chomene wovwiri wakufuma ku ŵabali na ŵadumbu. Iyo wakukhorwa kuti Ŵakaboni pa charu chose ŵakumufipira mtima ndipo ŵakumulombera. Iyo wakuti: “Nkhuwona wumba ukuru wa ŵabali na ŵadumbu wimilira pamoza na mubali panji mudumbu uyo wakutambuzgika mu charu chithu. Nakuti ŵabali na ŵadumbu aŵa ŵakuchita mwakuyana na mazgu gha pa 1 Yohane 3:16, agho chigaŵa chinyake ghakuti: ‘Nase tikwenera kupeleka umoyo withu chifukwa cha ŵabali ŵithu.’”

Tikukondwa chomene para tikupulika kuti Yehova wakulutilira kuŵapa nkhongono ŵabali na ŵadumbu ŵithu ku Russia. Nakuti ivi vikutipangiska kuti tiŵe na chigomezgo chose kuti nase para tazakasangana na nthambuzgo yakuyana waka, Yehova wazamutipa “nkhongono na mazaza.”—Salimo 68:35.